Acht Pfote uf Reise!

23.September 2006 am 20.30h! D`Lifttüre geit uf i dr Akunftshalle z`Abu Dhabi u zwe Boxe, eini e chli chliener u di ander es „bizzeli grösser“, wärde ufeme Wägeli usegstosse. Mir hei üsi zwöi Viechli wider chönne i Empfang nä! Sie si no e chli pläm, pläm vo de Medi, aber schüsch alles guet überstande! Aber jetze di ganz Story vo Afang a. Die letschte zwei Wuche hei mir üsi Ferie i dr Schwyz verbracht mit em Ziel dr Transport vo Hund und Chatz z`organisiere. Näbe de nötige Impfige hets no es Gsundheitszügnis brucht vom Veterinär. Was aber keis Problem gsi isch zübercho. Churze bsuech bim Vet mit beidne, u scho ha i d`Zügnis mit de nötige Stämple i de Finger ka. Chippet sis ja scho. S`Import Permit hei mir vorgängig scho in Abu Dhabi organisiert. Somit hei mir scho alli Formalitäte ka wos brucht für Tier z`importiere i de Vereinigte Arabische Emirat. Als nächschts geits ume Transport. Es git nämlich es neus Gsetz i dr UAE wo vorschriebt, das Tier nur no per Fracht u nid als Uebergepäck dörfe gschickt wärde! Drum han i de are Spedition i Gänf aglütet, zum e Offerte z`übercho was es würdi choschte Hund und Chatz mit Luftfracht z`transportiere. Ui ui ui, wo mir dr Pries gseh hei, hei mir de o grad drümal lähr gschlückt. Satti zwöiahalbtusig Franke hät das kostet! I dr Zwüschezyt het aberTönel mitem Stationsleiter vo dr ETIHAD-Airways i Gänf telefoniert zum genau wüsse wie das ablouft mit em ganze Transport. Dä het ihm klar gseit, er akzeptieri immer no Tier als Übergepäck, er heigi no nie öppis schriftlichs übercho, dass das nid zueglah sigi! Einzig mi müessi Tier i dr Fracht uslöse z`Abu Dhabi! Da dermit het er gmeint, dass mir si nid dete überchöme wo o s`Gepäck achunt! U dr Glu am ganze isch no, das es billiger isch! Isch ja klar hei mir üs de für dä Wäg entschiede. Am Tag vo dr Abreis si mir de scho chli nervös gsi! Am 0500h het dr Wecker gschället u de isch es so richtig los gange! Tönel isch dürs ganze Hus gspeedet zum luege ob würkli alles ok isch u i ha de no dr Räschte packt für üsi Viecher! Für e Kafi hets sogar ono glängt. Am 06.10 ischs Mietouto voll glade gsi mit allem drum u dra u mir hei üs uf e Wäg gmacht richtig Gänf! Dr Chitta hei mir sogar no e Schiesschiste is Outo da, für das si ihres morgentliche Gschäft chönti erledige. Wiet verfehlt. Mit mehrmaligem Versuech sie i d`Chischte setze het o das nüd gnützt. 09.30h si mir de am Gänfer Flughafe vorgfahre. No zwe Stund bis Abflug. Chitta het ab däm Zytpunkt i Box müesse u d`Simba het no e chli Schonfrist ka. S`Check-In isch riebigslos über Bühni u am viertelvorelfi ischs de sowiet gsi u mir hei Hund u Chatz i dr Box abgäh! Isch scho e chli es komisches Gfüehl gsi! Mi macht e so sini Gedanke: „ Hoffentlich geit alles guet oder hoffentlich wärdes am richtige Ort verlade usw. usw.“ Zum Glück hei mir ou nümme viel zyt ka zum studiere, will mittlerwiele isch es scho vierzg Minute vor Abflug gsi, u mir hei diräkt as Gate müesse fürs Istiege! Dr Flug het füf Stund u füfevierzg Minute duret. Pünktlich, oder no besser, sogar e paar Minute zfrüeh si mir de i Abu Dhabi glandet! Dr erschti Gedanke isch natürli gsi, wie geits wohl dr Simba u dr Chitta? Mir si schnäll dür Passkontrolle cho u mitem Gedanke, hoffentlich chunt s Gepäck gli, damit mir so schnäll wie möglich i d`Fracht chöi zum sie go abhole u verzolle! Im verbie Wäg i dr Akunftshalle wos Gepäck achunt, het Tönel e Agstelle gfragt wo d`Fracht sigi, da mir no Tier heige zum abhole! Däjenig het de gmeint sie bringe sie hie hi! Mir hei de agnoh mir heig ihn falsch verstande, das ja nid immer eifach isch all die verschidene Lüt, wo vo all jene Länder chöme , z`verstah. Während i de ufs Gepäck gwartet ha het Tönel de no zwe wieteri Persone gfragt u die hei ihm immer di gliechi Antwort gä! Hie i dr Akunftshalle. Mir heis fasch nid chönne gloube, Drum isch üs nüd anders übrig blibe als z`warte u hoffe es sigi e so. Zudäm hei mir ja eh ono müesse ufs s`Gepäck warte! S`Förderband faht a loufe us Gepäck vom Gänferflug isch druff. Chum hei mir üse Koffer ka, geit scho d`Lifttüre uf u äs Wägeli mit zwe Boxe druf chunt ine! De räschte kennet dir ja! Nachdäm mir üsi zwöi Viechli i Empfang gno hei, si mir de Schnuerstracks zum Zoll gange. Mir hei müesse anäh dass das e lengeri Sach wird gä! Di nötige Papier hei mir de vorgängig scho füre gno. Dr Zöllner het churz gfragt ob mir alles nötige heige u het nume s`Import Permit welle gseh. Dernah luegt är üs a us seit: OK! Tönel u i hei enand verdutzt agluegt u hei s`Wägeli mitem Gebpäck u Boxe gno, u si schnuerstracks düre Zoll usegloffe! Niemer het nur de Chopf nach üs dräit zum öppis Frage oder no meh Papier z`gseh! Ungloublich! Dr Simba u dr Chitta steit somit nümme im Wäg ihri erschte Pfötli uf Abu Dhabi Bode d`setze! Lang hei mir uf dä Momänt gwartet u umso grösser isch üsi Freud gsi!

Die Vereinigten Arabischen Emirate!

Die Vereinigte Arabische Emirat si es Land wo us siebe Emirat besteit. Dr Presidänt isch dr Scheich Zayed Bin Sultan Al-Nahayen.

Abu Dhabi: Das isch d`Houptstadt vo de ganze vereinigte arabische Emirat. Abu dhabi heisst so guet wie " Vater der Gazellen". Zudäm isch d`Inselstadt bekannt für ihri schöne, begrüente Strasse u Pärk, sowie für die viele einzigartige Springbrünne.

Dubai: E Stadt voller Gägesätz. Uf dr eine Siete gits no e alte, sehr schöne, vorallem sehenswärte Stadtteil u zu dr andere Siete spriesse moderni Wolkechratzer nur so zum Bode us! Dubai wird o öppe no " The City of Gold" oder " The City that Cares" gnennt.

Sharjah: Nennt me "the City of Knowledge". Isch bekannt für schöni architektonischi Gebäude wie Museum, Moschee u typisch islamischi Markthallene.

• Ajman: Das ischs chlintschti vo allne Emirat. Dete trifft me sehr viel Landwirtschaft a!

Fujeirah: Bekannt fürs Gebirge, wie sowohl für die unberüehrte, schöne Sandstränd.

• Umm Al Qaiwaind. Das ischs Sägelparadies u d`Naturfründe chöme hie hi für " bird watching".

Ras Al Khaimah: heisst soviel wie "headland of tent". Isch eine vo de schönschte Fläcke i de Emirat. Es isch umringt vo Wasser, Wüesti u Bärge. Iladend isch ou es Bad i eim vo de Wasserfäll wos het.

Outofahre het so sini Tücke!

Uf de Strasse vo Abu Dhabi erläbt me scho so etliches. Grad vor e paar Täg bin i anere Chrüzig gstande zum links abbiege u ha rot ka. Hinter mier isch niemer me gstande. Plötzlich gsehn i im Rückspiegel es Outo uf mi zue fahre imene hölle Tempo wo Liechthüpelet. Ha nüd wieter dänkt, ha ja schliesslich rot ka! Aber ohä, dä isch immer necher cho ohni es bitzeli abdsbremse. De köre is nurno quietsche hinter mir u gseh im Rückspiegel das dä fadegrad uf mis Outo zue schlieft. Reflexartig han i de min Fuess vo dr Brems gno u bi uf d`Chrüzig use grollet. Dä Typ het nüd anders gwüsst als wieverruckt z`wättere, anstatt viellicht z`überlegge das i ja richtig igspuhret bi gsi u är ja eigentlich gradus het welle wos ja würklich grüen wär gsi! Aber äbe e Spur näbe dra!

> Da derzue chani ou grad no säge das Tempolimite nid für alli gälte. D`Regel isch aber, das me erscht ab 20kmh über dr Tempolimite blitzt wird. Radar chäschte gits vili u a de Liechtample hets meischtens ou en Chaschte. Drum fahrt me hie voll güsel vo eire Liechtample zu der andere. Wehe du fahrsch s`vorgäni Tempo. Mi isch konstant dr bschissnig, will alli fahre dir wider vo z`Schnörre. Also chunsch fasch nid vom Fläck. Also bliebt dr nüd anders übrig als ou voll Güsel uf d`Ample zue z`fahre. Es het o Vorteil! Solang mir ja no nid wüsse wo all die Radarchäschte stöh, chöi mir eifach uf die ander Luege, we die plötzlich ihres Tempo drossle u uf Bremse stöh, chasch sicher si da muesses en Chaschte ha!

> O Outobahn fahre het e so sini Tücke. Natürlich gilt o da 20kmh me als vorgä. Aber das gilt gloube i vor allem für d`expat! (Usländer) D`Locals (Iheimischi) kenne überhoupt kei Limite. Mi fahrt ja o demna es Outo. Mi munklet sogar, das die gar kei Buesse müesse zahle. Kunschdück, will die verwächsle gloubeni ame d `Outobahn mitere Outorennstrecki.

> Die Wuche won i Tönel zum schaffe bracht ha, z`nacht um die 24.00h, hei mir ou nid schlächt gstunet. Näbsch däm üs d`Locals wider emal um d`Ohre gfahre gsi , wohlverstande mir si oscho guet mit 120kmh unterwägs gsi, chunt üs doch bigoscht e Velofahrer ( ohni Liecht) entgäge uf em Pannestreife! Da stunsch aso nid schlächt, D`Outobahn isch ja nume vier- respektive achtspurig u die Spure si vomene schöne begrüente (Palme) Mittelstreife trennt. Ja klar, mi sötti bigoscht meine es heigi no gnue Platz für „ Velofahrer“! Es git nüd was nid git. Mi muess nämlich o mit Fuessgänger rächne wo d`Bahn wei überquere! Ihr gseht, hie isches definitiv nid möglich wie en Sunntigsfahrer dür Gägend z`kurve, aber spannend isches alleweil!

Härzlich willkomme!

Leider hei mir immer no kei Internet im Hus, Was scho chli bemüehend isch. Aber nid desto trotz, flüsteret d`Shisha wider emal! Drum machenis churz u bringe euch üses neue dihei i digitaler Form zu euch i d`Stube! Also chömet ine:

Igang

Chuchi -

Äntlich hei mir üsi Kafimaschine!

Loundry! Ornig muess si!!!

Aessegge

D`Stube mit TV

Büro

Gäschtezimmer u Bad Ueses Schlafzimmer

Da e chliene Blick i üse "üppige Garte"!

Wösche!

Sitze zur zyt im Starbuck-café mit Hot Spot! Wieni imene vorgängige Bricht g`schribe ha, si mir ja scho im Bsitz vo Wöschmaschine u Tumbler. Hie geits ganz spezifisch aber um d`Wöschmaschine! I ha mi gester uf d`Socke gmacht zum Wöschpulver choufe! Wo ächt? Ja klar im Carrefour. I bi erstunt gsi wie schnäll i fündig worde bi. Aber es git ja nid nume ei Sorte vo Wöschpulver. Drum han i dänkt: „Schuster bleib bei deien Leisten“, u ha is Gstell vo OMO glängt. Das kenneni doch vo diheimi! Nachdäm i schüsch no paar Sache ha bruucht bin i de zügig hei gfahre, um mini Wöschmaschine uszprobiere. Erstunlich wie mi sich cha erfreue am sälber wäsche, nachdäm me fasch drü Mönet d`Wösch uswärts gä het. Si schmöckt halt scho anders. Bi dr Montage vo dr Maschine het me mier gseit mi söll si s`erschte mal ohni Wösch u nur mit Pulver loufe la. Als bingeli fasch „Husfrou“ han i das natürli befolgt. Pulver ifülle han i no chönne aber fürs Programm han i doch de müesse d`Aleitig i d`Finger nä. Ha das aber gli kapiert u ha stolz ufe Startknopf drückt. Zu mir Überraschig isch si ohni wieteres agloffe u s`neue Maschineli het locker vor sich hi drüllet. Drum han i mi de chönne aderem Züg widme. So zum Biespiel a d`Wöschmaschine lieferig vos Epplers, da dr Dide u Tönel zäme i dr Stadt si gsi. Zu mim erstune ischs dr gliichi Monteur gsi wie bi üs. Während er montiert het, han i dänkt i luegi mal zu minere ,wies die so het. I chume i d`Loundry und scho chunt mir Schum entgäge. Ouweia was isch da passiert? Es Schumet fasch us allne Ritze vo dr Maschine. Mir hez fasch öppis ghä! Jä nu es isch ja grad guet dr Monteur isch ja next door! I ha ihn churzum bätte mal mitscho. Er luegt mi a u fragt ganz früntlich: Heit ihr s`richtige Wöschpulver gno? I luegen ganz erstunt a u ha für mi dänkt: I bi doch nid blöd! OMO dänk! Chum han i das gseit ka het er fasch d`Händ verrüehrt u mir z`verstah gä dass das definitiv s`falsche isch. I ha mi de müesse la belehre, das es Wöschpulver für upload und frontload Maschinen git. Das heisst, Wöschmaschine wo vo obe oder vo vore igfüllt wärde. Er het mir z`verstah gä dass das Maschine kaputt machi. Uf das abe het er zügig dr Filter uftah vorne u het die ganz Trummle voll Wasser, vermischt mit mega viel Schum, eifach a Bode la use loufe. Scho hez mir fascht wider öppis ghä. Liter um Liter Wasser isch quer düre Rum gloffe u es het ja kei Abfluss. I ha de zu ihm gmeint: är soll schnäll wider zue tue i holi es Becki zum drunder häbe. Er het cool gantwortet: Das macht doch nüd, u s`Wasser isch usegloffe! So bin i halt de chli beschäftiget gsi. Bi ja schliesslich sälber tschuld! I weiss nid wie mängisch er het s`Spüehlprogramm loufe la bis die Maschine Schumfrei gsi isch. Emel mängisch! I bi sicher, dä Bode wird nieme so suber si i! Hüt bin i de schnuer schtracks i Carrefour gfahre ga die verschidene Wöschpulver Inspiziere. U siehe da : „ OMO für front loader!“

Hotel Check Out - Villa Check In

Morn isch es äntlich sowiet. Mir zügle alli .Dr Dide u mir! Dr Ässtisch mit Stüehl u ds Sofa stöh scho parat. Zwar e chli verlohre, aber das wird sich ono ändere Morn chunt de no üses s`Bett drzue. Mittlerwiele funktioniert ou scho fasch alles im Hus. Sogar dr Gashärd isch agschlosse u amene Kafi choche steit also ou nümme im Wäg. Mol klar, i ha no ke Kafipulver. U Kafimaschine isch unterwägs vo dr Schwyz dahi mit em Schiffscontainer vos Eppler`s!

No e wichtegi Mitteilig für alli wo die Blogger-Siete bsueche. Es wird ize de wahrschienlich es wieli duure bis dr nächschti Itrag wird erschiene, will mir wärde nid sofort am Internet agschlosse si. D`Leitige zum Hus müesse erscht no gleit wärde, u wenn das wird dr Fall si, chame wie immer nid säge! Also häbet bitte Geduld, die nächschte „Shishageflüster“ – News chöme bestimmt!

Freude herrscht!

Hüt schriebe mir scho Donnschtig u geschter hei mir d`Schlüssle übercho fürs Hus! „ Freude herrscht“! Mi het üs versproche das e Teil vom Hus wird putzt si bis hüt am Morge demit mir scho e Teil chönnte zügle, Also si Tönel u i am Morge usegfahre ga luege ob däm o so isch. Da stöh mir i dr Stube u luege enand ganz verdutzt ah! Es het zwar kei Bauabfall meh wo umeliet, aber süsch gsehts no immer gliich dräckig u stoubig us. Mir hei üs de Schlau gmacht bi dr Maintenance u die säge ganz klar es sigi putzt! Ohweia da hei mir no chli Arbet bevor mir da chöi Möbel ine stelle! Doch defür funktioniert Klimaalag u s`Wasser louft oh. Das isch ja meh wärt als es subers Hus! Plötzlich schället mis Handy u d`Firma vo dr`Wöschmaschine u Chüelschrank isch dra gsi. Er fragt mi fründli wo är die War chöngi liefere! Wen i Socke hät agha wäri gloub drus use keit! Mir hei nämlich alles la zruggbhalte bis mir dene Firmene Bscheid gä wenns alles chöi bringe. Aber was solls will mir si ja eh im Hus gsi. Drum het me de die War o bracht u installiert. Und mi gloubts fasch nid aber die zwe Maschine loufe emel afe. U scho schället mis Handy wider u wär isch es wohl? D`Firma vom Chochhärd u Tumbler. O die sige uf em Wäg zu üs u frage über früntli wo mir genau dihei sige. Nachdäm i alles erklärt ka ha geits nid lang u o sie si dagstande Dr Chochhärd isch zügig montiert gsi u am elekrische agschlosse. So o dr Tumbler. Alles het dr Testlouf bestande! Aber es git doch no en chliine Hagge. Mir hei nämlich e kombinierte Chochhärd bschstellt. Das heisst Gas u Elektrisch. Wie scho erwähnt, s`elektrische isch keis Problem aber s`Gas! Wohär nä wenn nid stähle? Es het nämlich überhoupt kei Gasaschluss, verschwiege de no es Plätzli wome chönti e Fläsche histelle! S`luschtige isch ja das me fasch nume Gashärd cha choufe u die eim säge es sigi überhoupt keis Problem die gienge überall! Ja klar inepasst het er perfekt! Mir si aber sicher, das o das Problem lösbar isch! Mir hei ja scho fäng Üebig im improvisiere. Im verbiiwäg het Tönel no welle dr Dampfabzug ala. Oje, oje dä macht kei Wank, wie chönnts anders si! Mir hei de churz Maintenance informiert u scho isch öpper aztrabe cho! Früntlich wie immer het er sich däm Problem agno. Mi gloubts fasch nid, alli Kabel hange frei i dr Luft ume u mi het en eifach vergässe azschliesse! Aber es het keini zäh Minute brucht u das Ding isch gloffe. Mittlerwiele si über vier Stund vergange u üsi Mäge hei langsam aber sicher agfange chnurre. Erscht ize hei mir realisiert das mir hüt no gar nüd gässe verschwige der trunke hei.Drum hei mir üs für hüt vo üsem nöie Hüsli verabschiedet u derzue chunt no das Tönel hüt z`nacht ja no uf Münche muess flüge.

Maraton Teil 2

Am Mäntigmorge am 10.00h, ohni Zmorge u numene Kafi im Mage, hei mir üs uf de Wäg gmacht, will hüt steit dr grossi Möbelichouftag uf em Programm. Als erschts si mir i Marina Mall gfahre. Dette hets scho di erscht Verzögerig ghä! Es gitt dette nämlich es Starbuck-Café u wie mir ja alli wüsse, isches es „Must“ dette en Stopp izlegge. Üse Mage het dür das doch scho öppis übercho. En feine, üsserscht gsunde Buttergipfel mit Schoggi gfüllt und emene feine Cappucchino. Dernah si mir de schnuerstraggs id IKEA gstoche. Hie hei mir de scho gwüsst welles Schlafzimmer mir wei, drum hei mir de grad diräkt chönne Bstellig ufgä. Derzue hei mir de ono grad es Gästebett mit allem Drum herum gfunde. Dr erschti Erfolg hei mir also scho chönne verbueche! Wenigschtens scho schlafe chöi mir. Als nächschts isch d`Kuchiirichtig agstande. Für das si mir i Carrefour. Hie hei mir o wider im Schnelltempo Chüelschrank, Chochhärd, Wöschmaschine u Tumbler usgläse. Für d`Abwäschmaschine müesse mir no chli zuwarte, will mi het i dr Chuchi vergässe dr Platz frei z`lah u d`Aschlüss fehle dür das natürli oh! Es Sofa u en Esstisch steit no uf üsem Postizettel. I dr Ikea hei mir nüd passends gfunde, drum simer wiiter zoge is homecenter. Mir hei müesse feststelle das es nid eifach isch es Sofa nach üsne Vorstellige z`finde! Die meischte si so richtig typisch arabische Styl. Wuchtig, schwer mit Holz u dunkle Farbe. Mir hei d`Suechi scho fasch ufgäh, aber us Erfahrig wüsse mir ja, wer suecht dä findet oh! Mir isch plötzli es Lachsfarbigs Sofa is Oug gsprunge u für üs isch grad klar gsi das isches. Dr Ässtisch usläse isch de wider e churzi Sach gsi. Jeze chöi mir nume hoffe, das die Möbel nid lang müesse uf ihri Lieferig warte! Das heisst es staht u fallt mit üsem Husizug. Ja genau so isches mir si immer no im Hotel und warte ufe Termin zum izie!

Marathon!

Samstig morge am halbifüfi bin i ufgstande u pünktlich am halbisächsi bin i abgholt worde vo üsere Hunde- u Büsisitteri Monika ( merci vielmal). Bis de dr Zug gfahre isch am 06.13h ab Zürich-Flughafe, hez mir no guet glängt ga e Kafi mit Gipfeli z`ha. I ha damal müesse dr Zug näh, will i diräkt mit dr ETIHAD-Airways gratis u buechet ab Genf diräkt nach Abu Dhabi gfloge bi. Dr Grund derzue ischs „Residence-Visa“ wo am Flughafe hinterleit worde isch vo Tönel. Eis muess i scho säge, i ha Glück ka u ha dörfe erschti Klass flüge. Am Abe am viertel vor achti bin i guet erholt z` Abu Dhabi glandet. Das mit em provisorische Visum het ou klappet u has chönne i empfang näh. I dr Akunft het mi de Tönel scho erwartet u mir hei de es Taxi gnoh is Hotel. Ufem Wäg det hi het er mir de scho s`morgige Programm düre ghä! Am halbielfi bin i tod is Bett keit. Es isch halt scho en lange Tag gsi. Sunntigmorge am 0800h het de dr Wecker scho wider gschället. Als erschts isch min Medizinische Test uf em Programm gstande. Also si mir is Taxi gstige u is Spital gfahre. Mi muess demit rächne das es lenger cha dure da me sich nid muess amälde für de Test. Also han i agnoh das i nid di einzig wirde si. Aber i ha Glück ka u bi zügig dracho. Wie überall han i zersch wider müesse Formular usfülle, Kopie vom Pass u Föteli abgäh. Wehe mi het öppis nid debii. Mi cha grad wider uf de Absätz chehre. Nach em Papierchrieg het me mi de fründli ufgforderet wider Platz z`näh bis i ufgrüeft wirde. Es isch wider nid lang gange u scho bin i uf em Stuehl ghocket, wo me mir het Bluet gnoh. I ha eifach ghofft, das die gueti Frou mini Adere gfind! Isch nämlich nid so eifach bi mir! Aber ohä lätz. Wusch hets gmacht u die Nadle isch gsässe u mis Bluet isch is Röhrli tropfet. Das isch es scho gsi. Morn chöng i de scho die fertige Papier abhole cho. Erlichteret bin i us em Spital use gwagglet. Als nägschts wartet üses nöie Outo uf üs. Aber o das chame nid eifach eso hole! Zersch si mir zur Versicherig gange, Hie hei mir de nid so Glück ka. Mir hei gwartet u gwartet bis mir ändlich a dr Reihe si gsi . U de was wohl? Ja klar wie überall Formular usfülle. Isch das erlediget gsi, si mir wieter zu üsere Bank ga dr Check abhole vo vorbstellt gsi isch. Das het hingäge wider klappet. Ize geiz uf diräktem Wäg zu dr Garage! Nach wider etliche Formular usfülle u Schilder löse si mir de nach guet zwe Stund stolzi Bsitzer vomene Toyota Prado Land Cruiser. Tönel startet stolz üses nöie Oute, aber scho chunt die nächscht Ueberraschig. Dr Tank isch sozäge lär! Also nüd wie ab zur nächschte Tankstell. Dete hei mir de für Stou gsorget. Mir hei nämlich e chli en „chliine Tank“ 187l ( d`Wüesti lat grüesse) u dä brucht e chli lang bis er voll isch. Üsem Tankwart isch es de e chli z`längwilig worde, u het de i dr Zwüschezyt gmeint er müessi üsi nigel nagel neue u vor allem subere Schiebe putze. Die si de am Schluss emel nümme so suber gsi! Defür het ja dr ganzi Spass nume sächzg Franke kostet! Nachdäm si mir de no zu dr Etihad gange ga wiiteri Formular usfülle für üses Hus u mis Visum. Uf em Heiwäg hei mir de no en Stopp igleit bi üsem nöie Hus zum verschideni Sache usmässe. Will morn steit üse grossi Möbel Ichouf-Marathon a!

Spiessruetelouf!

Scho e Wuche isch wider verbii sit i mini Füess uf Schwyzer Bode gstzt ha! Wenn i wirde zrugg flüge steit no i de Stärne, will s`nächschte mal wird i iireise u Residenz beaträge! Da derzue het Tönel no e chli Arbeit, denn er isch min „Sponsor“ u nu so überchumeni es Visum! Ou i ha no chli ztüe. Muess nämlich üse Eheschii i dr Staatskanzlei z`Züri la begloubige la u derzue han i no müesse e Heimatschii bstelle. Nach all däm u Tönel äntlich im Bsitz vo allne Papier wird si, chunt de e richtige Orientierigslouf uf ihn zue! Zersch muener üse Eheschii nomal la begloubige la bi dr Schwyzerbotschaft i Abu Dhabi. Ja so isches. Begloubigung muess nomal begloubiget wärde! Chömet er druus? Nachdäm muess er de alli Papier uf arabisch übersetze la imene offizielle Übersetzerbüro! Dernah muess nomal alles begloubiget wärde! Het er de das alles erlediget chan er de das ganze Pampfhlet vo Papier dr ETHIHAD übergäh u sie mache de dr Räschte fürs Visum. Tönel überchunt de e Kopie vom mim provisorische Visum wo er de am gliiche Tag won i iireise am Flughafe muess ga abgä. Wohlverstande am gliiche Tag!!! Nachdäm i de igreist bi, muess i de als erschts zum Arzt. Aidstest u Röngge! Isch das alles ok geits de nomal ca. e Wuche bis zäh Täg bis i de mis offizielle Residenz-Visa i de Finger respektive im Pass ha! Chume grad zrugg vo dr Staatskanzlei u ha min Stempel gholt für de Eheschie. Ha de o grad s`Epplers ihre mit gnoh. U es isch fasch nid zum gloube o dä Schie heisi astandslos begloubiget. Aber eis hez mir wider emal zeigt. Üsi Beamti si doch eher Wortkarg. Es knapps " Grüezi u adieu" alles anderi wäri Luxus! Das isch de dr grossi Unterschied zu Abu Dhabi. Det si d`Lüt, näbsch däm ja alles viel komplizierter isch, doch um etliches fründlicher!

Stammlokal!

En Stopp im Sturbuckcafé isch es "Muss"!

Schnappschüss us dr Stadt

The Marina Mall diräkt am Meer

Dr Bewies das dr Elch veträtte isch

"The Emirates Palace" isch sicher vielne en Begriff!

The Abu Dhabi Mall

Blick vo dr Cornich

Äs Müsterli wie die Strasse so heisse....

Shk Zayed the First Street

Zum Schluss nomal e Blick vo dr Cornich us

Frytig isch gliichzietig Sunntig!

Das tönt doch scho guet! Währenddesse Tönel uf sin letschti Flug vor sim Final-Check isch . Han i mir vorgnoh e chli i de Möbelgschäft ga z`stöbere u mi istimme uf d`Husirichtig! Ja richtig „Huusirichtig, mir hei nämlich es Hus gfunde. D`Lag vom Hus schient üs nid all zu schlächt dsi. Es liet am eastern ring, u das heisst, mir hei öppe füfzeh bis zwänzg minute mit em oute bis is Zentrum. Was natürli ou no super isch mir kenne üsi Nachbare scho! Es si nämlich Epplesr! Mir wärde also door a door wohne! Es isch a Compound vo 87 villas mit Pool, Tennisplatz, Gym umene chliene Supermarket. Wänn mir aber chöi izie das cha no grad e gli duure! Wies hie e so schön säge „Inch Allah“! Zrugg zum Möbelaluege! Da en Schwyzerkolleg fasch zur glieche Zyt en Flug het wie Tönel, het er üs offeriert ihn zum Flughafe u mi zum Möbelzentrum Homes „R“us mitzneh. Pünktlich um viertel vor elfi isch er bim Hotel vorgfahre. Luegt mi a u seit: Du weisch was: Hüt isch ja Sunntig u d`Läde mache erscht am Abe uf! Äbe Frytig isch ja Sunntig! I ha Tönel verabschiedet u ha uf de Absätz kehrt u bi zrugg ufs Hotelzimmer. Nüd gsi vo Möbelaluege! Ize ¨gangeni halt a Pool ga riläxe! Am Abe han i eh kei zyt, will i muess natürli ou Fuessball luege!

Mini erschte Erläbnis in Abu Dhabi!

Zersch churz über s`Wätter. Es isch ize zu dere Jahreszyt süttig heiss u füecht wie inere Wöschchuchi. Mi isch froh weme sich cha abchüele. Sigs zum einte im Hotel eigene Pool (wo ja o nid eigentlich chalt isch) oder i klimatisierte Rüm. Aber i wot nid chlage! Es het ja o Vorteil, mi muess sech nie frage wie wird äch s`Wätter morn? U i muess ou nie studiere was i söll alegge!

Wöscherei D`Wösch bringe Dide u Tönel grad ume Egge vom Hotel in e „Laundry“ zum wäsche u glette. Das isch natürli nid e Laundry wie mir üs das vorstelle. Es isch es Lädeli vo ca 3 uf 3 Meter. Sicher nid grösser. Wome hieluegt hez eifach Wösch u nomal Wösch!E so es richtigs Pufflädeli! I I ha mi gfragt wie die dr Ueberblick chöi bhalte wem wie was ghört! Aber bis ize het alles sin richtige Bsitzer gfunde! U choschte tuets ou no e uuuu „Mängi“. I ha grad hüt Tönel sini abgholt: Drü hemmli, drü T-Shirt, Socke u es paar längi Hose. 24 Dirham das si ca. acht Schwyzerfranke !

Huussuechi! Geschter hei dr Dide u i wider emal erläbt wies hie so louft oder äbe nid louft... Am halbizäni am morge hei mir dr Termin gha mit dr Agentur, wo eim Hüser chunt cho zeige wo no z`miete si. Punkt halbizäni si mir vor em Hotel gstande (da wird me abgholt vo dr Agentur) u gstande u gstande. Wie chas anders si, plötzli lütet s`Handy vom Dide u d`Agentur isch dra. Agentur: Wo sit ihr? Ich warte vor em Hotel! Dide: Mir si o vor em Hotel! Vor welem Hotel stöht ihr de? Agentur: Hotel Capitol Dide: Leider falsch. Mir si im Vision! Tja das isch halt s`falsche gsi! Für üs heisst das warte. Gott sei dank ischs Capitol grad i dr nechi vom Vision! Finaly het sis gfunde. Nach churzem erkläre was mir so a Hus sueche isch si los donneret. Mir hei e paar Mal müesse d`Ouge zutue, vor allem we si d`Spur gwächslet het. Si het üs ou gseit dass si nid so viel Zyt heig. Sie heig am erlfi scho dr nächschti Termin. Dr Glu a dere Gschicht isch, mir si über zwe Stund dür die ganzi Stadt kurvt u hei eis einzigs Hus gseh! Die gueti Frou het d`Hüser nid gfunde, am Schluss het si üs esHus zeigt wo dr Dide u Tönel kennt hei! Aber eis müe mir ihre z`guet halte, si isch sehr nett gsi! Am Schluss het si üs no s`Taxi zahlt zrugg is Hotel u het für am Namittag ihri Kollegin ufbotte üs d`Hüser cho z`zeige. Das hingäge isch en Erfolg gsi! Obwohl si ou zerscht vor em falsche Hotel gwartet het! Das isch nume es chlieses Muster wie die Hüser e so usgseh chönte!

Ab in die Lüfte!

Wär steckt wohl hinter dere Maske?

Nach guet drü Wuche Schuelbank drücke u büffle geits ize uf dr erschti ETIHAD-Flug. E sogenannte "Observerflug". So seit me i dr Airline-Sprach u meint demit, das me no nid sälber flügt sondern no uf em dritte Sitz isch u de andere cha über d`Schultere luege.

Da debie het me natürli ou no e chli zyt für e paar Fotene d`schüsse.

Abu Dhabi us dr Vogelperspektive mit dr bekannte Cornich wo direkt am Meer entlang louft. Das isch e Strass u Fuessgängerzone wo sächsehalb Kilometer läng isch u wunderschön begrüent isch. Vorallem am Abe zum Sunneuntergang lohnt es sich ganz speziell en Spaziergang z`mache. I cha leider no nid us erfahrig rede da i ja erscht gange. Für mi heissts aber gli, gli Koffer packe! I Am 19. Juni isch es sowiet!

S`momentane Riech vom Toni!

S`Kafiwasser chochet scho!!!

D`Stube lat zum verwiele i!

d`Schlafkoje

Da wird gschaffet u Skypet!

Ja,ja das gfallt am Töneli!