Oktoberfäscht!

Oder äbe nid. Bis da Jahr het die Dütschi Schuel (DSAD) all Jahr es Oktoberfäscht organisiert wo under dr Firmherrschaft vo dr dütsche Schuel gloffe isch. Das hets brucht für das me Bier het dörfe usschänke. Was ja logischerwies nid het dörfe fähle für es Oktoberfäscht. Mittlerwiele het sich aber einiges gänderet a dr Schuel u je lenger je meh wärde Chind vo Iheimische igschuelet u nätürli ou iglade a alli Schuelaläss. Das git de gwüssi Konflikt mit em Alkoholusschank! Drum het de s`Feschtkommite mit dr Schuelleitig entschiede, anstatt es Oktoberfäscht en Brunch z`organisiere, was leider bi gwüssne Eltere afangs nid sehr guet acho isch! Aber nid desto trotz het me sich für e Brunch entschiede u as organisiere gmacht. Fürs Feschtkommite (FK)ischs en grosse Ufwand gsi dä Brunch für guet 300 Lüt uf Bei z`stelle. Näbscht em FK hei d`Eltere vo allne Schüeler tatchräftig müesse mithälfe. Wie zum Biespiel: ei Schuelklass hets Brot müesse bsorge, die Andere si für e Chäs zueständig gsi undsowieter undsofort. Das alles het müesse koordiniert wärde u i dere Zyt bin ig immer no i dr Schwyz gsi u bi dür das nid sehr e grossi Hilf gsi. S`Einzige won ig de no im Vorfäld ha müesse mache isch Joghurt poschte u am Abe vorem Brunch 20 hert gsottni Eier choche! Was für mini Chochkünsch scho fasch e Herusforderig isch! Satti zäh Prozänt hets mir verjagt. Ob das viel oder wenig isch, das überlahni euch! Was natürlich ou het müesse si, isch am Tag vorhär alles vorbereite i dr Schuel, so wie Büffet zäme stelle mit de Schüelerpult u verrusse Tisch u Bänk schön härrichte.

Kunschtlehrere het mit de Schüeler sogar no farbeprächtegi Drache baschtlet u die hei mer de übers ganze Areal id Bäum ghänkt. Uuu härzig hets usgseh!

Am Tag druf hei mir üs de vom Feschtkommite am 09.00h wieder troffe um die ganze Ässware schön härzrichte u ab em 10.00h isch de dr Brunch eröffnet worde. Fürs Oug und für e Mage si die Büffet e Ougeweid gsi u ig bhoupte, dass dä Alass en guete Ersatz isch fürs Oktoberfäscht!