Umbou volländet!

All die War söll i dr Chuchi platz ha?!

Üsi Chatze hei s`Wiete gsuecht während em Umbou. Zum Glück hei mir zwöi Lavabo, süsch hätts einisch meh Chrieg gä!

Ou i dr Stube isch keis Dürecho meh gsi

Alles verstellt!

Langsam aber sicher hets Forme agno

Da wird bereits dr Stei gsetzt

D`Sheika het ihres neue Plätzli scho gfunde u het d`Nase immer z`vorderscht gha

D`Fienarbet u die letschte Handgriff vor dr

Volländig!

Üses neue Riech!

Vollträffer!

Üse Umbou louft sowiet planmässig u mir chöme guet vorwärts.

Am Samschtig, am spätere Namittag het de Tönel no d`Idee gha, mir chönti ja d`Löcher vorbohre für üsi Garderobe im Chäller, bevor alles früsch gschtriche wird. Mir hei nämlich churzum die ganzi Garderobe vom Igang abgänderet für dass sie fasch perfekt überunde ine passt.

Also nüt wie los - u scho lärmet Bohrmaschine. Damits nid all zu viel Stoub git, bin ig gliechzytig mit em Stoubsuuger parat gstande. Die erschte paar Löcher si im Nu gmacht gsi u bis zum allerletschte Loch het alles super klappet. Fürs letschte Loch hei mir de no e chli diskutiert wo das ächt sötti si. E chli wieter rechts oder chli wieter links?! Tönel het sich für sin Vorschlag düre gsetzt u churzum Bohrmaschine agsetzt u ig bi natürli mit em Suuger ou dette gstande.

Aber oha lätz! Chum het sich de Bohrer i d`Wand ine gfrässe, hets fadegrad zur Wand use gsprützt. Pätschnass u mit grosse Ouge hei mir enand verdatteret agluegt u si losgstürmt richtig Wöschchuchi um dr Houptwasserhane z`schliesse. Alles nüd gnützt, s`Wasser isch immer no waagrächt zur Wand use gschosse. De schreit Tönel: „Das cha nume no d`Heizig si!“ Stürmt los i Heizigschäller u zieht d`Sicherig use, u tatsächlich, es het em Wasserfall dr Schnuuf gno. Da hei mir de zerscht emal e Rundi g`fluechet u denn ischs as Putze gange u a s`überlege was mir ize mache. Mir hei kei anderi Wahl gha. Als am 24h Service vom Heiziger z`telifoniere. Dä het de nid lang uf sich warte la u het dä Schade beguetachtet. Es isch kei Frag gsi, Bodeheizig voll tüpft. Mi het de dä Heizchreis wo betroffe gsi isch gschlosse u d`Heizig wieder agla. Um dr Schade z`behebe, müesse die Rohr frei gleit wärde u drum het sich de Tönel diräkt as usespitze gmacht u es het sich bestätigt. Es suubers Loch mitt`s is Röhrli. En Vollträffer!!

Es nimmt langsam Forme a!

En letschete chliene Teil Gipsblatte fählt no u scho isch Decki verchleidet

Tja, was studieres ächt die Zwöi? Ischs ächt schreg oder passts perfekt?

D`Antwort gits später!

D`Alieferig vo üsne Bode- u Stäge-Platte. Deponiert i dr Garage.

Dr Charly am sortiere vo de Stägeplatte, da jede einzel Tritt ahand vore Schablone agfertiget worde isch. Isch Knochearbeit gsi bis alles gstumme het. S`Flueche igschlosse!

Alles steit bereit u dr Charly cha mit sire Arbeit afa

U so gsehts i dr Zwüschezyt us. Es fählt nur no a chliene Sache. Wie z.B. e paar Sockle u Fuege

Perfekt passt Gipsdecki u d`Löcher für üsi Lämpli si ou am richtige Ort. Us allne Löcher luegt scho es Kabel use.

Im Momänt isch d`Chuchi no s`Lager vom Plättlileger. Das wird sich aber nächscht Wuche ändere. Am Zyschtig sötti d`Chuchi ibout wärde

S`neue Chleid vo dr Stäge. Alli Tritt Massgschniederet u nur no d`Sockle fähle.

Dr Startschuss zum Umbou isch gfalle!

Dr ganzi Igangsbereich mit dr Schtäge u Chuchi überchunt es neus Chleid.

Afangs Wuche hei Tönel u ig agfange Bodeplatte usespitze bis dr usglehnti Kongohammer dr Geisch ufgä het. Anstatt ghämmeret het er nur no gfunket wie e Sirenelampe! Leider hei mir de das Ding nümme chönne wiederbeläbe. Es het es Telifon a Charly brucht, vo ihm hei mir ihn usglehnt gha u er het üs geschter e nigel nagel Neui Maschine zuecho la. Hüt hei mir mit dr Arbet nid chönne wieter fahre, da dr Chuchiusbou uf em Programm gschtande isch. Ab Mäntig heissts de wieder: hämmere, chlopfe u usespitze!

D`Stoubwänd si allzyt bereit!

Einisch meh hei mir Glück gha! Mir hei nämlich üsi Chuchi im Ricardo zum Verchouf usgschriebe gha u siehe da: Mir hei si tatsächlich chönne verchoufe mit dr Bedingig dass me si sälber komplett muess usboue!

Die ganzi Chuchi mit allem Drum u Dra het es jungs Ehepaar erworbe wo im Emmital es alts Buurehuus umbout.

09.00h ischs los gange!

En mega Chramp. Mir hei natürli mitgholfe und ou Hand agleit. Am Namittag am 16.00h isch die ganzi Chuchi demontiert gsi! Ufff, es het meh z`tüe gä als mir dänkt hei.

Üsi Notchuchi für die nächschte paar Wuche!

Bilder zum gniesse!

Dr Stadlerwald churz vor Wiehnachte

Tüüf verschneit dr Blick richtig Stadel u Neerach vom Stadlerturm.

Es isch fasch nid zum gloube, aber dr Föhn het die ganzi Pracht innerhalb eim Tag wäggfägt u mir hei e grüeni Wiehnacht gfieret!

Alles isch parat nur no mini Familie het gfählt.

3, 2, 1, Puff u dr Korke het klöpft u bi Schneegschtöber hei mir mit dr Judith u Martin i Brunwald ufs neue Jahr agstosse! Vier wunderschöni Täg hei mir dette verbracht. D`Schie hei mir nid mitgnoh, derfür hei mir üs mit Winterwandere, Schlittle u Jasse vergnüegt. E so wie es sich ghört für Pensionierti!!!

Isch doch es richtigs schnusigs Hüsli, oder?!

01.Januar 2009

Dr Usblick vom Hüsli vos Stutze!

Eifach zum gniesse!

S`Matterhorn vo Brunwald

02.Januar

Abschiednäh u d`Sunne no so lang gniesse wies geit bevors wieder i die Näbel-Suppe ine geit!

Mir hei dr Chälti trotzt u gmüetlich an Abschiedsjass mit Rumpunch a dr Sunne gnosse!

07.Januar

Üse Teich lat zum schlöfle (für die Dütsche: Schlittschuhlaufen) i! (wenn er gross gnue wär) Sit Neujahr het s`Termometer nieme über Null azeigt. Brrrrrrrr

A Star is born!

Mir gratuliere dr Karin zu ihrer erschte Vernissage

Ueber 30 Bilder si z`beguetachte gsi. Hie e chlieni Uswahl dervo

Min persönliche Favorit

Ou am Dennis, mim Göttibueb, gfallts

Speziell für d`Wüeschtianer!