Neerigflüschter: Falcon Hospital Abu Dhabi

Dr Klub vo de GLADIS (German ladies in Abu Dhabi) hei dä Sunntig e Besichtigung organisiert vom Falke-Spital hie in Abu Dhabi. Das han ig uf kei Fall wölle verpasse u ha mi de schnuerschtracks agmäldet. Träffpunk isch am 08.00h bim Hotel Hilton uf em Parkplatz gsi. D`Fräne isch ou mitcho u sie isch de o grad gfahre. Es isch abgmacht gsi, das me mit de Privatouto fahrt. Gisella, d`Organisatorin, het allne Fahrer es Plänli i d`Hand drückt u sowiets gange isch, si mir de im Konvoi losgfahre.

Mir si Richtig Flughafe losgfahre u hei churz vorhär müesse d`Ussfahrt nä Richtig Sweihan. Vo dette hätts nümme wiet müesse si ahand vom Plan u es hätti e Tafele sölle cho mit dr Ufschrift „Camel reasearch Center“. Hie hättme de müesse rächts abbiege. Aber wies e so isch, plötzlich chunt churz vore Usfahrt es Schild wo druffe steit „Falcon Hospital“! Logisch hei mir de die Usfahrt grad gnoh u ghofft es giebi de nomal e Wägwieser. Däm isch de nid e so gsi, ussert nigel nagel neue Strasse u Hüser isch wiet u breit nüd ume gsi! Drum hei mir de churz mitts imene Rondell halt gha, so richtig nach arabischem Stil, zum üs orientiere. Mir si nid lang allei gstande u eis Outo ums andere het still gha. Eis isch aber scho sicher gsi, dr Plan het hinde und vore nid gstumme. Wie chönnts nid anders sie, scho chunt e Polizist z`fahre u het natürli wölle wüsse was mir da alli mache. Mir hei ihm churz erklärt was los isch u er het sich spontan zur Verfüegig gstellt, üs z`eskortiere. Da cha ja nümme schief ga han ig dänkt! Mir hei de s`Rondell verlah u bi dr nächschte Möglichkeit het er d`Strass verlah u isch mit üs quer dür de Sand richtig Hospital gfahre.

Wiet u breit isch kei Strass meh gsi u gstübt hets wie anere richtige Offroad tour! Aber ohä lätz es het nid lang duuret u mir si i d`Strass iiboge vom Spital! Fründlich hei mir üs mit „shukran“ bim Polizist bedankt!

Dette si mir de vo dr Spital-Diräktorin, Frou Dr. Müller, empfange worde. Sie chunt us Dütschland u isch scho sächs Jahr im Falke-Spital tätig. Sie sälber het üs de dürs ganze Spital gfüehrt, agfange bim Museum, denn ischs wieter in OP vo dette ischs wieter zu dr Intensivstation, Labors, „Patiäntezimmer etc. S`ganze isch absolut vergliechbar mit dr human Medizin! Mi gspührt u gseht us allem use, das en Falke nid nume eifach en Vogel isch. Nei, die wärde uf Hände treit u mi luegt ihne so guet wie mir üsne Hustier. Dr grossi Unterschied isch aber, en Falke isch u darf nid Handzahm wärde will süsch verlürt er dr natürlichi instinkt zum Jage!

Frau Dr. Müller isch ganz i dr Mitti z`gseh

Training

Bim Training wird dr nätürlichi Instink gförderet. Dr Falkner schwingt are länge Leine e ächti Vogelfädere oder es cha ou e Attrappe vomene Haseohr si u denn wird dr Falke frei gla. Dä Flügt de zersch emal los zum sich orientiere u het denn nur no usschou uf e Büti! Sobald er die Federe oder Hasefäll gseht i dr Luft, flügt er i hohem Tempo, s`cha bis 250kmh si, uf d`Büti los u versuecht si z`fah! Meistens brucht er mehreri Aläuf. Wärend em Agriff gsiech dr Falke nüme anders als sini Büti. Drum chöms öppe mal vor, das er diräkt in es Hindernis ine flügt u sich derbie mal Fädere oder es Bei bricht. Het er de die apeilti Büti verwütscht, dr Falke isch übrigens dr einzig Vogel wo mit em Mul rsp. Schnabel sini Büti miteme gekonnte Biss i Nacke tötet, setzt er sich a Bode mit em Fang u muess zersch emal verschnuufe. Das isch dr Momänt wo dr Falkner ihm de e Wachtle zum frässe histreckt u so cha er ihn de wieder mit de Fuessfessle uf sin Arm nä.

Das si die Falke wo id Freiheit entlah wärde i drü Täg!

Da de Sensor wo abracht worde isch

Wanderfalke

Dr Falke isch en Zugvogel u verlaht während de chalte Wintermönet sini gwohnti Umgäbig richtig Süde u überflügt uf däm Wäg d`UAE. Er heisst nid vernüt Wanderfalken. Das hei d`Beduine früeh scho realisiert, u hei Glägeheit gnutzt u d`Falke uf em Wäg i Süde abgfange u si während de Wintermönet bi sich bhalte u si so trainiert, dass sie für sie ihri Mahlzyte gjagt hei. Ischs de i de UAE langsam wieder Richtig Summer gange, het me de d`Falke wieder frei gla u die hei ihre gwohnti Rückflug i Nord chönne aträtte. E so het nie Gfahr bestande vo dr Usrottig, Das ganzi Spieli het sich de alljahr wiederholt. Hützutag ischs jage verbote worde und d`Falknerei wird quasi „ nur no als Hobby“ betriebe.

Vor guet 12Jahr het de dr verstorbeni Scheich Zayed bin Sultan AL Nayan es Programm uf Bei gstellt zur Ufzucht u wieder Freilassig vo Wanderfalke. Bis hüt si über 1000 Falke id Freiheit entlah worde. Um Kontrolle über die freiglassne Falke chönne zha, wärde Sensore a de Tier abracht u die Sände via Satellit diräckt is Hospital die nötige informatione. Nur so chame feststelle wiviel schlussäntlich überläbe. Usgsetzt wärde die ufzogne Falke a ganz speziell usgwählte Ort. Das si vor allem bevölkerigsarmi Gägende wo aber gnue Wasser u Fuetter biete. ¨Sehr oft isch das in Pakistan. Nach dr Freilassig verbringt er no drü Täg a däm Ort u zieht denn wieter i Norde.

Operationssaal

Mir hei sogar live chönne derbie si wie en Falke wo verletzt gsi isch a de Füess, narkotisiert worde isch u hei gseh wieme ihn Vogelgrächt verbindet. Damit die Wunde de richtig chöi verheile, wärde em Falke sogar Schueh agleit. Ja, genau Schueh wo individuell für jede Falke bastlet wärde. Währendesse ischs ufeme andere OP-Tisch hektisch zue u här gange, u mi het d`Frou Dr. Müller grüeft si sölli churz cho. Mir hei de e so grad live miterläbt wieme en Falke wieder zum läbe erwekt nachdäm er während dr Narkose plötzlich ufghört het schnuufe. Mi het ihn churzum intubiert miteme Röhrli u es het nit lang brucht het er wieder vo ellai gschnuufet. Mi het ihn de sofort us dr Narkose zrugg gholt u sini kabutti Fädere het me si gla u Behandlig ufene spätere Zytpunkt verschobe. Sie het üs de gseit, das chiemi öppe mal no vor, da d`Falke sehr sensiebel u sehr Stress afällig sige.

Das isch nume e Teil vo all dene Informatione wo mir gseh u übercho hei. D` Frou Dr. Müller het sich alli Zyt uf dr Wält gno u mit Geduld üs Red u Antwort gstande näbscht allem wo sie üs süsch no verzellt het. Für mi, als absolute Tierfan, isch das es mega Erläbnis gsi.

Zum Schluss hei mir de sogar no d`Möglichkeit übercho, en Falke sälber chönne z`häbe u z`berüehre.