Tönels neuschte Hobby!

Äntlich het sich Tönels lang ersehnti Wunsch erfüllt. Das Dank s`Freie. Fründe us Neeri wo en wunderschöne Buurehof bsitze.

Dr erschti Uftrag het gluttet: Gruppele (rächele)

Nach churzer Ifüehrig uf däm riese Gfährt het Tönel dörfe losfahre

Hi u här aber grad hets müesse si

Stolz posiert er vor em Traktor. Mi hät scho chönne meine es wäri sine!

Bi fasch 30° im Schatte strahlt s`Töneli us dr klimtisierte Kabine.

Chehre het er ou scho im Griff

Grad ischs gloub ig ou?

Dr zwöiti Uftrag isch gsi: Walze

Ig ha ihn vo üsem Hus chönne beobachte u natürli kontrolliere

Da chunnt er a z`donnere mit ca. 10kmh

Wie en chliene König posiert er scho wieder vor däm Monster

Blick us em Cockpit! Ig ha sogar ei Rundi dörfe mitfahre. Er hets nid schlächt im Griff! Muess ig scho säge!

Heidiland pur

S`Läbe fägt!

Äntlech ha ig wieder emal Zyt u Lust min Blogger z`füettere! Dr Monet Juli isch für mi es richtigs "Highlight"gsi. Ig ha schlichtwäg es Mammutprogramm hinter mir. Es het mi vo Münche über Adelbode, Tessin i d`Algarve gfüehrt. Jet-Set isch scho fasche en Seich dergäge. Nachfolgend e paar Idrück vo mine Destinatione:

München

Tönel isch schaffenderwies ei Wuche dette gsi. Drü Täg ha ig ihn de bsuecht.

Besichtigung vo de BMW Wärk

S`Bild vergrössere u man beachte dr Name vo dr Strass!

KZ Dachau! Schlat eim gröber ufs Gmüet.

Viel meh muess me daderzue gloub nid säge.

Im Zentrum vo Münche bi chüele Temperature hei mir Sushi gnosse!

Adelboden

Zum 30-jährige Jubiläum vo dr SLS (Piloteschuel) het me sich für es Wellness-Weekend i Adelbode troffe.

Indoorpool

Dr Blick vom Wintergarte

Outdoorpool 36°. Das het zum verwiele iglade! Wiet über e Stund hei mir das Bad gnosse u am Schluss fascht Schwümmhüt gha

Am Abe Apéro im Wintergarte u für d`Roucher uf dr Terrasse

Es isch heftig über d`Flügerei diskutiert worde

Währendem Nachtässe

Mi trifft sich vor dr Beiz. Wieso ächt?

Raucher

S`Gruppeföteli vo beidne Gschlächter het nid dörfe fähle

Tessin

Für einisch si mir mit em Zug gfahre. Ziel isch Locarno gsi, wo mir für drü Nächt es Hotel mit herrlichem Blick ufe See buechet gha hei. Grund:

Bligg, Göla u Daffy Konzärt

Es het sogar für es Nickerli glängt

Konzärt vom Bligg und em Gölä si eifach "geil" (würd dr Göla säge) gsi!

Das ganzi het mitts i Locarno uf dr Piazza grande stattgfunde. E wunderschöni Stimmig ischs gsi

Im wahrschte Sinn!

Tagsüber hei mir uf em Boot vo dr Corinne u Marc verbracht. Zudäm hei mir Velousflügli nach Ascona gmacht. Uiuiui mis arme Fudi!

Usflug mit dr Blue - Bootsname - nach Cannobio

Umehänge u gniesse het ou nid dörfe fähle

Achtung Sturzgfahr!

Brrr e bitzeli chüehl! Aber suuber muess es halt si!

"gäll Marc"

Algarve Portugal

Wie all Jahr, si üsere vier Frou wieder zäme ei Wuche i d`Ferie gfloge.

Gwohnt hei mir ire Hapimag wohnig in Sesmaria unwiet vo Albufeira u das isch d`Ussicht gsi vo üsem Balkon.

Ordnig muess si!

Was isch da falsch?

Das isch Küschtelandschaft wo sich über die ganzi Algarve zieht

D`Ladies bim Abstieg zum Meer! Das isch es heikels Unterfange gsi mit de Flip-flop u het doch e paar chlineri Blessure gä!

Obwohl dr Atlantik souchalt isch, hei mir üs mit viel Überwindig einisch im Tag is chalti Nass gwagt

Mir si aber nid nur im Liegistuehl umeghanget. Ei Tag hei mir en Usflug mit üsem Mietouto is Landesinneri gmacht. Zudäm hei Gisela und ig e drütägige Golfkurs bsuecht. Leider si de detdrus nume zwe worde, da Gisela e Närveentzündig igfange het. Am letschte Tag hei mir de no e Ritt hoch zu Ross buechet.

Da stöh si üsi Rössli! Mit über e halbstund verspätig hei mir de d`Stallige ou gfunde. Eis muess ig scho säge: Es isch es schwierigs Unterfange outofahre i Portugal. D`Strasse si dermasse schlächt beschilderet, das mir üs meh verfahre hei als nid! Da hilft ou kei Strassecharte.

Aber bi guet 28° hei mir en herrliche Usritt vo guet anderthalb Stund querfeldein gnosse.

Dr Muskelkater het nid lang uf sich warte la!

A üsem letschte Abe hei mir no e feini Beiz gfunde mit herrlichem Blick uf d`Marina vo Albufeira

Spontanentscheid!

Wo steit dä schöni Wägwyser?

Am Zyschtig vore Wuche isch im 10 vor 10 e Bricht usgstrahlt worde übere Chlousepass. Es isch drum gange zum zeige wie viel Arbeit es bruucht bis die ganze Strasse vom Schnee u Gröll gsüberet si bis d`Wintersperri cha ufglöst wärde. Mi het ou ganz klar gseit, dass dr Pass morn, Mittwuch, wieder offe wird si für e ganzi Verchehr.

Drum hei mir üs am Mittwuch morge spontan entschiede es gmüetlichs Usfährtli über e chlouse Pass z`mache, da mir beidi, sowiet mir üs möge erinnere, no nie gsi si. Zudäm isch ou wunderschöns Wätter gsi. Gäge Mittag si mir em Chlouse de nächer cho u ohalätz. Was hets de da für Tafele?!

Fahrverbotstafele! Het doch gheisse er sigi offe ?!

Aber mir si zum Glück lang nid die Einzige gsi wo abrönnt si! Näbscht de Cabi- u Töfffahrer het quasi es Pensionierte-Träffe statt gfunde am Chlouse! Dank dr "Kontaktfreudigkeit" (Insider) vo Tönel hei mir de vernoh, dass d`Strass am Namittag gäge die Vieri sötti ufgah. Also isch Warte agseit gsi oder umchehre. Mir hei üs de fürs eschti entschiede. Schliesslich passiert üs das nid mängisch das me quasi als erschti en Pass darf befahre.

Mit Mittagässe u Spaziergang hei mir de die drü Stund warte guet über d`Rundi bracht.

Punkt vieri si mir de wieder richtig Chlouse los gfahre u tatsächlich, d`Fahrverbotstafele si wägggrumet gsi u mir hei üsi Erscht-Fahrt übere Chlouse chönne under d`Räder nä. Wie länger mir gfahre si, umso meh ischs mir vorcho als wäri hie Zyt bliebe stah! D`Strasse si zum Teil no us Chopfsteiplaschter, soumässig äng u Leitplanke gits ou keiner. Nume Schilder wo eim vo zyt zu zyt warne vor "Achtung gefährliche Strasse". Zum Glück bin ig bärgsytig ghocket!

Schnee, Schnee u nomal Schnee. Das tüscht! Nume grad i de letschte paar Kurve vor der Passhöchi türmt sich der Schnee no Meterhöch. Süsch het ou dette dr Früehlig izug ghalte.

D`Heifahrt via Altdorf, Axestrass u Ibergeregg het no grad zu däm schöne Spontanusflügli passt!