Schnee u Schifahre bi 34°C

Letschte Sunntig hei mir üs dä Spass nid la entgah u si mit üsne Fründe, Rita u Ruedi, em Wirteehepaar vom Männliche, nach Dubai gfahre fürs Schifahre! Ja das stimmt scho! Schifahre han i gseit. Isch doch scho e chli absurd! Dubai u Schifahre. Aber es isch tatsächlich e so, will Dubai het die gröschti Indoor Schiarena bout! Mir hei kei Ahnig ka was üs dette erwartet. Am 09.30h hei mir de d`Rita u Ruedi im Hotel abgholt u si diräkt losgfahre. Punkt 10.00h simer bi dr Schiarena, wo zugliech ouno es riesigs Ichoufzenter isch acho. Es isch sehr guet Beschilderet gsi u mir heis uf ahieb gfunde. Als erschts hei mir müesse dr Itritt löse. I muess scho säge, dä isch nid überrisse. 50CHF für zwe Stund schiefahre inklusiv dr ganze Usrüschtig. Dadezue kört, Schieazug, Socke, Schueh u Schi. Uiiii ize wärde dir sicher dänke ufff Socke u Schiazug pfuiiiii! Nei, nei, das isch nid grusig wie dir meinet, will alli Chleider wärde nach jedem trage wider früsch gwäsche! Nachdäm mir de alles gfasst ka hei.So hei mir üs de as umzieh gmacht. Es chunt eim scho chli komisch vor Flip Flop gäge Schieschueh ztusche. S`Einzige wo jez no fählt si Händsche u Chappe. Das isch hingäge Das wome muess choufe. Aber o das isch erschwinglich u choscht ou nid alli Wält. Dadefür het me ja de no grad es Souvenir zum heinäh! Nachdäm mir de alles ka hei, hei mir üs uf e Wäg gmacht id Arena! U dette si mir de a däm Plakat verbii cho!

Isch im Fall kei Witz! Ei Tag Schiefahre mit em Ueli Kesteholz u derzue no d`Chance ufene Wuche Ferie z`gwinne i dr Schwyz.

Wo mir de i dr Halle acho si, hei mir scho e chli gstunet. Mir heis alli nid so gross erwartet! Jetz e paar Agabe zum Ganze: D`Lufttemperatur isch immer minus 7°C Piste isch 400m läng u öppe 80m breit. Es het en vierer Sässellift und en Tällerlift für d`Snöber. Mir si de diräkt ufe Sässellift u hei de die erschti Abfahrt so richtig gnosse! Nachdäm mir de e paarmal uf u ab si hei mir de natürli ou no müesse e Halt ielegge i dr Beiz bi dr Mittelsttion! Bekanntlich git ja Schifahre Durst! Was scho e chli gfählt het, isch der feini Kafi wiesne uf em Männliche git! Gäll Ruedi! E sones Todesbiwak wär scho guet gsi!!!!!!! Nachdäm mir üs de wider gschterckt ka hei, si mir de nomal e paarmal gfahre. Nach guet 1 3/4Std. han i de aber agfange frühre u bi de doch froh gsi, d`Schieschueh wider gäge d`Flip Flop z`tusche! Aber i bi sicher, mir wärde nid s`letschte mal dette gsi si! Oder was meinet ihr Rita u Ruedi?

Rita u Ruedi im Umziehstress!

Tönel - elegant wiener d`Schisocke aleit!

Blick, fasch vo z`oberst uf die " rasanti Piste"

Rita, Ruedi u i vor dr Beiz bi dr Mittelstation!

Tönel in action!

Ruedi im gwohnt lockere Stil!

Elegant wie si derhär chunt d`Rita

Blick uf d`Mittelstation

Nomal e Schnappschuss vo üs drü Schneekanone! PS: ihr chöit d`Föteli aklicke zum si grösser z`gseh!

Trotz em höche Alter chasis immer no! ( Simba)

Mi gloubts fascht nid, Agility z`mitts i dr Stadt zwüsche de Hochhüser bi öppe 34°! Aber ize alles dr Reihe na! Dä Bricht wird mini Kolleginne u Kollege vom HDC Wehntal ganz speziell interessiere! Letschte Mittwuch bin i ga s`Tierheim aluege vo dr Amarican Veterinary Klinik. Die lieht geographisch sehr guet für üs! I ha grad mal öppe 15min. brucht bis i dette gsi bi mit em Outo! Werum bini ga luege? Mir si immer no uf dr Suechi nachemene guete Ferieplatz fü d`Simba. I bi sehr fründlich empfange worde! Dr zueständig Leiter vom Heim chunt us Südafrika u het sich alli müeh gno u mir würklich alles zeigt. I muess säge, i bi sehr possitiv überrascht gsi u es het mir en sehr e guete Idruck hinterlah. Wo mir de ufe usseplatz cho si, da han i de nid schlächt gstuhnet! Was han i gseh? Ja genau, Agility Hindernis. Si gseh nid ganz e so profesionell us wie i dr Schwyz, aber für das ,dass si sälber gmacht worde si, chame nid viel säge! Es isch ja scho super, weme hie probiert, d`Lüt z`animiere zum mit em Hund öppis z`mache! I ha de natürli grad müesse säge, das i Agility gmacht hegi. Uf das abe het er mir de en Flyer i d`Finger drückt u gseit, i müessi i däm Fall unbedingt am Samstig a däm „Appreciation Day“ mitmache, will dete giebs en Agility-Wettbewerb! Da hei de mini Äugli scho chli glänzt won i das khört ha u für mi isch grad klar gsi, das i dette wirde mitmache!

Scho nume dr Simba z`lieb!

Dr Zuefall hets ou wölle, dass Tönel ou no grad het frei ka am Samstig. Wo mir üs de parat gmacht hei, u i d`Würstli gschnitte ha für d`Simba, het si gloub scho gwüsst was los isch! Si isch ämel kei Santimeter me vo mier gwiche u het fasch scho gliiech g`hyperet wie amigs i dr Schwyz vor em Agility! Nachdäm mir de alles packt ka hei, si mir de los gfahre richtig Stadt. Mir hei bis dette nid gwüsst wie dr Platz wird usgseh u umso meh si mir de überrascht worde wie schön er gsi isch! Es het gnue Schatteplätzli kä u z`Aesse u z`Trinke hets ou gä!

Sogar Verchoufsständ hets ka, u d`Musig het ou nid gfählt. Also alles fasch wie i dr Schwyz. Nume dr Ablouf vom Agility isch e chli anders abgloffe! Mi het chönne strarte weme het welle u mi het eifach nume Zyt gmässe!! Wies dr Zufall het welle, si d`Simba u i die erschte gsi wo gstartet si! Im ganze hets 11 Hindernis ka u die hei mir i 43Sek gschafft. Wohlverstande bi guet 34° im Schatte! U mi darf nid vergässe, d`Simba het ja ou scho e paar Jährli uf em Buggel! Aber ohni das i ize wot blöffe, mir si die Atraktion gsi bim Agility. Mir si nämlich sozäge die einzige gsi wo scho so Erfahrig ka hei u umso meh het mi de usquetscht u Frage gstellt übers Hündele! I bi mir scho fasch sicher, da wird irgend wenn a Afrag cho, obi nid lust hätti zum Training gä! I wär sicher nid abgneigt! Dür das het Simba einisch meh brilliert u mit viel Vorsprung dr erschti Platz gmacht! Es het sogar no en Pries gä! Nämlich en Sack Hundefuetter!

I wett no churz erkläre was gmeint isch mit „Appreciation Day“. Die American Veterinary Klinik angaschiert sich sehr für di richtig Tierhaltig i Abu Dhabi u Dubai u nimmt streunendi oder usgsetzti Hünd u Chatze uf u sterilisiert si u tuet si ärztlich versorge. Nachdem probiere si die Tier z`platziere! Das ganze wird rein mit Spändegälder finanziert. Darum wärde verschiedeni Aläss organisiert um wider zu Gäld z`cho!

As-salaamu`alaykum!

wa`alaykum us-salaam! Das git me als Antwort ufs Hello wies im Titel gsteit! Sit guet drü Wuche bin i am Arabisch lehre. Mir si e chlieses Grüppli vo füf Froue u die chöme us vier verschiedene Länder. Kanada, Vietnam, Maleisia u Schwyz. D`Kursleitere chunt us Syrie u isch e ganz e lässigi. Mir heis immer mega lustig. Mir träffe üs drümal i dr Wuche für guet anderthalb Stund u das bi dr Kanadierin diheime. Eis mues i scho säge: Das isch definitiv die schwerschti Sprach won i bis ize agfange ha lehre! I chume mir mängisch scho fasch wien e Erschtklässlere vor wo s`ABC muess lehre! Mir lehre übrigens grad beides mitenand, das heisst rede u schriebe. D`Schrift isch no fasch e chli eifacher als z`Rede. S`Arabisch isch ja e Sprach wo sehr vielfältig isch i dr Tonlage. Mi cha ja, so als Biespiel es ganz normals A, mal kurz, läng, tüf oder höch uspreche u das chame genauso mit em H ou mache! Mängisch wärs guet mi hätti e Halschrankheit, de giengs viellicht e chli besser zum usspräche!!!!! Doch das ganzi isch i jedem Fall spannend u i ha mega dr Plousch. D`Roda, Kursleitere, macht das speziell guet! Bevor nämlich nid alli immer alles gschnallt hei, wird nüd Neuis derzue glehrt. Jedesmal wird ou wider alles repetiert u es git e chlieses Diktat über das wome scho sötti chönne! Mi merkt dür das immer grad sofort wome no en Hänger het u viellicht mal wieder e chli meh i Büecher sött. Chönne tüe mir scho nün Buechstabe vo 28! Doch das isch no nid Alles! S`Arabische het nämlich ouno 14 extra alphabetischi Zeiche u vo dene chöi mir ou scho drü! Aber i bi sicher, es geit no es Wieli bis dir dr erschti arabischi Bricht vo mir chöit läse! Ha Ha

Emirates Palace

Die letscht Wuche han i mit em Üse, dr Brüetsch vom Dide, e Tour gmacht im Emirates Palace. Treffpunkt isch am 20.00h i dr Main-Lobby gsi. Mir si de zersch no ga z`Nachtässe zäme u das e chli pressiert het, isch üs nüd anders übrig blibe als ire Fast Food Bude halt z`mache. Dr Pizza Hut ischs gsi. Isch nid schlächt gsi, aber es git sicher kulinarisch bessers! Am 19.50h si mir de bim Emirates Palace vorgfahre wie die Grosse! Obwohl mir nid grad usegstoche si mit üsem Toyota Prado, hei mirs natürli üs nid la entgah vom valet parking gebruch z`mache. Choschtet ja nüd usser es Trinkgäld für de Porter. Mi chunt sich scho chli als King rsp. Queen vor. Aber das nume e so näbebii will s`Ougemerk söll ja ufs Hotel grichtet si! Drum ize e paar Infos über dä Palast!

Ds Hotel ghört am Staat, das heisst genauer gseit a dr Scheich Familie vo Abu Dhabi, u wird gfüehrt vo dr Hotelchetti Kempinski u gilt als das vo de Usmass här gröschti u luxuriösischti Hotel vo dr Wält.

Im 2001 het me mit em Bou agfange u im Februar 2005 ischs eröffnet worde. Während dere Zyt hei über 20000 Persone dranne gschaffet. Ufgrund vo sire Luxus-Usschtattig bezeichnet mes nid als Hotel sondern als Palast. Ou Bezeichnig vo 7-Stärn Hotel (wies Burj al Arab, Dubai) isch nüd anders als e Eigewärbig, Es git nämlich überhoupt kei Hotelbewärtige wo meh als 5 Stärne vergit.

Architektur

Für d`Architektur isch Wirnberly Allison Tong and Goo ( WATG) veranwortlich. Ds Design isch us traditionelle arabische Elemänt, so wie zum Biespiel die grossi Kuppe u wieteri 114 Kupple wo verteilt si übers ganzi Gebäude.D`Farb vom Hotel si Sandschttierige wo i de arabische Wüeschti vorchöme. Die grossi Kupple im Atrium het e Durchmässer vo 42m u ihri Oberflächi isch mit ächt Gold- u Silbermosaik verziehrt. I dr Ballhalle, wo bis zu 2800 Persone platz hei, isch e Kupple wo 17m gross isch. Die andere Kupple si zwüsche 2,9m u 12m gross.

S`Hotel isch ei Kilometer läng u het en Umfang vo 2,5km u e Flächi vo 243`000m2. Rund ums Hotel isch e Park mit Gärte u Springbrünne u Sandstrand vo eim Quadratkilometer agleit. Dr Triumph-Boge a dr Iifahrt zum Hotel het e Höchi vo 40m u e Breiti vo 36m. Die Iifahrt isch usschliesslich füf de Scheich vo Abu Dhabi u sine glatne Gescht!

Usstattig

D`Gescht vom Emirates Palace wärde i Coral-, Pearl- u Diamond Gescht ufteilt. Isch wohl kei Zuefall, das d`Etihad Airways d`First-, Business- u Economyklass gliech nennt! Jedem Gascht steit en eigete Butler zur Vergüegig.

D`Houptufgab vom Hotel isch, Aläss vo Staatsgescht us allne Herreländer z`organisiere u Internationali Konferänze dürezfüehre u was ou nid darf fähle, Luxus Ferie für de Jet-Set!

S`Hotel verfüegt über 302Zimmer u 92 Suite.

Im Hotel sälber schaffe ca. 2000 Agschtellti us 50 verschiedene Länder. Es het 17 Gschäfft u das natürli nur vo internationale Luxus Marke!

Gschicht

Jedes Jahr findet es Träffe vo allne Regierigsscheffe u Scheichs vo allne arabische Emirat statt um die politische Aglägeheite mitenand z`bespräche. Daderzue lat jedes Jahr es anders Emirat i. Im Jahr 2004 wär das Träffe i Abu Dhabi planet gsi. Dadefür het d`Scheichfamilie vo Abu Dhabi extra es pompöses Awäse la boue u das het amene Palast müesse ähnlich si! Isch klar oder? Da drus isch dr Emirates Palace entstande! Doch leider churz bevor das Träffe hätt stattgfunde isch dr Scheich gstorbe u mi het das ganzi Träffe ane andere Ort müesse verlegge. Nachdäm het me de erscht beschlosse, dä ganzi Palast als Hotel z`nütze!

Kuppe Atrium

Marmorboden Atrium

Iiblick ine Suite Masterbedroom

Badzimmer

Esszimmer

Teppich

Lüchter

Luluiland!

Mit zwöi Boot, vollbepackt mit Lüt z`Trinke u Ässe, si mir letschte Frytig is Meer gstoche! Lulu Iland ischs Ziel gsi. Das isch die Insle wo diräkt vor dr Corniche vo Abu Dhabi lieht. Die khört am Scheich u isch also i Privatbsitz. Aber das het üs nid kümmeret. Nachere rasante Fahrt vo ca. zwänzg Minute hei mir de d`Anker ganz nach vom Strand gsetzt. Es het nid lang duuret u alli heis s`Bad im warme Wasser gnosse! Usser di chlienschte Sprösslinge heis vorzoge diräkt a Strand z`ga für e Sandburg z`boue! Für Tönel u mi ischs übrigens alleri erschti mal gsi, das mir im Meer si ga bade sit mir hie si! Nachdäm mir de über e Stund im Wasser ghocket si, het me üs de gfragt wär interässe hätti zum Wasserschiene. S`Echo isch gross gsi. O i ha mir die Glägeheit natürli nid welle la entgah! Mir hei de uf das Boot, wo dir ufem Föteli unde gseht gwächslet u scho si Motore gschtartet worde u mir si es bitzeli wäggfahre vom Strand. Die erschti Person wo gfahre isch, isch dr Paolo gsi (Arbeitskolleg vo Tönel). Er het üs kurz spitz zeigt wiemes macht uf em Monoschie! Es het uf jedefall sehr schön usgseh. Als nächschts bi scho i dra gsi. I bi ja scho gspannt gsi ob si no schaffe überhoupt usem Wasser z`cho. D`Schwümmweste u Schie hei passt u scho bin i am Ändi vom Seili ghanget. I ha scho chli es mulmigs Gfüehl ka. Es isch doch mängs Jahr här sit em letschte Mal.Muetig han i s`Zeiche gä zum starte. Aber chum heis Gas gä bin i scho gfloge. Usser das i e chli Salzwasser gschlückt ha isch nüd passiert. Zwöite Versuech isch agseit gsi. Da derzue het mir de dr Paolo o no gueti Tipps gä. Mi het wider Gas gä, u zu mim erstuhne, i has gschafft. Am Afang bin i nume hinterem Boot härgfahre u has scho so gnosse. Mi het mir de Zeiche gä, i sölli doch mal über d`Heckwälle uf d`Siete use fahre. Alle Muet han i zäme gno u bi näbe use gfahre wo ja o guet gange isch. U wiemes e so het, mi wird muetiger u übermüetiger. Nachdäm i doch e paarmal, für mini Verhältnis, guet hin u här bi han i halt wider emal zviel welle! Es het mi de sofort gschtraft! I bi wie im Salto Mortale gfloge. Sogar dr Schie han i verlore. Aber o das het mir nüd gmacht. Eis isch sicher es isch mega gsi! Für mi isch de aber Schluss gsi u die nächschte si dra gsi zum fahre.

Nachdäm mir alli wider zrugg si gsi vom Wasserschiefahre hei mir de gmüetli Zvieri u es Bier gnosse u nomal es Bad gno. U glii drüberabe hei mir de scho wider müesse alles zäme packe u üs uf de Heiwäg mache.

Während der Rückfahrt isch d`Sunne langsam under gange u mir hei nomal die schöni Ussicht uf Abu Dhabi gnosse!

Grüessli vo dr Simba u dr Chitta!

Das isch min nächtlech Hochsitz! Uff isch das aschträngend z`loufe im Sand! Häb mi nid so fescht es isch viiel z`heiss! Immer han i müess sitze debii han i doch s`Ghudi welle! Währendem Tag gangeni albe nume churz verruse! Uff o s`bade macht müed!

Mir si doch e schöns Päärli!

Ja ja, ihr gsehts richtig! I ha wider emal e Verband! I ha am Strand mini Chralle abgrisse! Uiiii das het aber nid schön usgseh! D`Andrea isch de mit mir i d`British Veterinary Klinik u dette het me de mini Pfote untersuecht u gseit es giebi zwe Möglichkeite. Die Einti wär gsi, eifach si la bis dr Nagel wider nahwachst, das hätti aber Monate brucht u i hätt de die ganzi Zyt müesse en Verband träge, was ja o nid lustig gsi wär. Die ander Möglichkeit isch gsi, Kralle operativ z`entferne!

D`Andrea isch für di zwöiti Variante gsi! Oje oje scho wider e Vollnarkose! I has de öppe gse!!! Aber wie dir gseht han i o Die guet überstande u bi scho fasch wider die Alti! Morn gangeni ga dr Verband ga wächsle u nächschti Wuche chöme scho d`Fäde use u i darf ab denn de scho wider ga bade! Jupiiiiii

Vorhäng!

Am Sunntig nach üsne Ferie hätte eigentlich sölle üsi Vorhäng glieferet wärde! Aber wies halt e so isch da, sisi de erscht am Mittwoch cho! Montiert sisi am 20.00h worde. Das isch normal hie. Mit emene Bund Stöff sisi atrabet u hei de agfange montiere! Chum heisi agfange ka, ischs mir scho chli komisch vorcho, will mi hets dünkt, die hange e chli höch! Dr Vorhangmönsch het de gmeint es sigi genau 2m50. Super i ha alli uf 2m40 bstellt. Jä nu han i dänkt wäge dene 10cm chunts ou nid so drufa! Aber ohä, d`Nachtvorhäng (bruchts will es heit kei Store ade Fänschter) si alli 2m50 oder sogar 2m60. Hingäge die dünne wysse Vorhäng si alli 2m40! Also nüd gsi mit montiere! Alles wider mitnäh u neu mache isch deviese gsi, ausser d`Nachtvorhäng im Schlafzimmer u im Gästezimmer. Die het me de montiert u wie! Doch i muess eis säge, da chöi d`Vorhängmönsche nid viel derfür,

es isch eifach schlächt gmuuret u die Wand isch usenand bröcklet!

E so hets de am Schluss im Schlafzimmer usgseh! Gsamthaft hets 16 Löcher i dr Wand ka! Das tuet scho chli weh! Die einzige wo komplett u passend montiert worde si a däm Abe, si die i dr Stube u im Büro gsi. Isch doch scho öppis u schön gsehts ou us Mi het üs de gseit das die fählende bis am nächschte Tag gnäit wärde us si wider chieme! Wärs gloubt hei mir für üs dänkt! U so ischs ou gsi. Mir hei eifach nümme ghört vo dene u mi het wider müesse telefoniere u nafrage. Das het de hingäge gnützt u mi isch de wider mitere biegi Stoff verbie cho! Aber leider het die Biegi nid glängt! Es hei nämlich wider es paar Vorhäng gfählt! Aber mi si ja nid pingelig u si froh gsi, si wenigstens die im Schlafzimmer u Gästezimmer komplett gsi! Also es het nur no ei Rum gfählt. Isch doch scho guet! Die si de aber würklich am nächschte Tag glieferet worde u passt heis ou no grad! Juhui!

I dr zwüschzyt isch ou üsi Wand wider gflickt u es gseht scho fasch perfekt us!

Mit däm Bricht han i eu allne nume mal welle zeige, mit was für Problem mir üs hie müesse düreschlah! Es brucht würklich Närve wie Drahtseili.