"Madinat Jumeirah"

Am Mittwuch, vorigi Wuche, dr letschti Ferietag vo dr Corinne u Marc, hei mir de no en Usflug nach Dubai gmacht. S`Ziel isch s`Hotel Madinat Jumeirah gsi. Was übersetzt „ Stadt von Jumeirah“ heisst. Das isch im Momänt „das Hotel“ wo zu de meischtbsuechte Ziel vo Touris (Tourischte) u Gschäftslüt i Dubai ghört!

Es lieht diräkt näbem Weltbekannte Burj al arab am Jumeirah Beach, isch aber en völlig andere Boustil. Mi seit es sigi „ d`Stadt i dr Stadt“. Das ganzi isch als Lagunestadt, originalgetreu im Stil vo arabische Paläst mit de tüpische Windtürm nahbout worde. Die ganzi Alag isch a vo 3,7km länge Wasserwäg umgä u über die erreicht me mit em „Abra“ ( Wassertaxi) d`Hotelzimmer. Im Madinat sälber gits en original getreuie, nahboute Souk ( Märt) mit 75 chliene Läde. Hie chame usschliesslich Antiquitäte, Kunsthandwärch u orientaleschi Läbesmittel choufe. Näbedäm gits 45 Beize, Theater, Konferenzzentrum.

Madinat Resort isch uf drü Hotel verteilt: Ds „Al Qasr“ (der Palast) das isch öppe s`Härzstück vom ganze Resort. Es isch e Rekonstruktion vore Summerresidänz vom Scheich vo Duai. De isch no s“ Mina al Salam“ u s „Dar al Masyaf“. Die si beidi im arabische Stil mit de tüpische Windtürm bout. Was si Windtürm wärdet ihr euch frage! Hie e churzi Erklärig derzue: Windturm heisst uf arabisch, respektive persisch „ Badgir“ u chunt vom traditionelle persische Architekturstil, wo für d`Belüftig vo Hüser gnützt worde isch. Die wärde hüt no viel i verschiedene Variante als Verziehrig bout. D`Funktion vo dene Türm isch faszinierend u sehr eifach verständlich: D`Funktionswies basiert uf dr unterschiedliche Höchi vo Turmbode, respektive Turmspitze. D`Höhedifferenz erzügt e Druckunterschied zum Bode u we dr Wind düre Turmspitz blast denn entsteit düre Druckunterschied en Sog wo de die warmi Luft us em Gebäude use sugt. Dür das eintsteit en spürbare Temperaturunterschied! Faszinierend!!!! Dr ganzi Namittag simer i dere Alag umegstofflet u si chum amene gliiche Ort düre cho. U wies dr Zuefall het welle, isch de no grad Vollmond gsi u mir hei üs de dä Momänt nid welle la entgah u hei de no gwartet bis d`Sunne untergange isch. S`Resultat chöit ihr ja gseh:

Silveschter i dr Wüeschti

• Scho voreme Monet hei mir entschiede, das mir Silveschter i dr Wüeschti wärde verbringe. Da mir ja gwüsst hei, das mir de Corinne u de Marc z`Bsuech wärde ha. Scho d`Vorfreud isch gross gsi uf dä Usflug u mir si bigoscht nid enttüscht worde. S`Tagesprogramm het wie folgt glutet: - Pick up diheime 15.15h - Dune riding - Camael ride - Sand boarding - Magical Show - Disco Music - Smoking Shisha - Belly Dancer - Fireworks - 18.00h light Dinner - 21.30h main Dinner buffet - Drop off Time ( Heifahrt) 01.00h oder 02.00 oder 03.00h Pünktlich am 15.25h, si mir diheime abgholt worde miteme Land Cruiser u si de miteme satte 160kmh richtig Wüeschti gfrehset. Dadebie hei mir no e gratis Massage übercho, da die Jeep vom Sandfahre so arg strapaziert wärde, dass d`Stossdämpfer gröber liede. Bire Tankstell hei mir de no churz still ka, mi chas sich ja öppe dänke was die Gfährt e so a Moscht suufe u zudäm isch das dr Träffpunkt gsi vo drü wietere Fahrzeug. Nachdäm si mir de im Konvoi wider los donneret. Nüt für schlächti Närve. Nachere guete halb Stund hei mir de d`Outobahn verlah u wieter ischs Offroad. Nachere churze Fahrt Richtig Düne isch aber scho dr nächschti Halt gsi, Fotistopp. Wo mir de usem Outo gstiege si, isch üs de e chalti Brieze entgäge cho u mir si churzum fasch Sandgstrahlet worde. Mir hei scho s`erschtmal müesse die wärmer Jagge montiere. Natürlich het dä Halt ou no schüsch e Grund gha! D`Driver si beschäftiget gsi, d`Luft us de Pneu z`lah, u nume grad nach guet füf Minute isch dr Trip so richtig los gange. Ig ha ja das scho mal mitgmacht u für Tönel, Corinne u de Marc ischs erschtimal gsi. Es isch eifach Adrealin pur. Für mi isches jetze scho klar, das i das wieder wirde mache! Uf ei Art isches scho Idrücklich wie die dür de Sand oder besser über die Dünde kurve ohni das dr Chare kipet oder stecke bliebt. S`Gfüehl wome het chame öppe mitere Achtibahn verglieche. Das ganzi het so ca. e halbi Stund duuret u de si mir de im Camp acho. Hie hei de scho Camel uf e Ritt gwartet. Ritt isch zwar e chli übertriebe. Mi isch öppe 50m wiet gritte! Tönel u ig hei das de andere ¨überlah, da mir ja schomal gsi si. S`Wätter het leider nid ganz mitgschpielt. Es isch die ganzi Zyt bedeckt gsi u es het gluftet wie verruckt. Zudäm ischs de no rächt chalt gsi. Mir hei emal vorgsorget kha u hei sogar d`Faserpelz mitgnoh. Mir hei si de ou brucht! Mittlerwiele isches de scho gäge die halbisibni gange u mi het es liechts Hüngerli verschpürt. Guet hets de s`light Dinner gä. Nachdäm hei mir üs de gmüetlich niderglah imene Zält u hei üses erschte Cüpli gnosse. Zu üsem erstuhne hets würklich Alkohol gä. (Im normal Fall gits Alkohol nume i de Hotel). Aber was isch da scho normal!? Am 21.30h hets de s`Main Dinner gä. Das isch es Büttet gsi mit all jene typische arabische Gricht u derzue hets Fleisch vom Grill gä. S`Desserbüffet isch de aber nid sehr üppig usgfalle. Doch alles i allem isches sehr fein gsi. Nachdäm de alli Mäge voll u zfriede si gsi, hei Corinne u i gfunde, das es Verdouigs- Tänzli nid chönti schade und gesagt getan. Mir hei sogar no chönne üsi zwe Manne derzue überrede. Aber nid für lang u die zwöi heis sich wider is Zält zurgg zoge. De hei de Corinne u i die Glägeheit packt u hei üs o vom Tanzparkett verabschiedet u es Sandboard undere Arm klemmt u hei üs uf de Wäg gmacht die vorliegendi Düne z`bestiege. Mir si schön z`schwitze cho. Erschtens ischs Board schwär u zwöitens ischs enorm asträngend im Sand düruf z`loufe. Mi chunt fasch nid vom Fläck! Aber mir heis gschafft bis z`oberscht ufe u hei s`Board feschtgschnallt. Es isch mir scho chli Mulmig z`muet gsi, da i ja no nie ufeme Sand- rsp. Snowboard gstande bi. I ha mir de gseit: nüt amerke la, Ouge zue u furt. Muetig han i s`Board richtig Abhang gstellt en chliene Hupf vorwärts u scho isches los gange! U de no wie…..!!!! I bi chum vom Fläck cho. Gmüetlich ischs gange u so bin i de o heil unde acho. Das han i natürli nomal welle erläbe u has Board wieder undere Arm klemmt u ha mi nomal ufe Wäg gmacht z`deruf. Alles i allem isch da s`dritte mal gsi won i dette ufe bi. Mini Wädli hei sich langsam aber sicher bemerkbar gmacht. We das kei Muskelkater git! Für das letschte Mal hei Corinne u i de gfunde mir hocke beidi ufs Board u bezwinge Düne mit schlittle. O da ischs Tempo nid sehr schnäll gsi, aber es Erläbnis alleweil Nachdäm hei mir de wenigschtens nümme müesse frühre. Mir hei s`erscht u s`letscht mal gschwitzt a däm Abe! Churz drüberabe ischs de scho Zyt gsi Azstosse ufs Neui Jahr. Dr Höhepunkt isch de s`Fürwärch gsi. Z`vierte höch hei sie vo Hand am Hang vo dr Düne die Ragete los gla! Nüd isch e so ab wies wahrschienlich planet wär gsi. Ueberall u doch niene si die Ragete gfloge. Die einte wunderschön i Wüeschtestärnehimmel, die andere diräkt u ohni z`bremse i Düne! Mir hei üs gloubeni no nie so amüsiert währedeme Fürwärch. S`eigentliche Schlussbouquet isch am Afang cho u als Schluss hets no so paar Chlöpfer kha. Die si öppe im Abstand vo paar Minute immer wieder los gange u das über e Zyt vo sicher zäh Minute. Üs hets fasch putzt vor lache. Es isch halt scho o schön wieder emal so öppis z`gseh wo nid alles über Hightech louft! Nachdäm fulminante Fürwäch ischs de Zyt gsi abschied z`näh vo dr Wüeschti. Um rund 02.00h simer de wider diheime gsi u hei de no churz im Fernseh s`Neue Jahr i der Schwyz la iilüte. E so hei mir de zwöimal chönne ufs 2007 astosse!

Feschttäg!

Uf däm Wäg wünsche mir allne Verwandte u Fründe schöni u besinnlechi Wiehnachtszyt u viel Glück, Erfolg u Gsundheit fürs 2007!

Wüeschtechlous!

Letschte Sunntig het d`Schwyzerbotschaft iglade zure open air „Swiss Santa Claus Party“ im Hotel Hilton. S`Wätter het ou demna passt. I ha nämlich schön gfrohre. Es isch relativ chüehl u windig gsi. Guet hets zum Apéro scho e heisse Glüehwy gä. Zur Chlousparty kört natürli ou en Chlous u dä isch de tatsächlich ou cho, aber nid wie gwohnt ufeme Esel, ney ufeme Kamel. Das het würklich lustig usgseh. Nachdäm de alli Chind ihres Chloussäckli übercho ka hei, ischs de Zyt gsi für`s Nachtässe. Wie chönts anders si, für guet schwyzerisch, Raclette, Bratwürscht, Wienerli, Pommes frites etc. u es feins Desserbüffet hets gä u das alles imene Garte under Palme. Isch scho chli komisch! Gseht doch scho schön us,oder? O s`Servierpersonal het sich am Alass apasst! Tschüss du Wüeschtechlous bis zum nächschte Jahr!

Vorwiehnachtszyt i Abu Dhabi!

Wär z`Gfüehl het hie sigi nüt los i dr Adväntszyt dä tüscht sich!

Die letscht Wuche bin i vo dr Dütsche Schuel, respektiv vo dr Fräne, agfragt worde, ob i luscht hätti mitshälfe am Wiehnachtsbasar vo dr dütsche Schuel. I ha nid lang müesse überlegge u ha zuegseit, da i ja so züg schono gärn mache!

Hie bin i am irichte vom Stand vo üsne Gschteck wo mir paar Froue gmacht hei. Die si nid öppe künschtlich, nei mir hei ächts Tannechries gha, wo äxtra us Dütschland igfloge worde isch!

Nomal e Blick uf die sälber gmachte Gschteck

Am punk 17.00h isch Türöffnig gsi u d`Elke u i hei die erschti Stund zäme verchouft!

Hie hets feini sälber gmachti Waffle mit Zucker u Zimet ghä!

Uswärtegi wo e Stand gmietet hei si no voll beschäftiget mit iirichte

Blick uf die Veschiedene Ständ. Im ganze hets öppe zwölf Ständ kha.

Isch fasch nid gstellt die Foti!

Schaffe het de ou Hunger gä. Es het es riesigs Salatbüffet ghä, wohlverstande alli sälber gmacht vo Müettere vo de Chind us dr Dütsche Schuel. Würscht vom Grill u e sogenannte Leberkäse" ( Fleischchäs)

S`lange stah macht müed. D`Fräne u d`Nina gniesses z`höckle.

Nachdäm am 22.00h dr Alass z`änd gsi isch u me de no s`gröbschti ufgrumet het ka, si mir de no vo dr Elke und em Peter zumene Bier rsp. Ramazotti iglade worde. Alli si e chli müed gsi, aber froh u zfriede, dass dä ganzi Alass e so guet über Bühni gange isch!

Nationalfyrtig u Bsuech us der Schwyz!

Hüt am 02. Dezämber fyre die Arabische Emirat dr 35. Nationalfyrtig! Alli öffentliche Aemter si zue bis am 04. Dezämber u I allne Emirat wird usgiebig gfyret. Leider fallt das ganze Wort Wörtlich e chli is Wasser! Wo mir hüt am Morge ufgstande si hei mir nämlich nid schlächt gstuhned! Es het grägnet, u de no wie. Wo i de Tönel so gäge die 12.00h zum schaffe bracht ha hets wie üs chüble gosse! Uf dr Outobahn bin i de für einisch die Schnällschti gsi! Mi weiss halt scho nid wie fahre wes e chli Wasser uf dr Strass het, u was me macht we d`Outoschiebe inne alouft! Mi laht d`Schiebe abe u wird lieber nass oder haltet sogar a!Die wüsse halt nume wome Klimaalag a- u abschaltet! Vo Liecht mache wenns rägnet heis ou no nüd kört, mit laht eifacht d`Warnblinki loufe! Won i de Tönel am Flughafe usglade ha, bin i de heigfahre mitere gwüsse Aspannig, will mi het üs gseit, mi müessi sich gfasst mache, dass wes mal so richtig rägni d`Hüser nid sehr dicht sige! Also bin i de uf alles gfasst gsi zum heicho! Zu mim erstuhne, hets bis jetz nume a eire Wand es bitzeli Wasser inedrückt us Fänschter im Gästewc het nid verhebet! Glück kha! Aber eigentlich han i gar nid welle über das schriebe, sondern euch e paar Idrück gä über e Bsuech vo mim Brüetsch Reto u sinere Frou Petra u minere Mam. Sie si letscht Wuche für 5 Täg bi üs gsi u mir hei ihne doch einiges chönne zeige! Näbscht em Heritage, wo es Dörfli nahbout worde isch zum zeige wieme früecher hie gläbt het. Früecher heisst vor ca. 40Jahr!

und em Emirates Palace u

Goldsuck, isch sicher eine vo de Höhepünkt

dr Trip i d`Wüeschti gsi. Daderzue het "Duneriding", Camelriding, Nachtässe unter freiem Himmel kört. E paar Schnappschüss wetti euch nid enthalte!

Blick us em Jeep währendem Duneride!

Adrealin pur!

Nomal e Blick währender Fahrt

Schafft ers oder bliiebt er stecke?

Da hei mir en Halt igleit z`oberst üfere Düne fürs Fötele

Hie nomal

Üsi Kamel stöh scho parat!

Uff! Da muess sich Tönel aber guet häbe während s`Kamel ufsteit!

Es isch en mega Chrampf ufene Düne z`chragsle

Mit em Seili geits scho chli ringer dr Hoger düruf!

Gschafft! Da het me aber e super Ussicht uf de Sunneuntergang!

Leider hets e chli Wolke ka am Horizont

Nachtässe so richtig nach arabischem Styl

Nach em feine Ässe hei mirs de no mit Belly dancing versuecht!

Shisha ghört halt ou derzue! Sogar Mam hets probiert!

Das isch halt scho gmüetlich! Wär isch wär?