A Star is born!

Mir gratuliere dr Karin zu ihrer erschte Vernissage

Ueber 30 Bilder si z`beguetachte gsi. Hie e chlieni Uswahl dervo

Min persönliche Favorit

Ou am Dennis, mim Göttibueb, gfallts

Speziell für d`Wüeschtianer!

Jahrhundertereignis!

Vor guet eire Wuche isch no T-Shirt Wätter gsi u jetz isch Dounejagge u Halstuech agseit. Isch ja eigentlich nüd Wältbewegens e bizzeli Schnee, aber das het doch Sälteheitswärt. Mir schriebe erscht dr 30.Oktober 08.

Geschter am Abe het dr Schnee scho es bitzeli agsetzt

Hüt am Morge hei mir de nid schlächt gstuhnt!

Frau Holle het die ganz Nacht ihri Decki usgschüttlet!

Dr ultimativi Test!

Nach guet eim Monet Zwangspouse (Wadezerrig) bin ig ja gspannt gsi ob mis Wädli das mag ushalte! Mit gmischte Gfüehl bin ig de a Start gange u Tönel han ig de müesse verspräche, das ig sofort würdi ufhöre renne, sobald sich mini Wade irgendwie würdi bemerkbar mache. Ig ha das sälber ja ou igseh, da es nid z`gspasse isch mit ere Wadezerrig. Gfahr uf e chronischi Verletzig izfah isch gross weme dere nid Sorg git!

Bi schönschtem Herbschwätter, diräkt am See entlang ischs gange. S`Tempo wo mir gloffe si het perfekt gstumme u mir hei gnue Zyt gha die phantasteschi Ussicht z`gniesse u zwüschdür sogar no e chli z`lafere! Nach guet 47 Minute isch dä ganzi Spass vo 6,9km scho wieder verbie gsi u mini Wade het dä Test, zu mim Glück, ohni dr chlienschti Schmärz z gspühre überstande. Jupiiii!

Start bim Schloss Hallwyl bi schönschtem Herbschtwätter

Es isch zyt zum parat mache

Dr letschti Schluck bevors los geit

Achtung, fertig, los!

Corinne u ig im Ändspurt

Gschafft!

Jupiiiii!

Zur Abrundig vo däm wunderschöne Tag gniesse mir no es feins Tröpfli uf em Balkon vo dr Corinne u Marc.

Es Wanderusflügli!

"Heimweh nach de Bärge u See ...!" en Song vo Plüsch wo mi mängisch währendem jogge i dr Wüeschti begleitet het.

Es letschts Päuseli bevors los geit uf "Schusters Sohlen" richtig Männliche!

Dank em Föhn het s`Wätter mitgspielt

Dr erschti Schnee het glängt für e chlieni Schneeballschlacht!

D`Jungfrau im Abeliecht

Silberhorn früsch verschneit

Neus Outfit!

Üse Wintergarte im neue Outfit. Dr ganzi Summer düre han ig immer wieder Uschou ghalte für e Lounge wo scho lang en Wunsch gsi isch vo mir. Schlussäntlich bin ig im Internet fündig worde. Es isch bigoscht es Wagnis gsi die Möbel z`bschtelle ahand vomene Föteli. Aber es het zum Glück kei Bösi Überraschig gä! Mir hei uuuu dr Plousch dra.

Es gfallt meini nid nume üse Chatze!

E touch of "arabic" muess halt scho si!

Fertig mit Faserpelz u glismete Socke!

Vor guet zwöi Jahr wo mir nach Abu Dhabi zoge si, hei mir üs doch e chli schwär ta, wie mit dr Umwält umgange wird dette. Da isch no nüd vo recycle oder Abfall trenne, u vo Energie spare (Klimaalage) isch natürli ou kei Red! Wieso söllme de? S`nötige Chliegäld isch ja ume! Leider hei mir üs relativ schnäll a die Situation gwöhnt u umsomeh si mir wieder uf d`Wält cho wo mir wieder zrugg id Schwyz cho si. Doch umsomeh het üs das agspornt üsi Ölheizig gäge e Erdsondeheizig iztuusche. Allerdings e tüüre aber lohnenswärte Schritt!

Es isch wie verhäxt gsi. Genau e Tag nachdäm mir üsi alti Heizig usegnoh hei, hets Wätter umgschlage. Sit denn hei mir gschlagni drü Wuche a A…… gfrore! Während dere Zyt hei mir üs quasi nur no ums Cheminee ume bewegt. S`chältischte wo mir im Hus gha hei isch 16° gsi. Brrrrrrr. Mir wäre so froh gsi ume Altwyber-Summer!Leider isch er aber nid cho. Doch das isch scho wieder Schnee vo geschter. Es isch wieder so richtig „ cosy“ im Hus!

Die folgende Föteli gä e chliene Iblick was alles abgange isch die letschte Wuche:

S`ganze Material wird aglieferet

Das isch d`Ärdsonde

Bohrmaschine wird abglade

Näbscht em Töneli het ou d`Sheika wölle hutnah derbie si

All die Röhre müesse no i Bode

Da gseht me! Die Pensionierte hei Zyt

D`Bohrmaschine wüehlt sich i üse Garagebode

E so wird eis Rohr ums andere agsetzt. E dräckegi Aglägeheit

Schlamm, Schlamm u nomal Schlamm u dä wird diräkt i die grüene Mulde pumpet

S`Loch vo 170m Tüfi isch erreicht u d`Sonde cha abegla wärde

Meter um Meter versinkt si i däm Loch

Juhui ÖL! Schön wärs. Es isch leider nume s`führige Wasser wo im Bohrloch isch

Fasch scho obszöhn. Das isch alles wo no übrig isch nach dere ganze Bohrerei

Alles fertig u Agschlosse

29.Greifenseelauf!

Mitmache isch wichtiger als gwinne.

Für Corinne ischs dr alleri erschti Louf gsi wo sie gmacht het. Locker het sis gschafft.

Für mi ischs wie länger das ig gloffe bi e Chraftakt worde! Nei, nid öpe wägem Schnuufe (Rouche) sondern wäge mim Wademuskel. Ig ha churz vorhär no e Wadezerrig igfange nachdäm i mit dr Sheika (Chatz) es Wettrenne gmacht ha bi üs im Garte. Drümal dörft ihr rate wär gwunne het! Obwohl ig mi de gschohnet ha bis zum Louf, ischs nachträglich gseh nid gschiet gsi, was ig gmacht ha. Ig ha de die Wuche no churzspitz zum Arzt müesse, da min Unterschänkel agschwulle isch bis zum Chneu u usgseh het wie e Cervelat! S`Resultat isch: schohne, schohne u nomal schohne für das ig wieder fit bi für de Hallwilersee-Louf mitti Oktober!

Aber nid das dir ize dänket mi heigi dr Rennvirus packt, nei ou da gilt s`Motto: Mitmache isch wichtiger als gwinne!

Chüehl ischs gsi, defür troumhafts Wätter

parat mache für e Start. Was söl ig ou alegge!

letschti takteschi Besprächige!!!!!

im Ändspurt

Corinne locker uf dr Zielgerade