Neerigflüschter: "Jumana" secret of the Desert

Geschter hei Tönel u ig „Jumana secret of the Desert“ in Dubai gseh. Das isch e Show mit allem drum herum wie Laserschou , Wasserspiel, Fürwärch, Tanz, u ou Kamel u Ross. Das ganze isch verpackt imene typisch arabische Märli. Ou i dene gits überigens es Happy End. Zu dere Schou si mir cho, will d`Etihad gratis Tickets offeriert het a däm Tag, u wies dr Zuefall het welle het Tönel ou no grad frei gha.

Am Abe gäge die säxi si mir Richtig Dubai abgfahre. Da mir nid genau gwüsst hei wo die ganzi Sach sich abspielt, hei mir gnue Zyt igrächnet u dänkt mir ässi de ouno grad dette öppis chlieses Znacht. Dr Wägbeschrieb hei mir üs usem Internet gholt u dä isch nid üppig gsi. Richtig Dubai uf dr E11 u denn wächsle uf d`Emirates road. Vo dette ischs wieter uf d`E66, bis zum Exit 29 u denn ischs de no guet 5km ufere unbelüchtete Outobahn wieter gange. Ungwohnt, da schüsch immer alli Strasse hell erlüchtet si. Drum isch de ou d`Frag ufcho, ob mir ächt am richtige Ort si. Aber tatsächlich, out in the Nowhere, chunt rechts plötzlich e Tafele mit dr Ufschrift „ Al Sahra Desert Resort“. En Igang wiener nid schöner chönti si! Vo dette ischs de ufere Sandpiste wieter wo beidsietig wunderschön belüchtet gsi isch mit Fakle bis zu de Parkplätz. I dr Zwüschezyt ischs de scho 20.00h u üsi Mäge hei chnurret. Mir si de o problemlos nume mitem Etihad-Uswies ineglah worde. S`Aesse gäbis i dr Cafeteria heis üs gseit. Also nüd wie los u ga Sueche wo die isch. Wo mir de aber s`Amphitheater, Open Air, gfunde hei, hets dette es Büffet gha mit allem drum herum was s`Härzli so begehrt. Mir hei de churzum e Kasse gsuecht u dette wo mir hei welle zahle, het me üs z`Trinke abbote. Scho hei mir also Flüssigs gha u si halt de diräkt am Buffet agstande u hei üsi Täller gfüllt mit all dene feine Sache! S`Bschteck hei mir keis gfunde das sigi uf de Tische het me üs gseit. Also nüd wie los u es Plätzli sueche zum höckle. Amene Tisch hets no grad vier Pätz gha u mir hei de früntli gfragt obs no frei sigi. Mi het üs de gseit das sigi e privat Party! Mir hei enand agluegt u nüd derglieche ta u si ana andere Tisch u dette si mir de hurti abgsässe ohni z`frage u hei gnüsslich üsi Täller glärt. E so guet wies gsi isch, hei mir üs de aber nümme defür gha üsi Täller nomal z`fülle, obwohl s`Desserbüffet ou sehr iladend gsi wär. Miteme schmuntzle ufem Gsicht hei mir üs de usem Stoub gmacht. Zudäm ischs so oder so o Zyt gsi zum dr Platz inäh, da d`Show i füfzäh Minute agfange het. Pünktlich 21.00h het me alli Liechter i dr ganze Alag glöscht, nume no dr Mond het hell glüchtet, u los ischs gange. Die Show vo guet füfesebezg Minute het üs fasziniert u völlig i Bann zoge. Ungloublich, u das alles „mitts i dr Wüeschti“!

Nach däm Spektakel hei mir de no chli gwartet bis die 1500 Lüt abgfahre si u „ oh Wunder“ da hei mir de no Caféteria gfunde u üse letschti Drink ehrlich zahlt!