Paradies uf Ärde!

Damal mache i mirs eifach u bitte eui dr Itrag uf em Blogger vo s`Epplers Familiy ga z`läse. Dä git Ufschluss uf all die Frage: Wenn? Wie? Wieso und Worum? Gfinde tüet ihr das ganze i dr rächte Spalte unter links u dette eifach uf "Wüstenspuren" klicke!

Brünzlihalt Eingang Arabian Oryx Arabian Gazelle

Blick ufs Resort

Houptgebäude u Restaurant Bedouin suite 19

Schlicht en Troum!

Uese eiget Pool! Usblick vo üsem Rum uf e`Wasserstell

Nach getaner Arbeit e Wachtle als Belohnig

Es isch bigoscht schwierig so en Falke im Flug chönne z`fötele Falconry

Riläxe nach dr Massage Blick uf e gmeinschafts Pool im Spa-Bereich

"Jumairah-beach Dubai"

Vorgeschter hei d`Franziska, ihre Vater dr Peter u mini Person e Churztrip nach Dubai gmacht. Nebscht em Schiefahre u Besichtigung vom Madinat Jumairah hei mir en Halt gmacht am berüehmtischte „public beach“ (öffentlicher Strand) vo Dubai. Dä lieht diräkt näbem bekannte „ Burj al arab“. Vo dette zieht sich dr Strand über mehreri Kilometer. Wahrschienlich ischs nur e Frag vo dr Zyt bis dä schöni Fläcke ouno verbout wird. Drum gniesse so langs no möglich isch! A de Wucheänd muess hie allerhand los si! Mir hinggäge hei fasch e lähre Beach atroffe, ussert e paar Sonnehungrgi u Skysurfer isch nüd los gsi. Mir hei d`Badhose nid derbie gha und o wenn, i gloube nid das ig es Bad gnoh hätti, es isch nämlich e zügigi Briese gange u Temperatur vom Meer isch ou no nid üppig! I has nämlich churz z`gspühre übercho. Grad wo i ha welle e s`Föteli schiesse het mi churz e Welle überrascht u i bi bis fasch zu de Chneu im Wasser gstande. Das Bad het mir de scho glängt!

Skysurfer

Mini warm Alegi söll nid tüsche! Es het immer no guet 24° gha u i bi e Gfröhrli!

Peter vom Winde verweht!

Offroad Toufi vo üsem Toyota Prado!

Mir hei scho mängisch i üsem Offroad Führer ume gschnögget u üs gluschtig gmacht über all die Trips wo beschriebe si. Dr letscht Mittwuch isches de sowiet gsi, u mir hei üse erschti Offroad Trip under d`Räder gno. Ziel isch s`Hatta Gebirge gsi. Das lieht ca. 100km vo Dubai enfernt u lieht ire Enklave vom Oman. Am Morge am 09.00h si mir de z`drittehöch losgfahre. Näbscht Tönel u mir isch no dr Vater vo dr Fräne, dr Peter Trachsel, mitcho. Viel Gepäck hei mir nid müesse mitnäh, da mir planet hei, im Hotel Hatta Fort zersch emal ga z`Mittag ässe. Wie nächer mir zu Hatta cho si, umso meh het sich die ganz Landschaft veränderet. Vor gälbe Sandwüeschti zur rote Sandwüeschti u de ischs immer Felsiger worde u Bärge rundum immer höcher! Idrücklich! Nachdäm mir de z`Mittag gässe gha hei, isch de üse Trip erscht so richtig los gange. Als erschts hei mir de no dr Stausee besichtiget vo Hatta u dr nah isch es los gange. Mir hei Hatta hinter üs gla u si richtig Gebirge gfahre uf holper Strasse.S`Ziel si die bekannte Hatta Pools gsi. Eis isch sicher, ohni Offroad-Führer oder GPS chunt me nid wiet. Het me einisch die Offizielle Strasse verlah, gits keini Wägwieser me. Mi muess sich voll und ganz uf de Offroad-Führer verlah. Mir hei Glück gha u hei alles uf ahieb gfunde, obwohl mängsisch han i de fasch d`Ouge müesse zuetue, will öppedie ischs uu steil z`Loch dürab oder ou umgekehrt z`deruf gange. Zum Teil ischs i dene Schluchte ou sehr eng gsi u mi het müesse luege dasme zwüsche de Chempe düre möge het. Es het ou grumplet u gschüttlet u s`Tempo isch minder als Schritttempo gsi. Tönel isch völlig is Elemänt cho u isch meh als begeischteret vo üsem 4 x 4, will ohni dä wär das nie z`mache gsi. Mir si aber vorallem alli völlig fasziniert gsi vo dere Landschaft. Zum e Vergliech gä, es het e Äähnlickeit zum Grand Canyon i USA. Dr Zuefall hets de no welle, wo mir de bi de Hatta Pools acho si, steit doch dette ou scho es Outo! I luege use u troue mine Ouge nid. Wär hocket det ufem Felse? D`Elke u dr Peter, dütschi Kollege vo Abu dhabi! D`Wält isch halt scho chli! Nachdäm mir üs de vo dene beidne wieder verabschiedet hei, hei mir üs de zügig i Badhose gstürzt u hei es wohltuends Bad im Süesswasser gnosse, obwohl d`Wassertemperatur nid sehr warm gsi isch. Aber zu üsem erstuhne, het me wiet i die Schlucht hindere chönne schwümme. Mi het sich schlicht nümme chönne vorstelle, dass me eigentlich ja i dr Wüeschti isch. Nach däm herrliche Bad hei mir üs de wieder uf d`Heifahrt gmacht mit nomal emene Halt i Hatta wo mir no churz s`Hatta Heritage Village besichtiget hei u dernah isch wieter wieder Richtig Dubai gange. Zum Abschluss vo däm abentürliche Tag, si mir de no fein ga z`Nachtässe im Hotel Jebel Ali z`Dubai.

Hotel Hatta Fort

Peter u Tönel vor em Restaurant wo mir z`Mittag hei gno

Stausee vo Hatta

Es isch immer enger u steiler worde

Gschafft! Zunderscht i dr Schlucht

Peter, Tönel, Elke und Peter

Herrlich erfrüschend!

Pool

Das Bild seit Alles!

Dorflädeli!

Es isch fasch nid zum gloube! Bi üs geit glii es Compound eiges Lädeli uf. Also sozäge es "Dorflädeli"! Mi het scho lang derfo gred aber wies eso isch, ou das het sini Zyt duuret. Doch bis zur Eröffnig chas nümme lang ga, da, s`Lädeli scho mit Läbesmittel igrichtet worde isch u geschter het me de ono grad d`Lüchttafele montiert mit em Name! Da han i nid schlächt gstuhnet! Swiss Market heisst das Ding. Da chöme fasch e chli Heimatgfüehl uf. Hoffentlich, verspricht de dr Name ou das wos de isch! Swissness verpflichtet, oder? Es wär ja scho en Hit, am Morge quasi im Pischi chönne ga früschi Gipfeli oder Brot choufe! Lö mir üs doch la Ueberrasche u ihr wärdets sicher vernäh!

Final Tickets!

Jupiiii! Uf em letschte Zagge si mir no zu Billet cho für de Final vom Tennis Open i Dubai! Umso meh hei mir üs gfreut druf dr Federer nomal live z`gseh! Am 17.00h het de zersch no dr Doppelfinal Santoro/Zimonjic gege Bhupathi/Stepanek stattgfunde u am 19.00h ischs de sowiet gsi u dr Youzhny u Federer si ufe Platz cho. D`Stimmig im Stadion isch phantastisch gsi! EMatschbricht muess i wohl nid schriebe, das im TV cho isch oder de het mes sicher i dr Zietig chöne nahläse! Drum lani d`Föteli la rede:

Churz no dr Hunger gstillt bevors los gange isch!

Linda u d`Nina, wahri Schwyzer-Fans!

Pumpevoll ischs gsi!

O d`VIP Tribüne isch voll gsi. U sogar d`Scheichs si verträtte gsi!

Bubathi / Stepanek

Santoro / Zimonjic

Die zwe meischt ufgfallne Fans!

En wietere Sieg ufs Konto "Federer"

Siegerehrig vom Doppel u Einzelfinal

S`Töneli strahlet u isch zfriede, ize chömmer hei!