Aber alles dr Reihe nah. Agfange hets mit üsne Fründe, Michele u Mario, wo ändi Oktober afangs Novämber für ei Wuche zu üs cho si. Mit ihne si mir da Jahr i de Bootsferie gsi im Herbscht. Vo dette gits ja scho en Bricht. Mit ihne hei mir e gmüetlechi Wuche verbracht u „social life“ isch im Vordergrund gstande.
Nachdäm de Polizei itroffe isch u alli Uswies izoge gha het u dr Unfallhärgang nume in arabischer Sprach stattgfunde het, han ig mi de gwehrt u fründlich bätte drum änglisch z`rede! Mis Arabisch isch viel z`rudimentär für das ig nur en Huch hätti verstande was die alles z`verzelle gha hei! Aber mi het mi quasi links liege la u s`einzige wo sie mir de klipp und klar uf änglisch z`verstah gä hei isch: „Your fault“! Ig hebi d`Spur gwächslet u sig i die andere ihne tätscht. Was ja überhoupt nid gstumme het! Erscht zu däm Zytpunkt ischs mir de klar worde wieso: Die beide andere betroffene si arabisch Sprechendi gsi u dadevo isch eine Local gsi. Innerlich han ig kochet u ha probierts verhandle mit dr Polizei u ha uf Gerächtigkeit beharrt. I dr Zwüschezyt isch sicher scho über e Stund vergange gsi sits tätscht het u mir si immer no mitts i dr Stadt gstande. Polizei het immer no uf mini Schuldbekennig gwartet, um dr Rapport chönne uszfülle! Die andere zwöi hei d`Unfallstell bereits scho chönne verlah! Aber so schnäll han ig nid chli bi gä u drum hei mir de d`Monika, dr Thomas u ig uf Polizeistation in Khalidiya müesse. Dette si mir de früntlich empfange worde u mi het mir e Uebersetzere zue gha wo mir früntlich i churze Abständ immer nume eis gseit het: Your fault! . Immer u immer wieder han ig mini Version vom Unfall gschilderet u dene probiert klar z`mache dass das ganzi völlig unfair sigi so wies ize loufi! D`Antwort isch immer die gliechi gsi: your fault! Schlussäntlich het me üs eifach sitze gla u zuegwartet u diskutiert isch ou nümme worde! Zyt isch gloffe u gloffe u d`Sunne isch ou scho under gange. Das heisst, es si scho über vier Stund vergange sit em Unfall!
Während dere ganze Zyt han ig de ou no immer wieder mit Tönel telefoniert, will er het am Namittag müesse ga schaffe u hätti eigentlich s`Outo brucht u zudäm hets ihm gstunke, dass er nid het chönne verbie cho. Langsam aber sicher isch min Geduldsfade grisse u ig ha mi de erkundiget, was passieri wen ig mini Schuld nid anerchenni. Mi het mir klar z`verstah gä, dass si min Pass u Fahruswies konfisziere u s`denn en Grichtsfall drus gäbi! Das hätti für mi gheisse, i hätti während der Zyt s`Land nümme dörfe verlah! Isch für mi überhoupt nid i frag cho. Wär weiss scho wie lang das duuret hätti. Drum han ig de Zähneknirschend chlie bi gä u gseit si sölle dä Rapport usfülle! Mini Schuldbekennig wird nid öppe mit mire Unterschrift bestätigt, nei, nei , unterschriebe wird das ganzi nume vo dr Polizei! Schlussäntlich ischs mir ja um d`Gerächtigkeit gange u nid ume Schade wo entstande isch a de Outo. Denn dä isch bigoscht nid tragisch u zahlt wird’s ja eh vo dr Versicherig. Nachdäm de dr Rapport usgfüllt gsi isch, wohlverstande alles uf arabisch, het me mir de dr Fahruswies wieder usghändiget u mir hei nach über vier Stund s`Polizeigebäude chönne verlah!
Es grosses merci a d`Monika u Thomas wo a däm Tag mit mir usgharrt hei u mir moralisch zur Siete gstande si!
Ihri zwei Ferie-Wuche si z`Änd gange u ig ha grad knapp Zyt gha d`Wösch z`mache u scho isch dr nächschti Bsuech agseit gsi. Diesmal ischs en ex Arbeitskolleg vo Tönel gsi. Dr Paul Erni. Er isch de ei Wuche bliebe u isch letschte Samschtig wieder abgreist.
Komisch chunts eim fasch vor we s`Hus plötzlich wieder e so ruhig u leer isch. Doch kei Zyt für Langwieli, will Tönel het vier Täg frei über min Geburtstag u planet isch e Churztrip vo drü Täg nach Fujairah wo a dr Ostküschte vo dr UAE lieht. Am Sunntig hei mir de no s`Hotel buechet u am Mäntig gäge Mittag si mir losgfahre.
Ufgnoh während dr Hifahrt richtig Oste
Isch das nid dr chlie Brüeder vom Eiger?
Mi fahrt quer dür die kahli Bärglandschaft u plötzlich chunt me amene nigel nagel neu boute Dorf verbie! Für das het sogar müesse e Teil vom Bärg abtreit wärde! Es isch gloub eifach würklich nüd unmöglich i dr UAE
Churz vor dr Passhöchi en Strassetunnel. Dä isch e so guet Usbout, es chönnti bigoscht i dr Schwyz si!
Dr Strand vo dr Stadt Fujairah
S`Hotel Merien i dr nächi vo Dibba. Da hei mir zwöi, drü herrlechi Täg gnosse!
Blick vom Garte ufs Hotel
Da hei mir gwohnt u fein pfüserlet
Jööö die zwe Liegestüehl, völlig verlore uf dere grosse Terrasse
Isch doch en Troum die Ussicht. Im Hintergrund gseht me e chlieni Insle. Das isch z`Snoopy Island. Ideal zum Schnorchle u d`Unterwasserwält entdecke. Drum hei mir de am erschte Morge Schnorchelzüg gmietet u si um die ganzi Insle ume gschwumme. Mi het üs gseit mi sölli guet usschou halte uf Wasserschildkröte, doch leider hei mir kei Glück gha. Es isch üs keini übere Wäg gschwumme.
Schöni Bluemegschteck u Dattle hei nid dörfe fähle
Reläxe isch agseit gsi nach däm asträngende Schnorcheltag
Putzt u gschtrählt fürs Nachtässe, nume d`Schueh fähle no!
Blick vom nünte Stock uf d`Lounge im erschte Stock
Für d`Heifahrt het de Tönel no dr Offroadfüherer studiert u isch tatsächlich fündig worde. E tolli, spannendi Fahrt wo üs quer über Stock u Stei gfüehrt het. Agfange hets bi Punkt Nr. 13 bis Nr. 3 u dette si mir de wieder uf die normal Strass cho
Idrücklich die kahli Bärgwält
Da füehrt d`Strass oder besser die Holperpiste quer dür es Bachbett.
En Foto u Drinkhalt.
