As-salaamu`alaykum!

wa`alaykum us-salaam! Das git me als Antwort ufs Hello wies im Titel gsteit! Sit guet drü Wuche bin i am Arabisch lehre. Mir si e chlieses Grüppli vo füf Froue u die chöme us vier verschiedene Länder. Kanada, Vietnam, Maleisia u Schwyz. D`Kursleitere chunt us Syrie u isch e ganz e lässigi. Mir heis immer mega lustig. Mir träffe üs drümal i dr Wuche für guet anderthalb Stund u das bi dr Kanadierin diheime. Eis mues i scho säge: Das isch definitiv die schwerschti Sprach won i bis ize agfange ha lehre! I chume mir mängisch scho fasch wien e Erschtklässlere vor wo s`ABC muess lehre! Mir lehre übrigens grad beides mitenand, das heisst rede u schriebe. D`Schrift isch no fasch e chli eifacher als z`Rede. S`Arabisch isch ja e Sprach wo sehr vielfältig isch i dr Tonlage. Mi cha ja, so als Biespiel es ganz normals A, mal kurz, läng, tüf oder höch uspreche u das chame genauso mit em H ou mache! Mängisch wärs guet mi hätti e Halschrankheit, de giengs viellicht e chli besser zum usspräche!!!!! Doch das ganzi isch i jedem Fall spannend u i ha mega dr Plousch. D`Roda, Kursleitere, macht das speziell guet! Bevor nämlich nid alli immer alles gschnallt hei, wird nüd Neuis derzue glehrt. Jedesmal wird ou wider alles repetiert u es git e chlieses Diktat über das wome scho sötti chönne! Mi merkt dür das immer grad sofort wome no en Hänger het u viellicht mal wieder e chli meh i Büecher sött. Chönne tüe mir scho nün Buechstabe vo 28! Doch das isch no nid Alles! S`Arabische het nämlich ouno 14 extra alphabetischi Zeiche u vo dene chöi mir ou scho drü! Aber i bi sicher, es geit no es Wieli bis dir dr erschti arabischi Bricht vo mir chöit läse! Ha Ha

Emirates Palace

Die letscht Wuche han i mit em Üse, dr Brüetsch vom Dide, e Tour gmacht im Emirates Palace. Treffpunkt isch am 20.00h i dr Main-Lobby gsi. Mir si de zersch no ga z`Nachtässe zäme u das e chli pressiert het, isch üs nüd anders übrig blibe als ire Fast Food Bude halt z`mache. Dr Pizza Hut ischs gsi. Isch nid schlächt gsi, aber es git sicher kulinarisch bessers! Am 19.50h si mir de bim Emirates Palace vorgfahre wie die Grosse! Obwohl mir nid grad usegstoche si mit üsem Toyota Prado, hei mirs natürli üs nid la entgah vom valet parking gebruch z`mache. Choschtet ja nüd usser es Trinkgäld für de Porter. Mi chunt sich scho chli als King rsp. Queen vor. Aber das nume e so näbebii will s`Ougemerk söll ja ufs Hotel grichtet si! Drum ize e paar Infos über dä Palast!

Ds Hotel ghört am Staat, das heisst genauer gseit a dr Scheich Familie vo Abu Dhabi, u wird gfüehrt vo dr Hotelchetti Kempinski u gilt als das vo de Usmass här gröschti u luxuriösischti Hotel vo dr Wält.

Im 2001 het me mit em Bou agfange u im Februar 2005 ischs eröffnet worde. Während dere Zyt hei über 20000 Persone dranne gschaffet. Ufgrund vo sire Luxus-Usschtattig bezeichnet mes nid als Hotel sondern als Palast. Ou Bezeichnig vo 7-Stärn Hotel (wies Burj al Arab, Dubai) isch nüd anders als e Eigewärbig, Es git nämlich überhoupt kei Hotelbewärtige wo meh als 5 Stärne vergit.

Architektur

Für d`Architektur isch Wirnberly Allison Tong and Goo ( WATG) veranwortlich. Ds Design isch us traditionelle arabische Elemänt, so wie zum Biespiel die grossi Kuppe u wieteri 114 Kupple wo verteilt si übers ganzi Gebäude.D`Farb vom Hotel si Sandschttierige wo i de arabische Wüeschti vorchöme. Die grossi Kupple im Atrium het e Durchmässer vo 42m u ihri Oberflächi isch mit ächt Gold- u Silbermosaik verziehrt. I dr Ballhalle, wo bis zu 2800 Persone platz hei, isch e Kupple wo 17m gross isch. Die andere Kupple si zwüsche 2,9m u 12m gross.

S`Hotel isch ei Kilometer läng u het en Umfang vo 2,5km u e Flächi vo 243`000m2. Rund ums Hotel isch e Park mit Gärte u Springbrünne u Sandstrand vo eim Quadratkilometer agleit. Dr Triumph-Boge a dr Iifahrt zum Hotel het e Höchi vo 40m u e Breiti vo 36m. Die Iifahrt isch usschliesslich füf de Scheich vo Abu Dhabi u sine glatne Gescht!

Usstattig

D`Gescht vom Emirates Palace wärde i Coral-, Pearl- u Diamond Gescht ufteilt. Isch wohl kei Zuefall, das d`Etihad Airways d`First-, Business- u Economyklass gliech nennt! Jedem Gascht steit en eigete Butler zur Vergüegig.

D`Houptufgab vom Hotel isch, Aläss vo Staatsgescht us allne Herreländer z`organisiere u Internationali Konferänze dürezfüehre u was ou nid darf fähle, Luxus Ferie für de Jet-Set!

S`Hotel verfüegt über 302Zimmer u 92 Suite.

Im Hotel sälber schaffe ca. 2000 Agschtellti us 50 verschiedene Länder. Es het 17 Gschäfft u das natürli nur vo internationale Luxus Marke!

Gschicht

Jedes Jahr findet es Träffe vo allne Regierigsscheffe u Scheichs vo allne arabische Emirat statt um die politische Aglägeheite mitenand z`bespräche. Daderzue lat jedes Jahr es anders Emirat i. Im Jahr 2004 wär das Träffe i Abu Dhabi planet gsi. Dadefür het d`Scheichfamilie vo Abu Dhabi extra es pompöses Awäse la boue u das het amene Palast müesse ähnlich si! Isch klar oder? Da drus isch dr Emirates Palace entstande! Doch leider churz bevor das Träffe hätt stattgfunde isch dr Scheich gstorbe u mi het das ganzi Träffe ane andere Ort müesse verlegge. Nachdäm het me de erscht beschlosse, dä ganzi Palast als Hotel z`nütze!

Kuppe Atrium

Marmorboden Atrium

Iiblick ine Suite Masterbedroom

Badzimmer

Esszimmer

Teppich

Lüchter

Luluiland!

Mit zwöi Boot, vollbepackt mit Lüt z`Trinke u Ässe, si mir letschte Frytig is Meer gstoche! Lulu Iland ischs Ziel gsi. Das isch die Insle wo diräkt vor dr Corniche vo Abu Dhabi lieht. Die khört am Scheich u isch also i Privatbsitz. Aber das het üs nid kümmeret. Nachere rasante Fahrt vo ca. zwänzg Minute hei mir de d`Anker ganz nach vom Strand gsetzt. Es het nid lang duuret u alli heis s`Bad im warme Wasser gnosse! Usser di chlienschte Sprösslinge heis vorzoge diräkt a Strand z`ga für e Sandburg z`boue! Für Tönel u mi ischs übrigens alleri erschti mal gsi, das mir im Meer si ga bade sit mir hie si! Nachdäm mir de über e Stund im Wasser ghocket si, het me üs de gfragt wär interässe hätti zum Wasserschiene. S`Echo isch gross gsi. O i ha mir die Glägeheit natürli nid welle la entgah! Mir hei de uf das Boot, wo dir ufem Föteli unde gseht gwächslet u scho si Motore gschtartet worde u mir si es bitzeli wäggfahre vom Strand. Die erschti Person wo gfahre isch, isch dr Paolo gsi (Arbeitskolleg vo Tönel). Er het üs kurz spitz zeigt wiemes macht uf em Monoschie! Es het uf jedefall sehr schön usgseh. Als nächschts bi scho i dra gsi. I bi ja scho gspannt gsi ob si no schaffe überhoupt usem Wasser z`cho. D`Schwümmweste u Schie hei passt u scho bin i am Ändi vom Seili ghanget. I ha scho chli es mulmigs Gfüehl ka. Es isch doch mängs Jahr här sit em letschte Mal.Muetig han i s`Zeiche gä zum starte. Aber chum heis Gas gä bin i scho gfloge. Usser das i e chli Salzwasser gschlückt ha isch nüd passiert. Zwöite Versuech isch agseit gsi. Da derzue het mir de dr Paolo o no gueti Tipps gä. Mi het wider Gas gä, u zu mim erstuhne, i has gschafft. Am Afang bin i nume hinterem Boot härgfahre u has scho so gnosse. Mi het mir de Zeiche gä, i sölli doch mal über d`Heckwälle uf d`Siete use fahre. Alle Muet han i zäme gno u bi näbe use gfahre wo ja o guet gange isch. U wiemes e so het, mi wird muetiger u übermüetiger. Nachdäm i doch e paarmal, für mini Verhältnis, guet hin u här bi han i halt wider emal zviel welle! Es het mi de sofort gschtraft! I bi wie im Salto Mortale gfloge. Sogar dr Schie han i verlore. Aber o das het mir nüd gmacht. Eis isch sicher es isch mega gsi! Für mi isch de aber Schluss gsi u die nächschte si dra gsi zum fahre.

Nachdäm mir alli wider zrugg si gsi vom Wasserschiefahre hei mir de gmüetli Zvieri u es Bier gnosse u nomal es Bad gno. U glii drüberabe hei mir de scho wider müesse alles zäme packe u üs uf de Heiwäg mache.

Während der Rückfahrt isch d`Sunne langsam under gange u mir hei nomal die schöni Ussicht uf Abu Dhabi gnosse!

Grüessli vo dr Simba u dr Chitta!

Das isch min nächtlech Hochsitz! Uff isch das aschträngend z`loufe im Sand! Häb mi nid so fescht es isch viiel z`heiss! Immer han i müess sitze debii han i doch s`Ghudi welle! Währendem Tag gangeni albe nume churz verruse! Uff o s`bade macht müed!

Mir si doch e schöns Päärli!

Ja ja, ihr gsehts richtig! I ha wider emal e Verband! I ha am Strand mini Chralle abgrisse! Uiiii das het aber nid schön usgseh! D`Andrea isch de mit mir i d`British Veterinary Klinik u dette het me de mini Pfote untersuecht u gseit es giebi zwe Möglichkeite. Die Einti wär gsi, eifach si la bis dr Nagel wider nahwachst, das hätti aber Monate brucht u i hätt de die ganzi Zyt müesse en Verband träge, was ja o nid lustig gsi wär. Die ander Möglichkeit isch gsi, Kralle operativ z`entferne!

D`Andrea isch für di zwöiti Variante gsi! Oje oje scho wider e Vollnarkose! I has de öppe gse!!! Aber wie dir gseht han i o Die guet überstande u bi scho fasch wider die Alti! Morn gangeni ga dr Verband ga wächsle u nächschti Wuche chöme scho d`Fäde use u i darf ab denn de scho wider ga bade! Jupiiiiii

Vorhäng!

Am Sunntig nach üsne Ferie hätte eigentlich sölle üsi Vorhäng glieferet wärde! Aber wies halt e so isch da, sisi de erscht am Mittwoch cho! Montiert sisi am 20.00h worde. Das isch normal hie. Mit emene Bund Stöff sisi atrabet u hei de agfange montiere! Chum heisi agfange ka, ischs mir scho chli komisch vorcho, will mi hets dünkt, die hange e chli höch! Dr Vorhangmönsch het de gmeint es sigi genau 2m50. Super i ha alli uf 2m40 bstellt. Jä nu han i dänkt wäge dene 10cm chunts ou nid so drufa! Aber ohä, d`Nachtvorhäng (bruchts will es heit kei Store ade Fänschter) si alli 2m50 oder sogar 2m60. Hingäge die dünne wysse Vorhäng si alli 2m40! Also nüd gsi mit montiere! Alles wider mitnäh u neu mache isch deviese gsi, ausser d`Nachtvorhäng im Schlafzimmer u im Gästezimmer. Die het me de montiert u wie! Doch i muess eis säge, da chöi d`Vorhängmönsche nid viel derfür,

es isch eifach schlächt gmuuret u die Wand isch usenand bröcklet!

E so hets de am Schluss im Schlafzimmer usgseh! Gsamthaft hets 16 Löcher i dr Wand ka! Das tuet scho chli weh! Die einzige wo komplett u passend montiert worde si a däm Abe, si die i dr Stube u im Büro gsi. Isch doch scho öppis u schön gsehts ou us Mi het üs de gseit das die fählende bis am nächschte Tag gnäit wärde us si wider chieme! Wärs gloubt hei mir für üs dänkt! U so ischs ou gsi. Mir hei eifach nümme ghört vo dene u mi het wider müesse telefoniere u nafrage. Das het de hingäge gnützt u mi isch de wider mitere biegi Stoff verbie cho! Aber leider het die Biegi nid glängt! Es hei nämlich wider es paar Vorhäng gfählt! Aber mi si ja nid pingelig u si froh gsi, si wenigstens die im Schlafzimmer u Gästezimmer komplett gsi! Also es het nur no ei Rum gfählt. Isch doch scho guet! Die si de aber würklich am nächschte Tag glieferet worde u passt heis ou no grad! Juhui!

I dr zwüschzyt isch ou üsi Wand wider gflickt u es gseht scho fasch perfekt us!

Mit däm Bricht han i eu allne nume mal welle zeige, mit was für Problem mir üs hie müesse düreschlah! Es brucht würklich Närve wie Drahtseili.

Acht Pfote uf Reise!

23.September 2006 am 20.30h! D`Lifttüre geit uf i dr Akunftshalle z`Abu Dhabi u zwe Boxe, eini e chli chliener u di ander es „bizzeli grösser“, wärde ufeme Wägeli usegstosse. Mir hei üsi zwöi Viechli wider chönne i Empfang nä! Sie si no e chli pläm, pläm vo de Medi, aber schüsch alles guet überstande! Aber jetze di ganz Story vo Afang a. Die letschte zwei Wuche hei mir üsi Ferie i dr Schwyz verbracht mit em Ziel dr Transport vo Hund und Chatz z`organisiere. Näbe de nötige Impfige hets no es Gsundheitszügnis brucht vom Veterinär. Was aber keis Problem gsi isch zübercho. Churze bsuech bim Vet mit beidne, u scho ha i d`Zügnis mit de nötige Stämple i de Finger ka. Chippet sis ja scho. S`Import Permit hei mir vorgängig scho in Abu Dhabi organisiert. Somit hei mir scho alli Formalitäte ka wos brucht für Tier z`importiere i de Vereinigte Arabische Emirat. Als nächschts geits ume Transport. Es git nämlich es neus Gsetz i dr UAE wo vorschriebt, das Tier nur no per Fracht u nid als Uebergepäck dörfe gschickt wärde! Drum han i de are Spedition i Gänf aglütet, zum e Offerte z`übercho was es würdi choschte Hund und Chatz mit Luftfracht z`transportiere. Ui ui ui, wo mir dr Pries gseh hei, hei mir de o grad drümal lähr gschlückt. Satti zwöiahalbtusig Franke hät das kostet! I dr Zwüschezyt het aberTönel mitem Stationsleiter vo dr ETIHAD-Airways i Gänf telefoniert zum genau wüsse wie das ablouft mit em ganze Transport. Dä het ihm klar gseit, er akzeptieri immer no Tier als Übergepäck, er heigi no nie öppis schriftlichs übercho, dass das nid zueglah sigi! Einzig mi müessi Tier i dr Fracht uslöse z`Abu Dhabi! Da dermit het er gmeint, dass mir si nid dete überchöme wo o s`Gepäck achunt! U dr Glu am ganze isch no, das es billiger isch! Isch ja klar hei mir üs de für dä Wäg entschiede. Am Tag vo dr Abreis si mir de scho chli nervös gsi! Am 0500h het dr Wecker gschället u de isch es so richtig los gange! Tönel isch dürs ganze Hus gspeedet zum luege ob würkli alles ok isch u i ha de no dr Räschte packt für üsi Viecher! Für e Kafi hets sogar ono glängt. Am 06.10 ischs Mietouto voll glade gsi mit allem drum u dra u mir hei üs uf e Wäg gmacht richtig Gänf! Dr Chitta hei mir sogar no e Schiesschiste is Outo da, für das si ihres morgentliche Gschäft chönti erledige. Wiet verfehlt. Mit mehrmaligem Versuech sie i d`Chischte setze het o das nüd gnützt. 09.30h si mir de am Gänfer Flughafe vorgfahre. No zwe Stund bis Abflug. Chitta het ab däm Zytpunkt i Box müesse u d`Simba het no e chli Schonfrist ka. S`Check-In isch riebigslos über Bühni u am viertelvorelfi ischs de sowiet gsi u mir hei Hund u Chatz i dr Box abgäh! Isch scho e chli es komisches Gfüehl gsi! Mi macht e so sini Gedanke: „ Hoffentlich geit alles guet oder hoffentlich wärdes am richtige Ort verlade usw. usw.“ Zum Glück hei mir ou nümme viel zyt ka zum studiere, will mittlerwiele isch es scho vierzg Minute vor Abflug gsi, u mir hei diräkt as Gate müesse fürs Istiege! Dr Flug het füf Stund u füfevierzg Minute duret. Pünktlich, oder no besser, sogar e paar Minute zfrüeh si mir de i Abu Dhabi glandet! Dr erschti Gedanke isch natürli gsi, wie geits wohl dr Simba u dr Chitta? Mir si schnäll dür Passkontrolle cho u mitem Gedanke, hoffentlich chunt s Gepäck gli, damit mir so schnäll wie möglich i d`Fracht chöi zum sie go abhole u verzolle! Im verbie Wäg i dr Akunftshalle wos Gepäck achunt, het Tönel e Agstelle gfragt wo d`Fracht sigi, da mir no Tier heige zum abhole! Däjenig het de gmeint sie bringe sie hie hi! Mir hei de agnoh mir heig ihn falsch verstande, das ja nid immer eifach isch all die verschidene Lüt, wo vo all jene Länder chöme , z`verstah. Während i de ufs Gepäck gwartet ha het Tönel de no zwe wieteri Persone gfragt u die hei ihm immer di gliechi Antwort gä! Hie i dr Akunftshalle. Mir heis fasch nid chönne gloube, Drum isch üs nüd anders übrig blibe als z`warte u hoffe es sigi e so. Zudäm hei mir ja eh ono müesse ufs s`Gepäck warte! S`Förderband faht a loufe us Gepäck vom Gänferflug isch druff. Chum hei mir üse Koffer ka, geit scho d`Lifttüre uf u äs Wägeli mit zwe Boxe druf chunt ine! De räschte kennet dir ja! Nachdäm mir üsi zwöi Viechli i Empfang gno hei, si mir de Schnuerstracks zum Zoll gange. Mir hei müesse anäh dass das e lengeri Sach wird gä! Di nötige Papier hei mir de vorgängig scho füre gno. Dr Zöllner het churz gfragt ob mir alles nötige heige u het nume s`Import Permit welle gseh. Dernah luegt är üs a us seit: OK! Tönel u i hei enand verdutzt agluegt u hei s`Wägeli mitem Gebpäck u Boxe gno, u si schnuerstracks düre Zoll usegloffe! Niemer het nur de Chopf nach üs dräit zum öppis Frage oder no meh Papier z`gseh! Ungloublich! Dr Simba u dr Chitta steit somit nümme im Wäg ihri erschte Pfötli uf Abu Dhabi Bode d`setze! Lang hei mir uf dä Momänt gwartet u umso grösser isch üsi Freud gsi!

Die Vereinigten Arabischen Emirate!

Die Vereinigte Arabische Emirat si es Land wo us siebe Emirat besteit. Dr Presidänt isch dr Scheich Zayed Bin Sultan Al-Nahayen.

Abu Dhabi: Das isch d`Houptstadt vo de ganze vereinigte arabische Emirat. Abu dhabi heisst so guet wie " Vater der Gazellen". Zudäm isch d`Inselstadt bekannt für ihri schöne, begrüente Strasse u Pärk, sowie für die viele einzigartige Springbrünne.

Dubai: E Stadt voller Gägesätz. Uf dr eine Siete gits no e alte, sehr schöne, vorallem sehenswärte Stadtteil u zu dr andere Siete spriesse moderni Wolkechratzer nur so zum Bode us! Dubai wird o öppe no " The City of Gold" oder " The City that Cares" gnennt.

Sharjah: Nennt me "the City of Knowledge". Isch bekannt für schöni architektonischi Gebäude wie Museum, Moschee u typisch islamischi Markthallene.

• Ajman: Das ischs chlintschti vo allne Emirat. Dete trifft me sehr viel Landwirtschaft a!

Fujeirah: Bekannt fürs Gebirge, wie sowohl für die unberüehrte, schöne Sandstränd.

• Umm Al Qaiwaind. Das ischs Sägelparadies u d`Naturfründe chöme hie hi für " bird watching".

Ras Al Khaimah: heisst soviel wie "headland of tent". Isch eine vo de schönschte Fläcke i de Emirat. Es isch umringt vo Wasser, Wüesti u Bärge. Iladend isch ou es Bad i eim vo de Wasserfäll wos het.

Outofahre het so sini Tücke!

Uf de Strasse vo Abu Dhabi erläbt me scho so etliches. Grad vor e paar Täg bin i anere Chrüzig gstande zum links abbiege u ha rot ka. Hinter mier isch niemer me gstande. Plötzlich gsehn i im Rückspiegel es Outo uf mi zue fahre imene hölle Tempo wo Liechthüpelet. Ha nüd wieter dänkt, ha ja schliesslich rot ka! Aber ohä, dä isch immer necher cho ohni es bitzeli abdsbremse. De köre is nurno quietsche hinter mir u gseh im Rückspiegel das dä fadegrad uf mis Outo zue schlieft. Reflexartig han i de min Fuess vo dr Brems gno u bi uf d`Chrüzig use grollet. Dä Typ het nüd anders gwüsst als wieverruckt z`wättere, anstatt viellicht z`überlegge das i ja richtig igspuhret bi gsi u är ja eigentlich gradus het welle wos ja würklich grüen wär gsi! Aber äbe e Spur näbe dra!

> Da derzue chani ou grad no säge das Tempolimite nid für alli gälte. D`Regel isch aber, das me erscht ab 20kmh über dr Tempolimite blitzt wird. Radar chäschte gits vili u a de Liechtample hets meischtens ou en Chaschte. Drum fahrt me hie voll güsel vo eire Liechtample zu der andere. Wehe du fahrsch s`vorgäni Tempo. Mi isch konstant dr bschissnig, will alli fahre dir wider vo z`Schnörre. Also chunsch fasch nid vom Fläck. Also bliebt dr nüd anders übrig als ou voll Güsel uf d`Ample zue z`fahre. Es het o Vorteil! Solang mir ja no nid wüsse wo all die Radarchäschte stöh, chöi mir eifach uf die ander Luege, we die plötzlich ihres Tempo drossle u uf Bremse stöh, chasch sicher si da muesses en Chaschte ha!

> O Outobahn fahre het e so sini Tücke. Natürlich gilt o da 20kmh me als vorgä. Aber das gilt gloube i vor allem für d`expat! (Usländer) D`Locals (Iheimischi) kenne überhoupt kei Limite. Mi fahrt ja o demna es Outo. Mi munklet sogar, das die gar kei Buesse müesse zahle. Kunschdück, will die verwächsle gloubeni ame d `Outobahn mitere Outorennstrecki.

> Die Wuche won i Tönel zum schaffe bracht ha, z`nacht um die 24.00h, hei mir ou nid schlächt gstunet. Näbsch däm üs d`Locals wider emal um d`Ohre gfahre gsi , wohlverstande mir si oscho guet mit 120kmh unterwägs gsi, chunt üs doch bigoscht e Velofahrer ( ohni Liecht) entgäge uf em Pannestreife! Da stunsch aso nid schlächt, D`Outobahn isch ja nume vier- respektive achtspurig u die Spure si vomene schöne begrüente (Palme) Mittelstreife trennt. Ja klar, mi sötti bigoscht meine es heigi no gnue Platz für „ Velofahrer“! Es git nüd was nid git. Mi muess nämlich o mit Fuessgänger rächne wo d`Bahn wei überquere! Ihr gseht, hie isches definitiv nid möglich wie en Sunntigsfahrer dür Gägend z`kurve, aber spannend isches alleweil!

Härzlich willkomme!

Leider hei mir immer no kei Internet im Hus, Was scho chli bemüehend isch. Aber nid desto trotz, flüsteret d`Shisha wider emal! Drum machenis churz u bringe euch üses neue dihei i digitaler Form zu euch i d`Stube! Also chömet ine:

Igang

Chuchi -

Äntlich hei mir üsi Kafimaschine!

Loundry! Ornig muess si!!!

Aessegge

D`Stube mit TV

Büro

Gäschtezimmer u Bad Ueses Schlafzimmer

Da e chliene Blick i üse "üppige Garte"!