Spontanentscheid!

Wo steit dä schöni Wägwyser?

Am Zyschtig vore Wuche isch im 10 vor 10 e Bricht usgstrahlt worde übere Chlousepass. Es isch drum gange zum zeige wie viel Arbeit es bruucht bis die ganze Strasse vom Schnee u Gröll gsüberet si bis d`Wintersperri cha ufglöst wärde. Mi het ou ganz klar gseit, dass dr Pass morn, Mittwuch, wieder offe wird si für e ganzi Verchehr.

Drum hei mir üs am Mittwuch morge spontan entschiede es gmüetlichs Usfährtli über e chlouse Pass z`mache, da mir beidi, sowiet mir üs möge erinnere, no nie gsi si. Zudäm isch ou wunderschöns Wätter gsi. Gäge Mittag si mir em Chlouse de nächer cho u ohalätz. Was hets de da für Tafele?!

Fahrverbotstafele! Het doch gheisse er sigi offe ?!

Aber mir si zum Glück lang nid die Einzige gsi wo abrönnt si! Näbscht de Cabi- u Töfffahrer het quasi es Pensionierte-Träffe statt gfunde am Chlouse! Dank dr "Kontaktfreudigkeit" (Insider) vo Tönel hei mir de vernoh, dass d`Strass am Namittag gäge die Vieri sötti ufgah. Also isch Warte agseit gsi oder umchehre. Mir hei üs de fürs eschti entschiede. Schliesslich passiert üs das nid mängisch das me quasi als erschti en Pass darf befahre.

Mit Mittagässe u Spaziergang hei mir de die drü Stund warte guet über d`Rundi bracht.

Punkt vieri si mir de wieder richtig Chlouse los gfahre u tatsächlich, d`Fahrverbotstafele si wägggrumet gsi u mir hei üsi Erscht-Fahrt übere Chlouse chönne under d`Räder nä. Wie länger mir gfahre si, umso meh ischs mir vorcho als wäri hie Zyt bliebe stah! D`Strasse si zum Teil no us Chopfsteiplaschter, soumässig äng u Leitplanke gits ou keiner. Nume Schilder wo eim vo zyt zu zyt warne vor "Achtung gefährliche Strasse". Zum Glück bin ig bärgsytig ghocket!

Schnee, Schnee u nomal Schnee. Das tüscht! Nume grad i de letschte paar Kurve vor der Passhöchi türmt sich der Schnee no Meterhöch. Süsch het ou dette dr Früehlig izug ghalte.

D`Heifahrt via Altdorf, Axestrass u Ibergeregg het no grad zu däm schöne Spontanusflügli passt!