Es bizzeli Luxus!

Das hei mir üs nomal gönnt u hei ei Nacht im Al Maha buechet u spontan vor Ort grad no ei Nacht verlängeret. Am Samschtig gäge die 10.00h si mir abgfahre u grad richtig für s`Mittagässe im al Maha acho. Mi het üs bereits erwartet u mit aller Fründlichkeit empfange u dr Tisch zum ässe isch ou scho reserviert gsi. Nach em Ässe hei mir üsi Suite chönne bezieh u hei als ertschs grad es usgiebigs Bädli gno.

Bire Wassertemperatur vo über 30 Grad het sogar s`Töneli es längers Bädli gnosse!

Usblick vom Pool

Blick vom Kingsize Bett! Nume keiner schlächte Hintergedanke!

Üse täglich Bsuech rund ums Zimmer. Onyx Gazälle oder uf arabisch:

"Al Maha"

Am erschte Abe hei mir üs für de Kamelritt mit aschliessendem Apéro agmäldet. Ei Wäg het öppe 20 Minute duuret. Tönel het am Schluss chum meh gwüsst wie hocke. En liebe Gruess a siner Adduktore!

Üse Füehrer agleit wie en ächte Iheimische. Isch aber en gebürtige Pakistani!

Die ganzi Karawane. Im ganze simer mit 19 Kamel (vierbeinigi) unterwägs gsi.

Apéro bi Sunnentergang

Zum gniesse!

Geduldig wird gwartet bis wieder Heiwärts geit

Im Hintergrund guet ersichtlich s`al Maha

Am erschte Morge hez gheisse früeh ufstah. Mir hei üs für e Dünefahrt agmäldet u besammlig isch am 07.15h i dr Lobby gsi.

Es het sich glohnt so früeh use de Fädere z`stiege. Nid nume wäge dr Fahrt sondern ou wäge dr Landschaft. Ig bi eifach phaszinierd vo all däm viele Sand.

Nei, nei dä isch nid versoffe! Mir hei en Halt gmacht uf eire vo de höchschte Düne.

Da hingäge ischs e so!

Ohni Wort!

Üses Riech für zwe Täg

Schlau muess me si!

Z`abig vor üsem Zimmer

Die zwöi hei us churz no tschüss gseit bevor mir d`Heireis under d`Räder gno hei.

Die erschte Sache hei scho Bsitzer gwächslet!

Hät me im Gäschtezimmer d`Wand chönne useschla, hät me üses Gäschtebett diräkt chönne übere schiebe u dür das e paar Schweisstropfe chönne spare, will dette diräkt hindedra befindet sich dr Linda ihres Zimmer wo das Bett ihre neui Platz gfunde het!

Das isch halt nid möglich gsi, drum het me das Bett stägeli ab u stägeli uf müesse schleppe! S`Bettgschtell isch ja kei Sach gsi zum zügle aber die Matratze!

Da hei sich die drü Manne scho e chli schwär ta!

Uff! Das isch en Chrampf gsi! Nid nume d`Chöpf hei d`Farb gwächslet, nei ou d`Füess!

Zämegsetzt ischs de ou glii wieder gsi. Macht sich guet am neue Ort! Hoffentlich schlaft d`Linda ou so guet det drinne, will all üse Bsuech het das Bett globt u seelig drinne gschlafe!

Hotelschliessig!

Es isch sowiet, s`Hotel Ackermann het am letschte Mittwuch siner letschte Gescht verabschiedet u het für immer d`Läde im Hus C4 für Bsuecher dicht gmacht. Es si asträngendi, aber ou schöni füf Wuche gsi. Nonstop simer usbuechet gsi. Agfange hets mit Martin u Judith wo verbunde gsi isch mit em SLS-Fest (Pilotegträffe). Wär meh det drüber wetti wüsse luegt am beschte i Blogger vo s`Epplers. Dette gits e usfüehrliche Bricht übers ganze Träffe!

Judith u Martin

SLS-Träffe!

Gmüetlich isch es gsi!

Aschi in Aktion!

Sogar dr Fahne het dank em Aschi dr Wäg nach Abu Dhabi gfunde

Besichtigung vo dr Grand Mosque het nid dörfe fähle!

Tagesusflug nach Al Ain wo diräkt a dr Gränze zum Oman lieht.

Jebel ( Berg ) Haffit in Al Ain

Dr Geissemärt

E arabische Geissepeter!

Die Mur sötti e Tankstell schütze vorem Sand! Ufgnoh ufem Wäg nach Al Ain

Usflug mit Judith u Martin uf d`Insle Lulu

Tönel wartet ufe Pick-up Bus

Isch das nid en ächti Touri!

Wäm gliecht dr Martin?

Am glieche Tag vo der Abreis vo Judith u Martin si de Corinne u de Marc itrudlet oder besser gseit wäre acho. Ihres Päch isch gsi, dass dr Flüger, d`Etihad vo Gänf us het müsse annulliert wärde u die beide es so zur e gratis Uebernachtig cho si in Gänf! Ihri Freud det drüber het sich in Gränze ghalte! Für mi hets hingäge en Vorteil gha, ig ha de derfür e bizzeli meh Zyt gha zum die ganzi Wösch z`erledige!

Usflug nach Khasab, wo ganz im Norde vom Oman lieht.

Arabisches Norwege wird die Gägend ou no gnennt.

wunderschöni Landschaft u

Delphiene gseht me uf sicher!

Als näschsts si üsi Nachbere us Neeri cho. D`Moni, üsi Compound-Coiffeuse, dr Andi u dr Raphael. Ou sie, si bereits s`letscht Jahr scho emal da gsi, genauso wie all die andere ou.

Mit ihne si mir nomal zu de Hatta Pools gfahre!

Süesswasser bade mitts i de Bärge.

Dr Abschluss vo dene füf Wuche hei de d`Susi, dr Cornell u dr Päde gmacht. Mit ihne hei mir de s`kulinarische pflegt! Mir hei jede Abe amene andere Ort gässe! Sie si de wie scho erwähnt am Mittwuch i dr Nacht abgreist.

Einisch meh bin ig die phantastisch, schöni Grand Mosque ga besichtige

So, vo ize geits langsam aber sicher a S`Hotel ruume! Zu üsem Glück, s`meischte Mobiliar isch bereits versproche u verchouft. Mir müesse nur no Date feschtlegge wär wenn was cha cho abhole!