Oschtere!

Bereits wiet über ei Wuche isch scho wieder vergange sit ig die nasschalti Schwyz ha verla. Hie i Abu Dhabi hets Wätter ou wieder gänderet. Es isch wieder merklich wärmer worde u umsomeh gniesse mir die churzi Zyt vom verrusse chönne sitze bevor üs d`Hitz wieder schier erschlaht!

Am Samstig simer bis Epplers, mit Lembachs und Bsuech zum Oschterbrunch iglade gsi. Alli beteiligte hei öppis derzue bietreit u s`Resultat gseht me uf de Föteli. Es het a nüd gfählt.

Mmmmmmm

D`Franziska het üs überrascht mit däm feine Buttezopf u dere schöne Tischdekoration!

Mäge si gstopft u alli si rundum zfriede

Wäm lose ächt die beide so gspannt zue?

Nach däm kulinarische Brunch isch geschter s`Oschterprogramm kulturell wieter gange.

Zur Zyt findet i Abu Dhabi vom 22. März bis 02. April, s`füfte „Music and Arts Festival“ statt.

Geschter isch es Konzärt vom London Philharmonic Orchestra im Emirates Palace ufem Programm gsi u das hei mir üs nid la entga. D`Elke het churzspitz für üs alli Tickets organisiert. Danke Elke! Gspielt heis Mozart, Sergei Prokofiev u Maurice Ravel. Mir het nid alles gfalle (isch halt Gschmacksach) zudäm bin ig ou nid di grossi Kennere vo dr klassische Musig aber nid desto Trotz hets mi uuuuuuu schön dünkt. Näbscht em lose isch ou scho nume s`Ambiente oder de Musiker zueluege e Ougeweid gsi. Das isch sicher nid s`letschte klassische Konzärt gsi wo ig bsuecht ha!

Hübsch u gstylt die drü Ladies Brita, Franziska u Elke!

Tönel als Hahn im Chorb! Het er das ächt gnosse?!

D`Elke het das Foto leider e bitzeli vergwagglet!

Hüt, Oschtermäntig, isch e entscheidende Tag für üs! Tönel het sini Kündigung bi dr Etihad igreicht. Nach guet zwöi Jahr wärdi mir das Abentür „Wüeschti“ beände u wärde gäge ändi Juni wieder definitiv i d`Schwyz zruggchehre. Tönel het e neue Teilzytjob bi dr SAT (SWISS Aviation Training) agno. Tja, drum wie heissts so schön: Alles hat ein Ende nur ...............! Umsomeh wärde mir die letschte drü Mönet nomal so richtig gniesse bevors de definitiv as Ghoffere packe geit. Aber kei Angst d`Shisha wird bis as bittere Ändi wieter flüschtere!

H.H.Sheikh Sultan bin Zayed Al Nayhan grand Mosque

Es isch en wahre Luxus! I Sitze gediege i dr Business Class vom Flug EY051 richtig Gänf. Gniesse es feins Gläsli Rotwy, dr Laptop uf de Bei u so schriebe ig a mim nächschte Bloggeritrag. Dr Grund wieso ig für churzi zyt id Schwyz reise isch: Min Gottebueb Dennis wird am Sunntig konfirmiert u da darf ig doch nid fähle! Tönel sitzt derwiele z`Abu Dhabi u hocket sini Resärve ab u kuriert zudäm sini Erchältig us.

So, ize aber zum eigentliche Thema vo däm Bricht. Nid wiet vo dette wo mir wohne isch eini vo de Weltgröschte Moschee bout worde. Für mi ischs es absolut troumhafts Bouwärck. Weme mit em Outo Richtig Abu Dhabi fahrt, isch das s`erschte wo eim id Ouge sticht. Mi het einisch meh nume s`beschte vom beschte a Materialie brucht. Wysse Marmor, Swarovsky Glas u Gold präge der ganzi Bou. Nach etliche Bouverzögerige ischs äntlich sowiet u die ganz Moschee isch frei vo allne Bougrüscht. Näbscht de Umgäbigs- u Belüchtigsarbeite isch das Bouwärch quasi fertig!

Ig ha scho lang druf gwartet, das Ding äntlich chönne z`Besichtige. Leider het me lang nid gwüsst, obs für Nichtmuslime ou möglich wird si, doch vor e paar Wuche isch Bestätigung cho u sogar sogar i dr Zytig ischs gchriebe gsi, dass es spezielli gfüehrti Toure wird gä für Jedermann. Einzigi Bedingig wo sötti ighalte wärde isch, das me sich de muslimische Begäbeheite apasst. Das heisst: Froue sötte nid eng aliegendi Chleider träge u Arme,Bei und Haar sötte bedeckt si u Männer sötte vor allem Arme u Bei bedeckt ha. Die nötige Chleider chönne sogar vorort usglehnt wärde. Ig has de hingäge vorzoge u churzspitz en eigete „Abaia“ kouft. Das ischs mir definitiv dr Wärt gsi.

Die letscht Wuche ischs de sowiet gsi, u mir hei alli, inklusiv üsem Bsuech, anere Füehrig chönne teilnä wo oganisiert worde isch vo de GLADIS ( German Speaking Ladies in Abu Dhabi). Es isch schlicht und eifach beidruckend gsi. Üerzüget euch sälber ahand vo de Föteli!

Si das nid s`Freie us Neeri? Ja, klar. Sie hei e Wuche Ferie bi üs verbracht!

Wär versteckt sich wohl unter all dene Abaias?

Schöni, tüüri u ganz spezielli Outo!

Die gseht me hie fasch wie Sand am Meer.

Mi weiss es ja scho lang, dass s`Outo es gwüsses Statussymbol darstellt u das wird eim hie i dr UAE immer wieder bewusst! Mi muess nid emal gross umeluege fallt eim das uf. Nume s`Tüürschte vom tüüre gseht me hie uf de Strasse. Vorallem bi de Iheimische chas nid protzig gnue si. Gäld spielt ja i däm Momänt überhoupt kei Rolle u gnue heis ja sowieso.

Däm Outofieber isch ou en Scheich vo Abu Dhabi erläge. Sis Hobby isch, alles was irgendwie cha umefahre, egal ob alt oder neu z`ersteigere. Sin Wagepark besteit bereits us über 240 Fahrzüg u es sölle immer no meh wärde! Für das bruchts natürlich ou e entsprächendi Istellhalle. Das isch ja keis Problem: er het sich e Halle, im Stil vore Pyramide, unwiet vo Abu Dhabi mitts i d`Wüeschti la boue.

Obs en Grund git , weiss ig nid. Aber i dr Zwüschezyt isch das ganzi für d`Öffentlichkeit zuegänglich gmacht worde. Mi nennts sogar „ Car Museum“! U druf cho si mir eigentlich per Zuefall, will uf em Wäg i d`Liwa Wüeschti fahrt me diräkt dra verbie.

Die letscht Wuche hei mirs de wölle wüsse, u si mit dr Gisela u em Gerti, zwöi Fründinne vo mir, das ganzi ga aluege. Wo mir de vorem Museum vorgfahre si, hei mir zersch gmeint es sigi gschlosse. Ussert e paar Arbeiter wo irgendöppis am strieche gsi si u e Snackbar wo offe gha het, isch wiet u breit niemer ume gsi. Üses Outo isch fasch e chli verlore gsi uf däm grosse Parkplatz. Dr Chef vo dr Snackbar het üs de aber versicheret dass es offe sigi u mi chönni eifach ga luege! Ungloublich, da louft me eifach ine ohni irgend öppis s`zahle! Chum betritt me die Halle, erschlahts eim schier vo dere Grössi u d`Fahrzüg stöh fein pützlet i Reih und Glied. Da muess es Vermöge umestah. Da gfindme nämlich vom Smart bis zum RollsRoys über Raritäte u Prototype alles aber ou würklich alles!

S`extremschte oder viellicht besser gseit, z`gschtörtischte wome gseht isch wahrschinlich dä übergrossi Lastwage wo i dr Ladeflächi e ganzi 3 Zimmer-Wohnig mit Chuchi, Bad, Stube u mit allem was derzue ghört ibout het. Mir hei Glück gha u hei das Monster vo Charre dörfe vo inne besichtige! Da chan ig nume säge: „ eifach gspunne!“ Dr Clou am Ganze isch de no, das Ding isch tatsächlich no fahrtüchtig u wärdi immer no brucht! Chum zum gloube!

En ganz spezielle Mercedes!

Das muess festghalte wärde!

Egal ob schön oder nid schön, d`Houptsach es isch ächt Gold

Das staht das Monster!

chli, gross, grösser am gröschte!

Tiger Woods

Letschte Sunntig hei mir live dörfe derbie si wo Tiger Woods s`Golfturnier vo Dubai gwunne het! Er isch einisch meh sire Rolle als Weltnummer 1 völlig gerächt worde.

Im Vorfäld het no gar nüd druf dütet, dass er das Turnier würdi gwinne. Er isch quasi abgschlage ufem sächste Zwüscherang gsi, bevors am Sunntig um d`Wurscht gange isch. Oder besser gseit ume halbi Million US$ Priesgäld für e Gwinner! Aber so schnäll darf me ihn halt nid abschriebe! Er het e Phänomenali Rundi a Tag gleit u Schlag um Schlag ufgholt u bim Loch 18, diräkt vor üsne Ouge het er sogar no en „Birdie“ gschlage! Das heisst: Füf Schläg si vorgä gsi fürs Loch 18 u er hets i vier gschafft!

Wie wild u fasch e chli Närvös bin ig mit mim Föteler umegspeedet um dr "Tiger" vor d`Linse überzcho!

Dr Maestro am ufwärme. Iloche wird güebt.

Die guete Plätzli si begehrt gsi zum fötele

Dr Mönscheuflouf isch enorm gsi um ihn. Verstäntlich! So nach chunt me sälte a die Crecks ane!

Da geits los für ihn! Ab zum Abschlag vom erschte Loch

E paar Schnappschüss rund ume Emirates Golfplatz in Dubai

S`Klubhuus u im Hintergrund wird wie überall i dr Region bout u nomal bout!

Blick vo dr Tibüne bim Loch 18.

D`Sunne geit langsam under u hunderti vo Zueschouer warte uf d`Siegerehrig

u warte immer no!

und ou mir hei gwartet u gwartet! I dr Zwüschezyt isch sogar d`Sunne untergange.

Äntlich sie die Herrschafte itroffe. Mi het nid öppe uf d`Spieler gwartet, nei natürlich uf d`Hoheite vo dr Scheichfamily!

Übrigens isch dr Dütschi Martin Kaymer (23) wo in Abu Dhabi gwunne het sensationell zwöite worde.