Federer live beim " Dubai Open"

"THE DUBAI DUTY FREE MEN`S OPEN"

Blick ufe Center-Court am Namitag

Ehrig vom Federer churz vor Spielbeginn

Zur sone Ehrig darf dr Chueche ou nid fähle!

D`Räng fülle sich langsam aber sicher

Blick uf d`VIP Tribüne

Federer ( SUI) : Pless ( DEN)

Da wird d`Münze gworfe für d`Platzwahl u Ufschlag

Roger in "action"

Franziska, Dide und Peter fiebern mit!

Pless bim Ufschlag! D`Roger het so sini Müeh gha si abznäh!

Kommentatorekabine

Federer bim Ufschlag

Sieg für Federer! 7:6 / 3: 6 / 6 : 3

Rogers Fründin Mirka.

Federer nach em Match bim Interview

Gmüetlich no en Kafi i eim vo dene härzige Beizli vor dr Heifahrt

999

Das isch dr Polizeinotruf u hie gilt, Polizei dein Freund und Helfer! I weiss no guet wo üs dr Dide gseit het, mir sölli die Nummer grad spiechere, die sigi üsserscht wichtig. U das isch i dr Tat es so. Weme en Unfall het egal weler Art, bruchts en Polizeirapport. Ohni das Papier flickt eim e Garage s`Outo nid!

Ja, ja, ihr wärdets ahne! Wie chönts anders si, i bi wieder emal die wo die erschti Bühle gmacht het a üsem Outo! Leider han i ou no grad es Anders e bitzeli abgänderet! Es isch würklich dumm gange. Letschte Donnschtig nach em arabisch ischs passiert. I bi rückwärts usem Parkplatz gfahre, leider ischs dete nid sehr übersichtlich, luege ob öpper z`fahre chunt, gseh nüd u fahre use u i däm Momänt chund eine wie gschtört derhär z`kurve u mir isch nüd anders übrig bliebe als ufs Gas z`drücke u zügig usem Wäg zgah. U scho hez klepft! Nid mit däm wo cho isch, nei hinder mier isch no es Outo parkiert gsi u dä han i de locker tüpft. Dr Ander isch de mit horne u liechthüpele a mier verbie zischt. Und ward nicht mehr gesehen. I bi dr Momänt scho chli verchlüpft aber bi de usgstiege zum luege was es gmacht het. Zum Glück hets bim andere nume s`Liecht gno u bi mir a dr Verschalig vom Resärverad hets e Riss gä! Also nüd wieter schlimms. Aber was mach i jetze, han i mi de gfragt. Ha mis Handy packt u dr Polizei probiert azlüte. Doch wie chönts anders si, dr Akku vom Handy isch lär gsi. Super was nun? I bi der zrugg is Gebäude won i arabisch ha, will dete hets e Security u ha gfragt ob sie für mi chönnte dr Polizei alüte. Aber scho nume bis die guete Manne begriffe hei das mis Handy lähr isch, hets es Wieli duuret, verschwiege de bis sie begriffe hei wieso i Polizei bruche. Nach langem hin und här hei sie mir de ihres Telifon gä u i ha d`Nummere 999 gwählt. Es het nid mängisch glütet u am andere Aendi hets tönt: „ Marhaba“ (offizielli begrüsse uf arabisch). I ha früntlich Grüezi gseit u probiert min Fall z`erkläre. Bi leider nid wiet cho will i glii gmerkt ha, da wird nur arabisch gredt u d`Leitig isch relativ schnäll wieder tod gsi, will die gueti Person gloub nid het gwüsst wie Verbinde! Das darf doch nid wahr si, han i dänkt u grad nomal gwählt. Das glieche Spieli nomal. Zum Glück hei de die zwe Herre vo dr Security mir doch no gholfe, u s`Telifon übernoh u dr Polizei uf arabisch erklärt was passiert isch u wohi dass si müesse cho. Bi schono froh gsi. Mir isch de nüt anders übrig bliebe als z`warte. Doch zu mir Ueberraschig isch nach guet zäh Minute e Töff vorgfahre wo "Police" druffe gstande isch. Nume het dä gueti Polizischt halt ou nume schlächt wa rächt Aenglisch gred u i ha mit händ u Füess pobiert z`erkläre was passiert isch. Dernah het är de die Outo beguetachtet, het e paar Mal mit sim Walkie Talkie gfunket u mir de erklärt, dass mir ize müesse ufe Bsitzer vom Outo won i tüpft ha warte, u het gmeit, dä sötti i zäh Minute ufem Platz si. Bi scho chli überrascht gsi, wie schnäll dass sie dä usfindig gmacht hei.Was wär ächt gsi, wenns die Person nid usfindig gamcht hätte? Würdemer ächt jetze no dette stah! I der Zwüschezyt ha ig de ihm mini Papier müesse ushändige u er het de dr Wiele s`Protokoll ufgnoh. Wie chönts anders si, alles uf arabisch! Aber eis muess i säge, er isch meh als nume fründlich gsi mit mir. Er het sich alli Müeh gnoh um e chli chönne z`rede mit mir. U sogar e Zigarette het er mir abotte. Aber am meischte dr Plousch het er gloub kha, won ig ihm mini Telefonnummere uf arabisch han chönne gä. E si de e chli längi zäh Minute worde, aber tatsächlich, plötzlich steit e Herr vor üs u het sich entschuldiget für d`Verspätig u früntlich vorgstellt. Ui ui ui bin i froh gsi, es isch en Engländer gsi. Er het die Sach relativ locker gno u mir als erschts emal merci gseit! Ja genau merci gseit, will hie isch tatsächlich nid Norm das me wäge sore Bagatelle d`Polizei rüeft. Parkschäde si hie alltäglich u mi tuet eifach nüd derglieche u fahrt ab. Da muess de jede sälber luege wien er zumene Polizeirapport chunt zum sis Outo la z`flicke! Er het mir de erchlärt, dass das gar nid sis Outo sigi, sondern amane Kolleg, will er hebi sis grad erscht Itätscht! Nachdäm de alli Agabe vo ihm ou no ufgnoh worde si, hei mir de je es Protokoll i d`Finger drückt übercho u dr Polizischt het sich churz verabschiedet u wäg isch er gsi. Genau so dr Engländer. I ha de als erschts mal uf d`Uhr gluegt u ha müesse feschtstelle, dass das ganzi gschlagni zwe Stund duuret het! Bevor ig aber ize s`Outo cha la flicke la, muess ig zersch no innerhalb ere Wuche bi dr Versicherig verbie u vo dene sötti de e Bestätigung übercho! Hie isch halt alles e chli Komplizierter u Zyt brucht me grad ono! Doch über Alles gseh, bin ig froh isch ja nid meh passiert u 999 isch sicher die Nummere für alli Fäll!

Alif, baa, taa......yaa!

Wie i scho imene vorgängige Bricht gschriebe ha, bin i fliessig am arabisch lehre und das siet afangs Oktober 06. Ueber Wiehnachte u Neujahr hei mir de e lengeri Pouse gmacht u will mir de no grad i d`Ferie si im Januar, isch de dr Kurs no später agloffe. Es het de ono grad e chli gmingeret a Teilnähmer. D`Vietmanesin isch scho letscht Jahr usgstieg wäge Schwangerschaft u Geburt vo ihrer Tochter Zara u ize hei mir üs grad no vo dr Malaysiere verabschiedet. Wie chönts anders si, ou sie erwartet es Chind u reist i ihres Heimatland bis nach der Geburt. Da verbliebe no drü Ladies wo wieter mache mit em Kurs. Ei Kanadiere u zwöi Schwyzerinne. Nachdäm mir de so gschrumpft si, hei mir üs de entschiede u geiniget, das mir üses Pensum ä chli reduziere u das vo drü uf zwöimal pro Wuche. Üsi Lehrere Rhoda isch o sofort ieverstande gsi demit. So träffe mir üs ize meischtens am Sunntig- u Donnschtigmorge am 10.00h für anderhalb Stund, chöi aber flexiebel d`Stunde schiebe. E so ischs ou die Wuche gsi u hei geschter am Zieschtig anstatt Sunntig Kurs gha. Wieso schrieb i das alles? Ganz eifach, mir hei en Erfolg chönne verbueche! Mir hei dr letschti Buechstabe " yaa" vom arabische ABC glehrt. Das isch schono es guets Gfüehl. I sötti ize sowiet si das i alles cha läse. Das heisst aber no lang nid das is o verstah, will ize fahts erscht richtig a! Es erinneret mi a mini Schuelzyt won i Tag für Tag ha müesse Wörtli büffle! Dr gross Unterschied zu denn isch, es isch keis " Muss" aber defür bruchts e chli lenger bis mes im Chopf het, drum isch s`tägliche Arabisch lehre unumgänglich süsch isch dr Zug gli abgfahre u mi verpasst dr Aschluss! Aber solang i no so Spass ha dra, ischs ou keis Problem u drum han i de geschter am Abe für mi allei, zfriede (wie chönnts anders sie, Tönel schaffet) dä chlieni Erfolg vom ABC gfieret u ha mir de es feins Glas Wy gönnt! Ihr chöit beruhigt si,es wird no es Wieli duure bis ihr dr erschti Bricht in arabisch chöit läse!!!!!

Two ladies in Abu Dhabi!

Wie die Zyt doch vergeit! Grad erscht no hei mir im „Incanto“ z`Büli drüber diskutiert, wenns ächt die beschti Zyt wär üs cho z`bsueche. D`Red isch vo dr Gisela und em Gerti. U geschter sie die beide nachere Wuche Bsuech bi üs scho wieder abgreist. Aber jetze alles vo Afang a: Am samschtig vore Wuche isch abgmacht gsi, dass sie üs es SMS schicke wenn sie uf em Flug sige, da sie es Stanbye Ticket ka hei, isch das no nid sicher gsi, dass sis ufe Flug schaffe. Mir hei am Tag vorhär no dr ETIHAD aglütet u die hei üs gseit, dr Flug sigi usbuecht. Dernah han i de no churz dr Gisela aglütet zum ihre das z`säge. I bi sicher die zwöi sie mitere gwüsse Spannig im Buch mit em Zug nach Gänf gfahre am Samschtig morge früeh. I ha de gspannt ufes SMS gwartet u gwartet u gwartet. Immer wieder han i uf d`Uhr gluegt u ha dänkt, gopf ize sött i de öppe mal öppis khöre, will es isch mittlerwiele scho fasch Abflugszyt gsi. I has de nümme länger usghalte u ha de churzum dr Gisela ufs Handy aglütet. Sie nimmt prompt ab u seit ganz liesli is Telifon:“ Mir sitze, muess s`Telifon abstelle!“ Mis Härzli het grad e chli schneller gschlage u d`Freud isch gross gsi die zwöi am Abe ga abzhole! Pünktlich sisi glandet u mit eme riese Juhee hei mir üs begrüesst! Sie hei de gmeint ob mir ihri SMS nid übercho hebe churz vor Abflug. Mir si de völlig erstuhnt gsi, dass mir nüd übercho hei. Wo mir de diheime gsi si, hei mir de üs gägesietig SMS gschickt zum luege wos chlemmt und zu üsem erstuhne, üsi SMS, die wo Tönel u i gschickt hei si immer acho aber ihri nid. Dere Sach hei mir de welle ufe Grund ga u hei all jenes usprobiert u zum Schluss hei mir müesse feststelle, dass mir kei SMS meh chöi empfah wo über d`Swisscom gsändet wärde. Sunrise geit ohni Problem Mir hei aber no kei Erklärig wieso nid! Nachdäm hei mir de gmüetlich no es Fläschli Wy zäme gnosse u ufs Wiederseh agstosse! U wies eso ghört für drü Froue no e chli dr nöischti Tratsch ustuscht! Ahand vo de folgende Föteli gsehtme gloub wie guet mirs zäme kha hei. I ha versuecht ihne beide Abu Dhabi e chli Schmackhaft zmache, ha sie a verschiedeni Orte usgfüehrt.

Zudäm hets ou no glängt für e Tagesusflug nach Dubai an Goldsouk u is Hotel Madina Jumairah.

Aber eine vo de Höhepünkt isch sicher dr Wüeschtetrip gsi! Da isch sogar Tönel mit üs drü Wieber mitcho.

Da mir alli begeischteret gsi si vom Dünetrip, hani i d`Idee gha, für e extra Tour z`Frage. Dank däm i scho fasch e Stammchund bi bide Cyclontours u dr Chef kenne, het er spontan zugseit u für üs drü tatsächlich gratis e Zusatz -Tour gmacht. Mir hei bi ihm im Jeep chönne platz näh u es isch los gange. Er isch mid üs dür die Düne gfrehset u het churz sis Könne zeigt.I weiss nid wie langs duret het,, aber eis isch sicher, für Tönel häts keini füf Minute länger möge liede u er hätti d`Chotztüte gfüllt. Nach dere mega Dünefahrt, wo mir de wieder im Camp acho si, u mir usem Jeep gstige si, hei mir de scho dr erschti Sand im Gsicht gspürt. Es het gwindet wie verruckt. Das het de vor allem s`Gerti mit ihrne Kontaktlinse z`gspühre übercho! Aber ou üsi Digitalkameras hei de bim Sunneuntergang knipse promt ouno dr Geist ufgäh. Die sie im wahrschte Sinn sandgtrahlet worde. Da isch plötzlich nümme gange. I ha mini nümme chönne alah u s`Gerti ihri nümme abstelle. E so isch de grad fertig gsi mit fötele! Aber das het üsi guet Stimmig nid beiflusst. Nachdäm mir üs de verchöschtiget hei am arabische Buffet, hei mir de zum Abschluss no gnüsslich e Shisha groucht unterem Stärnehimmel.. Die isch de hingäge dr Gisela e chli i falschi Hals cho. Am andere Morge het sie chum me chönne rede u sie het churzum um`Epplers „Chügeliapothek“ gfragt. Ou s`Kulinarische isch die ganz Wuche nid z`churz cho.Das het de e chli Spure hinderla! D`Jeans sitze doch e chli satter als äscho!

Mir sie jede Abe, usser dr Letschti, usswärts ga ässe. Defür hei mir de gmüetlich jede Morge verrusse , wie chönts anders si, bi schönem Wätter, z`Morge gässe.

Näbsch däm Programm hets aber ou no immer glängt für mal no e chli am Pool ga z`riläxe oder besser zum es Pfüsi riesse. Gäll Gisela es träumt sich guet im Liegestuehl!

Wie im Flug isch die Wuche verbii gange u scho bin i mit dene beide wieder im Outo ghocket richtig Flughafe. Ohni Problem hei si e Platz übercho u scho hei mir üs mit füechte Ouge wieder tschüss gseit!

D`Fortsetzig!

Churz zu mir Schueh Story. I ha ufem letschte Zagge no es paar gfunde. Zwar nid ganz das wo i mir vorgstellt ha, aber besser als nüd!Bi ja froh ha i nid Blutfuess müesse ga. Somit isch mis Teunü komplett gsi für üse erschti Ball in Abu Dhabi. Bi scho chli gsannt gsi uf dä Abe. Am viertel vor siebni hei mit üs troffe mit dr Franziska zum abfahre. Ihr gseht, irgend eine vo üsne Manne isch nie derbii. Damal hets dr Dide tüpft. Er het sich müesse mit Vorschlafe begnüege für de Nachtflug nach Mumbay. Mir hei üs de fein usepützlet ufe Wäg gmacht Richtig „ Crown Plaza Hotel“. Dä Alass isch ganz unterem Motto Valentinstag gloffe. Als Begrüessig hei alli Dame scho e dunkelroti Rose i d`Hand drückt übercho u als welcome Drink hets es feins Cüpli mit Orangesaft gä. Dr ganzi Saal isch, wie chönts anders si, in rot u wyss dekoriet gsi. Im ganze hets so gäge die hundertvierzg Gescht ka. Üsi Mäge hei scho knurret vor Hunger bevor mir dette si gsi, drum si mir de froh gsi, het me üs ufgforderet am zueteilte Tisch platz z`näh. Als erschts hei mir üs de churz mit üsne Tischnachbare bekannt gmacht u das isch u spannend gsi. Norwege, Schwede, Südafrika u Schwyz si verträtte gsi. Dadervo siz wöi Coaches gsi vom Hockey Klub. So het me sofort es Gsprächsthema ka! Mir si de natürli ou ufe Tim z`spräche cho, u dr einti het sogar gmeit, dr Tim sigi wahrschinlich dr beschti Spieler wosi heige im Klub. Um Klub kasse no chli meh chönne ufzbessere hets de ou no drü verschiedeni Lotterie gä u die junge Hockey-Spieler hei versuecht ihri Los a Maa/Frou z`bringe. Das hei mir üs ou nid la entgah hei aber nume ei sorte Lösli verwütscht z`choufe. Näbsch däm hets no schüsch zwe Wettbewerbe gä wome het chönne mitmache. Bevors aber zur Verlosig vo all dene viele Priese gange isch, hei mir de e feins füfgänger Menue gnosse! Währendem Dessert isch de d`Spannig gtiege, das zu de Verslosig vo allne gsponserete Priese gange isch. Mi het im eiltempo Nummere um Nummere zoge u ufgrüeft. Uebrall im Saal hets gjublet we wieder öpper gwunne het nume a üsem Tisch isch toti Hose gsi. Die ganzi Sach isch langsam am Änd zu gange wo de no d`Nummere 0139421 ufgrüeft worde isch. U oh Wunder, mir hei ouno chönne Juble! Dr Pries isch e Fläsche Champagner mit Snacks für vier Persone Novotel. Leider ischs de das scho gsi wo üse Tisch gwunne het! Nachdäm het de no e Gant stattgfunde. Verschiedeni Bilder si undere Hammer cho. Gfüehrt isch die Gant vomene Reporter vom Radio two vo Dubai gsi. Dä het das mitere Liechtigkeit gmacht u het d` Lüt ufene luschtegi u gueti Art zum biete animiert. Die Bilder si bis über tuusig Dirham über Tisch gange! Klubkasse wirds freue! Zum Abschluss vo däm Abe hei mir de no chönne s`Tanzbei schwinge zu Discomusic üsem Alter entsprächend. Da hetme eifach müesse tanze. Für üs isch de so gäge die morge am eis Schluss gsi. S`Fazit vo däm Abe: Das chöntme wieder emal mache!

Länge Rock u kei Schueh!

Morn Frytigabe findet en Ball vo de "Abu Dhabi Falcons Ice Hockey Club" statt um wieder e chli Gäld i Klubkasse z`übercho. Da ja dr Tim Mitglied isch, u mir ihn scho i dr Schwyz immer für de Sponsorelouf vom EHC Bülach gsponsered hei, hei mir üs entschiede ou a däm Alass teilznäh. Sitdäm Momänt a wo mir üs entschiede hei a däm Abig debi zi, han ig scho s`erschtimal Buchweh gha! Ihr wärdet euch frage wieso wohl? Ganz eifach – es ghört sech hie es so, das me a so es Dinner „ Läng“ treit! Wer mi kennt, weiss was das für mi bedüdet! Mini Begeischterig het sich de drum i Gränze ghalte! I wo nie oder sälte e Rock träge! Da heis Manne hingäge wieder emal eifacher. Schale u Grawatte u scho sis perfekt agleit! Es isch mir de nüd anders übrig bliebe als uf und uf d`Suechi vomene passende Chleid! I bi überzügt gsi, das wird es schwierigs Unterfange. Tönel u i si letschte Mäntig, bevor är wieder emal nach New York gfloge isch, no uswärts ga ässe u wies dr Zuefall het welle, isch das Restorant ou grad bi dr „ Abu Dhabi Mall gsi.Das isch eis vo de gröschte Ichoufscenter in Abu Dhabi. I ha de drum grad no d`Idee gha mir chönti nachem Aesse diräkt no uf d`Suechi nacheme Chleid, Tönel isch zwar nid sehr begeischteret gsi, aber isch schlussäntlich entschlussfreudig mit mir vo eim Lade i ander gstoche. Und oh Wunder, churz vor Ladeschluss, am z`nacht am zähni bini sogar no fündig worde. E Jüp u Bluse imene richtig arabische Styl. Es isch ersch no es Schnäppli gsi, will uf allem hets füfzg Prozänt gä. Mir isch e richtige Stei vom Härz keit. Will es fähle mir ja nume no d`Schueh. Aber, a dene riesseni mir fasch, zu mir Ueberraschig, Zähn us. Es gfinde sich eifach e keini! Es isch fasch zum derfoh loufe. Jedes Mal wen i wieder emal es Paar gsiech, hets natürli mini grössi nid u alli andere si so richtegi Beibrächer Schueh! Damit meine i natürli „High heels“. Das isch definitiv nüd für mi. Mittlerwiele kenneni sicher scho fasch alli Schuehläde ufem Platz u mini Geduld isch de o öppe z`end. Jä nu was sölls i ha ja no viel Zyt, i bruche sie ja erscht morn am Abe! Also ab uf d`Suechi u d`Fortsetzig folgt…….

Formel1 in Abu Dhabi!

Mi hets i vielne Zietige bereits chönne läse: D` Formel 1 chunt nach Abu Dhabi im 2009. Zu däm Alass het hüt am Samstig 3. Februar es Formel 1 Promotion Festival stattgfunde u für dä Alass het me, wie chönts anders sie, usem volle gschöpft. Es cha nid gnue choschte! Churzerhand het me drü Rennställ. BMW Sauber, Renault,Toyota u Ferrari verpflichtet. Folgendi Fahrer si vor Ort gsi: Wältmeister Alonso,u d`Ferrari Krecks Raikkönen und Massa sowie dr Schuemacher. Näbsch dene isch rundum alles Verträtte gsi was Rang u Name het im Formel 1 Zirkus. Nach Programm hätti das ganzi Spektakel am 09.00h müesse afah. Das het für mi gheisse, früeh us de Fädere um no en Parkplatz z`gfinde wo nid all zu wiet wäg lieht.

Da hei mir no nid müesse ume Platz kämpfe!

"Stimmung!"

Punkt 07.30h si dr Tim und i losgfahre Richtig Stadt. Mir si überrascht gsi, dass es nid viel Verchehr kha het. Mir hei de no mit üsne Dütsche Kollege abgmacht u si de vo ihne wäg mit eim Outo gfahre. Ohni Problem hei mir en Parkplatz unmittelbar i der Nechi vom Rundkurs bim Hotel Emirates Palace gfunde. S`Programm het wie folgt glutet: Zersch Ueberflüg vo Militärjets u dernah e Parade vo der UAE Nationalmannschaft, will die grad dr prestiesch trächtig Cup vo der arabische Staate s`erschti Mal gwunne hei. Nach däm si de die Formel 1 Bolide a dr Reihe gsi u zum Schluss isch no en tüfe Ueberflug vomene Airbus vo dr ETIHAD agseit gsi.

D`Fuessballnationalmannschaft vo UAE

Mir si natürli viel z`früeh dette an Ort u Stell gsi. Ab de nüne hei mir de üsi guete Plätz mit viel Ellbögle u Isatz verteidigt. Es isch de aber 10.00h worde, 11.00h worde u mir hei d`Fuessballer u Jets fäng gseh u hei wieter um üsi Plätz kämpft, will es si de immer wie meh lüt cho. 11.10h ischs de los gange u die erschte Bolide si a üs verbii donneret u jederma/frou het sini Kamera zückt! O i ha natürli versuecht es tolls Föteli d`schiesse. Isch mir leider nid Glückt, will i bi schlicht z`langsam gsi u es het immer wusch gmacht u verbiie sis gsi! S`Resultat gsehter ja uf de Fotene! Froh bin i de ono gsi, dass me Ohropax verteilt het, will die mache e u huere Lärme u i wett nid wüsse vieviel Dezibel das si. Mir hei de o nid bis am Schluss chönne däm Zirkus zuluege, da mir uf die eis Bsuech erwartert hei. E so hei mir de dr Ueberflug vo dr ETIHAD verpasst. Aber eis isch sicher, we mir im 2009 no in Abu Dhabi si, wird i derbii si!

Alli awäsende Formel 1 Fahrer

Mi het alles uf Grosslinwänd übertreit. Hie grad dr Bernie Ecclestone im Interview

S`einzige Fahrzüg won i ganz verwütscht ha!

Bi de letschte drü Föteli hets wie gseit wusch gmacht u verbii sis gsi u es het grad no knapp fürs Heck oder d`Front glängt

Lang nüd ud de liiide!

Die letscht Wuche han is wieder emal gröber übertribe! Sit mir ja hie si han i nümme viel a Sport gmacht.Doch Dank üsem Nachbar Dide, bin i wieder uf e Gschmack cho vom Tennisspiele! Tönel u i hei üs de churzum mit em nötige Material usgrüschtet u hei zäme langsam wieder agfange spiele. Mir hei glii gmerkt dass aller Anfang schwär isch. Aber nid desto trotz hei mir iisig wieter spielt, so dass mir hüt gäbig zäme es Stündli chöi spiele. Klar, mal besser mal weniger. Die letscht Wuche, Tönel isch wieder emal z`New York gsi, han i de Dide gfragt ob er eventuell ou mal mit mir chiemti cho spiele. Er het nid lang überleit u spontan ja gseit. Er spielt, wie chas anders sie, wälte besser als i. Grad am gliiche Tag hei mir de no zäme gspielt. I ha u de Plousch ka, obwohl er mi wie es Ping Pong Bälleli uf em Platz ume ghetzt het. IMmuess aber fairer wies ou säge er het mir Bäll o viel schön zugspielt. Am andere Morge het mi de de Hafer packt, u ha am Morge scho mit Fitness agfange. I ha füf kilometer ufem Loufband gmacht u dernah bin i de no grad ga Schwümme im Pool u s`Tüpfli ufem i isch de no Tennis am Abe gsi mit em Dide. Er het mi natürlich wieder vo eire Egge i die anderi la loufe u wien i bi, min Ehrgiez gits halt nid zue u ha versuecht jede Ball z`tüpfe. Näbscht däm er no e sehr e guete Motivator isch u mi immer no agführet het: „So chum Andrea dä hesch“. Nach übere Stund spiele bin i im wahrsten Sinne „Nudelfertig“ gsi! I has de halt ou müesse büesse. Am Abe scho han i nümme chönne loufe u i wär am liebschte kei Stäge me gloffe. I de folgende Täg han i de min Muskelkater uskuriert! Aber äbe: Lang, lang nüd u de grad alles a eim Tag das cha ja nid guet cho!

"Madinat Jumeirah"

Am Mittwuch, vorigi Wuche, dr letschti Ferietag vo dr Corinne u Marc, hei mir de no en Usflug nach Dubai gmacht. S`Ziel isch s`Hotel Madinat Jumeirah gsi. Was übersetzt „ Stadt von Jumeirah“ heisst. Das isch im Momänt „das Hotel“ wo zu de meischtbsuechte Ziel vo Touris (Tourischte) u Gschäftslüt i Dubai ghört!

Es lieht diräkt näbem Weltbekannte Burj al arab am Jumeirah Beach, isch aber en völlig andere Boustil. Mi seit es sigi „ d`Stadt i dr Stadt“. Das ganzi isch als Lagunestadt, originalgetreu im Stil vo arabische Paläst mit de tüpische Windtürm nahbout worde. Die ganzi Alag isch a vo 3,7km länge Wasserwäg umgä u über die erreicht me mit em „Abra“ ( Wassertaxi) d`Hotelzimmer. Im Madinat sälber gits en original getreuie, nahboute Souk ( Märt) mit 75 chliene Läde. Hie chame usschliesslich Antiquitäte, Kunsthandwärch u orientaleschi Läbesmittel choufe. Näbedäm gits 45 Beize, Theater, Konferenzzentrum.

Madinat Resort isch uf drü Hotel verteilt: Ds „Al Qasr“ (der Palast) das isch öppe s`Härzstück vom ganze Resort. Es isch e Rekonstruktion vore Summerresidänz vom Scheich vo Duai. De isch no s“ Mina al Salam“ u s „Dar al Masyaf“. Die si beidi im arabische Stil mit de tüpische Windtürm bout. Was si Windtürm wärdet ihr euch frage! Hie e churzi Erklärig derzue: Windturm heisst uf arabisch, respektive persisch „ Badgir“ u chunt vom traditionelle persische Architekturstil, wo für d`Belüftig vo Hüser gnützt worde isch. Die wärde hüt no viel i verschiedene Variante als Verziehrig bout. D`Funktion vo dene Türm isch faszinierend u sehr eifach verständlich: D`Funktionswies basiert uf dr unterschiedliche Höchi vo Turmbode, respektive Turmspitze. D`Höhedifferenz erzügt e Druckunterschied zum Bode u we dr Wind düre Turmspitz blast denn entsteit düre Druckunterschied en Sog wo de die warmi Luft us em Gebäude use sugt. Dür das eintsteit en spürbare Temperaturunterschied! Faszinierend!!!! Dr ganzi Namittag simer i dere Alag umegstofflet u si chum amene gliiche Ort düre cho. U wies dr Zuefall het welle, isch de no grad Vollmond gsi u mir hei üs de dä Momänt nid welle la entgah u hei de no gwartet bis d`Sunne untergange isch. S`Resultat chöit ihr ja gseh:

Silveschter i dr Wüeschti

• Scho voreme Monet hei mir entschiede, das mir Silveschter i dr Wüeschti wärde verbringe. Da mir ja gwüsst hei, das mir de Corinne u de Marc z`Bsuech wärde ha. Scho d`Vorfreud isch gross gsi uf dä Usflug u mir si bigoscht nid enttüscht worde. S`Tagesprogramm het wie folgt glutet: - Pick up diheime 15.15h - Dune riding - Camael ride - Sand boarding - Magical Show - Disco Music - Smoking Shisha - Belly Dancer - Fireworks - 18.00h light Dinner - 21.30h main Dinner buffet - Drop off Time ( Heifahrt) 01.00h oder 02.00 oder 03.00h Pünktlich am 15.25h, si mir diheime abgholt worde miteme Land Cruiser u si de miteme satte 160kmh richtig Wüeschti gfrehset. Dadebie hei mir no e gratis Massage übercho, da die Jeep vom Sandfahre so arg strapaziert wärde, dass d`Stossdämpfer gröber liede. Bire Tankstell hei mir de no churz still ka, mi chas sich ja öppe dänke was die Gfährt e so a Moscht suufe u zudäm isch das dr Träffpunkt gsi vo drü wietere Fahrzeug. Nachdäm si mir de im Konvoi wider los donneret. Nüt für schlächti Närve. Nachere guete halb Stund hei mir de d`Outobahn verlah u wieter ischs Offroad. Nachere churze Fahrt Richtig Düne isch aber scho dr nächschti Halt gsi, Fotistopp. Wo mir de usem Outo gstiege si, isch üs de e chalti Brieze entgäge cho u mir si churzum fasch Sandgstrahlet worde. Mir hei scho s`erschtmal müesse die wärmer Jagge montiere. Natürlich het dä Halt ou no schüsch e Grund gha! D`Driver si beschäftiget gsi, d`Luft us de Pneu z`lah, u nume grad nach guet füf Minute isch dr Trip so richtig los gange. Ig ha ja das scho mal mitgmacht u für Tönel, Corinne u de Marc ischs erschtimal gsi. Es isch eifach Adrealin pur. Für mi isches jetze scho klar, das i das wieder wirde mache! Uf ei Art isches scho Idrücklich wie die dür de Sand oder besser über die Dünde kurve ohni das dr Chare kipet oder stecke bliebt. S`Gfüehl wome het chame öppe mitere Achtibahn verglieche. Das ganzi het so ca. e halbi Stund duuret u de si mir de im Camp acho. Hie hei de scho Camel uf e Ritt gwartet. Ritt isch zwar e chli übertriebe. Mi isch öppe 50m wiet gritte! Tönel u ig hei das de andere ¨überlah, da mir ja schomal gsi si. S`Wätter het leider nid ganz mitgschpielt. Es isch die ganzi Zyt bedeckt gsi u es het gluftet wie verruckt. Zudäm ischs de no rächt chalt gsi. Mir hei emal vorgsorget kha u hei sogar d`Faserpelz mitgnoh. Mir hei si de ou brucht! Mittlerwiele isches de scho gäge die halbisibni gange u mi het es liechts Hüngerli verschpürt. Guet hets de s`light Dinner gä. Nachdäm hei mir üs de gmüetlich niderglah imene Zält u hei üses erschte Cüpli gnosse. Zu üsem erstuhne hets würklich Alkohol gä. (Im normal Fall gits Alkohol nume i de Hotel). Aber was isch da scho normal!? Am 21.30h hets de s`Main Dinner gä. Das isch es Büttet gsi mit all jene typische arabische Gricht u derzue hets Fleisch vom Grill gä. S`Desserbüffet isch de aber nid sehr üppig usgfalle. Doch alles i allem isches sehr fein gsi. Nachdäm de alli Mäge voll u zfriede si gsi, hei Corinne u i gfunde, das es Verdouigs- Tänzli nid chönti schade und gesagt getan. Mir hei sogar no chönne üsi zwe Manne derzue überrede. Aber nid für lang u die zwöi heis sich wider is Zält zurgg zoge. De hei de Corinne u i die Glägeheit packt u hei üs o vom Tanzparkett verabschiedet u es Sandboard undere Arm klemmt u hei üs uf de Wäg gmacht die vorliegendi Düne z`bestiege. Mir si schön z`schwitze cho. Erschtens ischs Board schwär u zwöitens ischs enorm asträngend im Sand düruf z`loufe. Mi chunt fasch nid vom Fläck! Aber mir heis gschafft bis z`oberscht ufe u hei s`Board feschtgschnallt. Es isch mir scho chli Mulmig z`muet gsi, da i ja no nie ufeme Sand- rsp. Snowboard gstande bi. I ha mir de gseit: nüt amerke la, Ouge zue u furt. Muetig han i s`Board richtig Abhang gstellt en chliene Hupf vorwärts u scho isches los gange! U de no wie…..!!!! I bi chum vom Fläck cho. Gmüetlich ischs gange u so bin i de o heil unde acho. Das han i natürli nomal welle erläbe u has Board wieder undere Arm klemmt u ha mi nomal ufe Wäg gmacht z`deruf. Alles i allem isch da s`dritte mal gsi won i dette ufe bi. Mini Wädli hei sich langsam aber sicher bemerkbar gmacht. We das kei Muskelkater git! Für das letschte Mal hei Corinne u i de gfunde mir hocke beidi ufs Board u bezwinge Düne mit schlittle. O da ischs Tempo nid sehr schnäll gsi, aber es Erläbnis alleweil Nachdäm hei mir de wenigschtens nümme müesse frühre. Mir hei s`erscht u s`letscht mal gschwitzt a däm Abe! Churz drüberabe ischs de scho Zyt gsi Azstosse ufs Neui Jahr. Dr Höhepunkt isch de s`Fürwärch gsi. Z`vierte höch hei sie vo Hand am Hang vo dr Düne die Ragete los gla! Nüd isch e so ab wies wahrschienlich planet wär gsi. Ueberall u doch niene si die Ragete gfloge. Die einte wunderschön i Wüeschtestärnehimmel, die andere diräkt u ohni z`bremse i Düne! Mir hei üs gloubeni no nie so amüsiert währedeme Fürwärch. S`eigentliche Schlussbouquet isch am Afang cho u als Schluss hets no so paar Chlöpfer kha. Die si öppe im Abstand vo paar Minute immer wieder los gange u das über e Zyt vo sicher zäh Minute. Üs hets fasch putzt vor lache. Es isch halt scho o schön wieder emal so öppis z`gseh wo nid alles über Hightech louft! Nachdäm fulminante Fürwäch ischs de Zyt gsi abschied z`näh vo dr Wüeschti. Um rund 02.00h simer de wider diheime gsi u hei de no churz im Fernseh s`Neue Jahr i der Schwyz la iilüte. E so hei mir de zwöimal chönne ufs 2007 astosse!