Rückblick uf guet drü Mönet Schwyz

Es isch ungloublich wie schnäll die guet drü Mönet Schwyz verbii gange si. Dadevo hei Tönel u ig am Schluss no zäme drü Wuche Ferie chönne gniesse. Es isch u viel gloffe i dere Zyt. Iladig da, Iladig dette, Bsuech bi de Hündeler u derzwüsche no es Bsüechli bi mire Familie. Hus- u Gartearbeit het ou nid dörfe fähle etc. etc. Vo Längwieli kei Spur. Im Gägeteil, ig has so richtig gnosse. Daderzue isch ja no e Wuche Spanie cho (han ig imene früecher Bricht scho drüber verzellt) u e Wuche Bootsferie i Frankriech. Dadrüber ize e paar Idrück vo dene erholsame Ferie:

Bootsferie mit Michèle u Mario

Üses Böötli! Über 13m läng u 4.10m breit

Schöner häts nid chönne si!

Blick i d`Chuchi

Tönel a dr Route studiere

Gspängschterhaft hets usgseh am morge früeh!

Da brutzlet scho s`Filet uf em Grill u mi hets meini wiet ume gschmöckt. Tönel isch nid lang e lei gsi........

I Reih u Glied isch me igstande i dr hoffnig es gieb öppis!

E so si mir üses alte Brot jede Tag los worde

Vo welere Siete chunt dr Wind? Die französische Tisch si sehr apassigsfähig!

Äng isches gsi, aber üsi Bootsfüehrer heis ohni Problem gmeischteret

Was gseh sie ächt? E Beiz oder es schöns Plätzli zum alegge?

Mmmmm e feine Apéro het derzue ghört!

Prost mitenand!

Ou s`tägliche Boot putze het müesse si!

Einisch meh hei mir e super Wuche erläbt u mir si sicher das si nid üsi letschte Bootsferie gsi!

I dr letschte Feriewuche si mir de no s`Musical „Ewigi Liebi“ ga luege. Was übrigens sehr z`empfäle isch! Dr passendi Grund hei mir ou no grad derzue gha! Mir hei üse zwänzgischt Hochzytstag chönne fiere!

U scho isch es wieder Zyt gsi d`Koffere z`packe u am Samschtig nachem Mittag si mir z`Neeri gmüetlich zur Bushaltestell gwagglet u hei dr Wäg id Wüeschti under d`Füess, Räder u Flügel gno.

Chum si mir i Abu Dhabi glandet u wieder Wüeschteluft id Nase übercho hei, han ig gspürt, wie ig mi gfreut ha druf!