Neerigflüschter: " En Troum wird wahr!"

Am 28.May isch dr Juni Isatz vo Tönel usecho. Was für e Ueberraschig! En lange Sydney het er übercho u das vom 01.Juni bis 05.Juni 07. Da isch für üs grad klar gsi, dass ig ihn wirde begleite. Es het ou no grad perfekt passt mit all üsne Termine. Kei Sitzig u kei Bsuech isch agseit gsi.

Also nüd wie los u Ticket bstelle u Reisefüehrer choufe. Und los ischs gange. Pünktlich am Frytig si mir abgfloge Richtig Sydney. I ha einisch meh Glück gha u ha en Erschtklass-Sitz übercho. So han ig die guet 13Std Flug sehr guet überstande.

Pünktlich am Morge 06.10h Sydney Zyt si mir glandet. Es guets Gfüehl isch es gsi, es erschts Mal „Down Under“ underde Füess z`gspühre. Für üs beidi het sich en lang ersehnte Troum erfüllt u umso grösser isch üsi Freud gsi. Bi dr Akunft het sich Sydney vo dr schönschte Siete zeigt. Stahlblaue Himmel schöner häts nid chönne si u das während üsem ganze Ufenthalt. Es isch zwar für üs eher chüel gsi, das ja Winter isch u mir üs Abu Dhabi Temperature gwöhnt si. Tagsüber hets so gäge die 20° gha u z`Nacht isch de s`Termometer bis uf 10° gheit. Für das hei mir de all üsi warme Chleider müesse montiere u hei trotzdäm öppe mal no e chli gfrohre. Mi isch sichs halt nümme gwöhnt. Umso meh hei mir aber die klari Luft gnosse.

S`Hotel chönnti nid besser ligge. S`Hotelzimmer mit Blick uf d`Opere u Harbour Bridge. Was wot me meh? Wo mir de dä Usblick gse hei, het üs dr Hafer packt u anstatt ga z`schlafe hei mir nume schnäll Tenüwächsel gmacht u si uf üsi erschti Erkundigstour mit allgemeiner Richtig Opera. Nach guet drü Stund het üs de aber d`Müedikeit doch übermannt u mir hei üs de entschlosse doch no e paar Stündli ga z`ligge. Am Namittag am drü hei mir üs de usem Bett kämpft u wieter ischs gange mit üsere Entdeckigsreis. Mir si chrüz u quer dürs Züg us gwagglet u am Abe hei mir de d`Fähri gno für nach Darling Harbour. Hie gfindme vieli gueti Beizli u ou s`Aquarium u Sydney Wildlife World zum besichtige isch dette diheime. S`Zwöite hei mir de nach em Znacht no besichtiget u nachdäm si mir de langsam aber sicher uf de Stümpe gsi u es isch Zyt gsi für is Bett. Zu üsem erstuhne hei mir die ganzi Nacht voll düre pfuset u si purli munter am 10.00h scho wieder uf dr Gass gsi. Zersch hets no es feins Zmorge im Hotel gä u dernah ischs mit dr Fähri Richtig Manly beach. Dr Tüfel isch los gsi a däm Beach. Es „ Wy Festival“ het stattgfunde. E uh mängi Lüt u umso spannender isches gsi dür die Strasse z`gwaggle u däm Triebe zuzluege. Wy isch gflosse i rouhe Mängene. Mir hei de aber verzichtet druf. Es isch üs doch de e chli z`früeh gsi zum scho sühfle. So gäge die vieri hei mir üs de ufe Rückwäg gmacht. Mir hei churz es Stundepfüsi grisse u umzoge u sie wieder ufbroche Richtig Darling Harbour. Damal aber z`Fuess. Nume grad guet 15min. bruchtme. Als erschts si mir de ga s`Aquarium ga aluege u dernah hei mir üs mit emene feine ouschtralische Rindsfilet u mit emene feine Glas Wy dr räschte vom Abe versüesst. Am 22.30h si mir mitere gsunde Müedigkeit is Bett gheit.

Am andere Morge si mir de am 08.00h scho wieder us de Fädere. Uf em Programm isch e Tour mit em Bus, em sogenannte Bondyexplorer gsi. Das isch e Bustour mit 19 Stops. Im Halbstundetakt wird gfahre u so het me d`Möglichkeit bi 19Stops xbeliebig uszstiege wos eim gfallt u e halbstund oder Stund später wieder dr nächschti znäh. Sie nenne das ganzi „ hop on hop off bus“ Es super system. Uese gröschti Stop hei mir am Bondibeach gmacht u dette grad no öppis chlieses z`Mittag gno. Ohni en Stop zmache gieng die ganzi Tour 2std. Mir hei üs natürli länger Zyt gla. S`Einzige Zyl wo mir no gha hei a däm Tag isch, dr Sunneuntergang uf dr Harbour Bridge z`gseh. Das hei mir de o gschafft wies d`Föteli bestätige. Wes üs amene Ort gfallt denn gfallts üs! Drum alle Dinge sind drei u mir si wieder am Darling Harbour ga z`Nachtässe! Dr letschti Abe vor dr Abreis. Am andere Morge si mir de wieder bizyte usem Bett u schnuerschtracks Richtig Opere. Hie hei mir de no e Stündigi Besichigungs-Tour gmacht dür d`Opere! Dernah si mir de gmüetlich zrugg is Hotel u dusche u packe isch agseit gsi. Mitemene Ghoffer voller Erinnerige, Idrück u vielne gschossne Fotene si mir ufe d`Heireis! Eis isch ize scho sicher. „Down Under“ mir chöme wieder!