Souk

Ja, ja es git en no. Mi muess ihn zwar e chli sueche u er wird ou immer wie chlinner, will er neue, moderne Boute muess wieche.(Was würklich schad isch.) D`Red isch vom ursprünglich alt ehrwürdige Souk (Märt) wo me Teppiche u all die verschiedene arabische Sitzchüssi cha choufe. Sit mir is Hus züglet si, schnurre ig dervo das ig es Zimmer ganz im arabische Stil möchti iirichte. Letscht Wuche isches de sowiet gsi u Tönel u ig hei üs uf d`Socke gmacht richtig Souk um äntlich min Wunsch vo arabische Sitzchüssi z`erfülle. All die chliene Lädeli si vo z`unterscht bis z`oberscht gstopft mit farbige, zum Teil sehr kitschige, Teppiche, Chüssi, Techene u vieles meh. Gfüehrt wärde die Lädeli usschliesslich vo Afghane.

Wo mir de dette vorgfahre si isch mir sofort e Chüssistoff is Oug gstoche u d`Wahl isch quasi scho gfalle gsi. Während Tönel s`Outo parkiert het, han ig mini Bschtellig scho probiert an Ma z`bringe. Es isch bigoscht nid eifach, will die meischte rede nid sehr guet Änglisch u mis Arabisch isch bei weitem no nid so guet das ig chönt i dere Sprach verhandle – aber mir heis ou so gschafft. Ize ischs nur no ume Pries gange. Es isch immer no Usus das me ume Pries händelet. Das isch gar nid so eifach, will mi weiss überhoupt nid, wie viel das en agmässne Pries wär für die War. Aber schlussäntlich ischs ou nid so wichtig, will das Ganzi isch eh „billig“ u zudäm machts s`Ichoufe ou spannend! Mir si üs de aber no schnäll mal übere Pries einig worde u beidi Parteie si zfriede gsi.

Während mir s`offerierte Coci fertig trunke hei, isch üses Outo mit all dere War wie Chüssi u Teppich glade worde. Uf diräktem Wäge si mir de heigfahre u ig ha mi u gfreut üse „Familiy-room“ mit dene arabische Sitzchüssi izrichte.

Uns so gseht üsi neuschti Errungeschaft us!

Lulu und Shangri-La

Tönt nid würklich arabisch, oder? Lulu isch e Insle wo diräkt gägeüber vo dr Corniche lieht u isch im Bsitz, wie chönnts nid anders sie, vo dr Herrscherfamilie vo Abu Dhabi, u isch nur mit Boot erreichbar. Mi hets scho lang ghöre munkle, dass die Insle irgendwenn mal söll für d`Öffentlichkeit zuegänglich gmacht wärde, u tatsächlich! Sit e paar Mönet isches sowiet u Jedermann/frau darf sich a dr Sunne ga brätle uf Lulu-Island. Us minere Sicht dä Ort wome die schönschti Ussicht het uf d` Skylines vo Abu Dhabi. Vor guet eire Wuche si mir i Gnuss cho z`Skylines wärendem schwümme chönne z`bestuhne, Dank amene Bruefskolleg vom Dide u Tönel wo üs het mitgno mit sim Boot.

Chum hei mir dr Anker gsetzt gha, ischs ab is "chüele Nass"

Eifach "mega" die Ussicht

Ei Blick nach links eine nach rächts nüd als Sand! Oder doch.....?

Tja, wär höcklet de da u gniesst es bitzeli Schatte?

Dr Üse, dr Brüetsch vom Dide u Daddy vo mim Göttibueb u s`Töneli!

Lueg emal, das wärs doch!?

Daderzue fählt üs aber doch no s`nötige Chliegäld

E wietere Tag mit eme wunderschöne Sunneuntergang isch z`Änd gange. Einisch meh han ig ihn müesse Fötele u es wärde sicher no meh wärde i dr Zuekunft, will hie sisi würklich uffallend schön!

Nach däm tolle Tag hei mir de dr Abe no abgrundet mit emene Nachtässe im Hotel Shangri-La, das grad erscht Eröffnet worde isch. D`Lag vom Hotel chönti nid besser si für üs. Keini zäh Outominute vo üs entfernt u zwar diräkt am Wasser mit Blick uf die grossi neui Moschee.

Einisch meh, uffallend schön s`ganzi Dekor

E Teil vo dr Zuefahrt zum Hoteligang

Büffet hets gä

Mmmm soo vieli, gueti Sache! Arabisch, thailändisch, indisch, japanisch u no vieles meh hets gä. Ig bi churzspitz überforderet gsi, u ha chum gwüsst wo ig söll afah u wo ufhöre!

Die zwöi hübsche "black and blond Ladies"

Karin u Franziska

Grilliere zmitts i de Düne

Letschte Sunntig isch e chlieni Dünefahrt mit aschliessendem grilliere uf em Programm gstande. Troffe hei mir üs, geng wie geng, bim Carrefoure wo bi üs i dr Nächi isch. Träffpunkt isch am 15.00h gsi. Mi weis nie so rächt wär chunt u wär nid, will es cha cho wär wot u Zyt het. Ig bi damal mit de dütsche Kollege Elke,Peter u de beide Chind Johann u Jette mitgfahre, will Tönel für einisch wieder emal het müesse schaffe.

Fäderfüehrend für all die Aläss isch e Schwyzer, Felix, u e Südamerikaner, Dimitris, wo mitere dütsche verhüratet gsi isch. Die beide wohne scho es wieli hie u si richtigi agfrässni, erfahreni Sandfahrer. Ohni die beide würde mir dr Wäg us dr Wüeschti sicher chum meh gfinde! Da geit nüd ohni es GPS!

Das nume grad so näbebie. Am 15.15h si mir de im Konvoi, alles i allem siebe Chäre, dicht a uf de Färse vom Felix losgfahre. D`Fahrt het nid lang duuret, öppe e halb Stund vo Abu Dhabi e wäg, bis mir d`Luft us de Pneu gla hei.

Für e Peter ischs die erschti Dünefahrt gsi u umso meh si de d`Elke u ig gspannt gsi wie das ganzi wird loufe. Die folgende Föteli bestätiges, er het Muet zeigt u hets ou super gmacht.

Er isch nume einisch versoffe u das erscht no harmlos verglieche zu de andere! Ig spriche vor allem ihn mit em Jeep a! E so chas eim ga u de brucht me de ou e chli länger bis me de Charre wieder frei gschuflet het. Näbscht däm ischs ou sehr Schweisstriebend!

Zudäm isch üs Zyt dervo gloffe u d`Sunne isch langsam aber sicher undergange. Drum si mir de grad a däm Platz bliebe für üses BBQ. Sofort hei alli Händ agleit u Tische u Stüehl ufgstellt u d`Manne hei sich am Füür gwidmet. Es het nid lang brucht u s`Fleisch het fein brutzlet uf em Profi- oder Hobbygrill!

Derwiele hei mir es feins chüehls Bier gnosse u gmüetlich der Sunneuntergang gnosse u e paar tolli Fötel gschosse.

Mulmig ischs üs de erscht worde nachdäms de stockfieschter worde isch, will mir si ja no immer mits i de Düne gsi u es sigi nid so eifach z`fahre bi Finsternis! Doch das feine Grillierte u dr Hunger het de die Gedanke schnäll gmacht z`vergässe . Es grosses Merci a d`Elke u Peter wo s`ganze Ikouft hei u mi Iglade hei.Leider isch Zyt viel z`schnäll verbie u mir hei wieder alles müesse zäme packe u d`Motore müesse starte. De Felix het klar s`Kommando übernoh u het dütlich gseit, es wärdi im Konvoi gfahre bis mir wieder feschte Bode under de Räder hei! U los ischs gange – scho bi dr erschte Düneüberquerig isch dr erschti scho hocke bliebe.

Also nüd wie Usstiege u hälfe. Zum Glück ischs e churzi Sach gsi u wieter ischs gange.

Komischs Gfüehl isches scho, bi Dunkelheit über die Düne z`fahre. Chum ischs Outo voreim hindere Düne verschwunde, het me kei Ahnig me gha wo er isch. Mi gseht nid emal meh siner Liechter! Drum isch es wichtig gsi, immer uf alli z`warte. Mir hei de aber alli wohluf u mit ganze Outo dr feschti Untergrund erreicht. Dimitris het churz gmeint es gäbi de e chliene Umwäg bis mir de wieder uf dr normal Strass sige u isch de allne vorgfahre bis mir quasi ane Chrüzig cho si wos nur no rächts oder links gange isch! Niemer het me gwüsst wo düre. S`Problem isch eigentlich gsi, mi het nid gwüsst ob die Pistene durchgehd si bis zure Teerete Strass. Drum hets für üs nüd anders gä als z`warte u dr Felix u dr Dimitris si ga uskunschafte mit ihrne Chäre. Das het mi de aber nümme gross beunruhigt, da mir ja mittlerwiele feschte Bode under de Füess gha hei.

I bi de usgstiege u han mir de gmüetlich e Zigi azündet. Es het guet e viertel Stund duuret bis dr Dimitris miteme lächle ufem Gsicht retour cho isch. Was soviel bedüdet het, dass er dr Usgang usem Sand gfunde het. Churz drüberabe isch ou dr Felix wieder bi üs gsi u mir si wieder los gfahre bis zur nächschte Tankstell zum Pneu ufpumpe u dette hei mir üs de ou vo allne verabschiedet u tschüss gseit bis zum nächschte Mal.

Liwa

Lieht öpe 190km im Süde vo Abu Dhabi . Gsamtflächi belouft sich e Teil übere Oman, Yemen, de UAE u dr gröschti Teil ghört zum südliche Saudi Arabien. Mi seit, es sigi eini vo de gröschte Oase vo allne arabische Länder. Bekannt isch Liwa vor allem ou wäge de Düne. Es git chum en Ort wos so höchi git. Nämlich bis guet 300m höch. Was ou sehr beidruckend isch, we me i d`Ferni luegt gseht me nüt als Sanddüne bis an Horizont ohni irgend es azeiche vo Zivilisation. Ou d`Farb vom Sand isch rötlich nid wie hie i Abu Dhabi wo er wysslech-brun isch.

Drum het de Tönel am letschte Donnschtig die Glorriechi Idee gha, churzfristig es Usflügli det hi z`mache mit dr Corinne und em Marc. Er het churzspitz s`Telifon packt u zwöi Zimmer für ei Nacht reserviert im Hotel Liwa u guet zwe Stund später si mir scho putzt u gschtrählt im Outo ghocket u si Richtig Süde gfahre.

Es isch gäge di vieri gange wo mir de Liwa erreicht hei. Als erschts hei mir de Zimmer bezoge u mir si gspannt gsi uf d`Ussicht vo dette, will mi het üs gseit das sigi die schönschte Zimmer mit dr beste Ussicht! Churzum dr Vorhang zoge u ufe Balkon. Naja, so wäge schöner Ussicht! Als erschts si üs Strom u Hochspannigsleitige mit Blick uf Liwa im Hintergrund is Oug gsprunge. Weme de scharf rechts gluegt het, hets doch no e Blick uf all die Düne gha! Die hei doch de wenigschtens scho Idrücklich usgseh!

Nachdäm hez de scho fasch pressiert, will mir hei dr Sunneuntergang nid welle verpasse. Also nüd wie los, will vo Liwa us gits e Strass vo 30km, wo eim quer dür die wunderschöni Dünelandschaft füehrt. Es het sich ou bestätiget, das dr Beschrieb i üsem Reisefüehrer nid übertriebe isch. Düne bis a Horizont ohni irgend es Azeiche vo Zivilisation. Eifach fantastisch!

Hotel Liwa

Wäm ghöre die Abdrück?

Warte ufe Sunneuntergang

Nachem Nachtässe hei mir de üs no es feins Fläschli Wy gönnt!

Am andere Morge hei mir de no gmüetlich Zrmörgelet bevor mir de üsi Heireis wieder under d`Räder gno hei. Die folgende Fotene si alli während dr Heifahrt ufgnoh worde.

Da hei mir üsi gueti Müeh, chönne still z`stah ohni z`versinke u abzrütsche!