SnowpenAir uf dr Chliene Scheidegg

Phantastischs Wätter u tusegi vo Zuschouer hei uf e Bärg welle. Ou mir hei derzue ghört. Mit viel Glück u gekonntem füre Drängle oder besser gseit, mit Köpfchen aschtah, si mir zügig im Bähnli vo Grindelwald Grund richtig Chlieni Scheidegg ghocket. S`Wätter hätti nid besser chönne si! D`Sunnecreme het nid dörfe fähle u dr Sponsor Coop het sogar no cooli Hüetli verteilt wo mir ou guet hei chönne bruche. Die wo beides nid beasprucht hei, heis de e bitzeli bereut u es het Lüt gä wo usgseh hei wie Glüehwürmli! Gäll Marc!!!! S`Timing hätti nid besser chönne si. Punk 11.00h het Natacha denn SnowpenAir eröffnet u genau zu dere Zyt si mir i d`Arene inegloffe.

D`Japaner wo zrugg cho si vom Jungfrou-joch si mit Kamera usgrüschtet a dr Schibe kläbt u hei wahrschienlich d`Wält nid verstande wie all die tuusige vo Lüt uf dä Bärg cho si.

Zum Glück het me üs gseit mi sölli öppis zum druf höckle mitnäh u so hei mir zwe Schlitte mitgnoh u si heilfroh gsi drum. Es wäri e nassi Aglägeheit worde ohni die Schlitte, weme hätti müsse i dä nassi Frühligsschnee sitze.

Mit The Baseballs isch Poscht so richtig abgange u d`Arena isch richtig zum choche cho!

the Baseballs

Amy Macdonald

Genau uf e Gig vo dr Amy het d`Sunne leider de Wolche müesse platz mache. Sie hets mit Humor gnoh. Isch ja klar als Schottin!

Am 17.00h isch dä Musigriechi Tag z`änd gange u mir hei einisch meh mit viel Glück im erschte, mögliche Bähnli Platz gfunde wo üs wieder Talwärts bracht het!