Khasab

Khasab isch e chlieni Ortschaft am nördlichschte Zipfel im Oman. Ca. 350km vo Abu Dhabi entfernt. Das isch üses Ziel gsi letschte Zieschtig.

Abgmacht isch gsi, das mir zwüsche 09.00h u 09.30h abfahre. Mir heis knapp gschafft. Begleitet hei üs ou no d`Ursula u Hermann wo zur Zyt für e Wuche bi üs z`Bsuech si. Uf em Wäg Richtig Dubai hei mir de im Radio ghört, das in Dubai u Sharja en mega Stou sigi will es Outo brönni. Da Dubai so oder so immer es mega Chaos herrscht, hei mir de uf d`Emirates road gwächslet. Das isch d`Outobahn wo vo de Lastwäge benutzt wird. Isch aber keis Problem, will die dörfe nid überhole u so het me eigentlich meischtens freii Bahn. I ha de d`Charte studiert u gseh das die Outobahn in Sharja fertig isch u mir de dette wieder uf Küschtestrass müesse wächsle. Nach guet anderthalb Stund si mir de zu dere gmeinteUsfahrt cho u si Richtig Sharja wieter gfahre. Chum si mir ab dr Outobahn cho, si mir scho imene Verchehrschaos gstande. Meter um Meter hei mir üs Richtig Küschte bewegt u das quer dür d`Indstrie vo Sharja. Mir hei de nach Schilder usschou ghalte, wo üs en Ahaltspunkt hätti chönne gä wo mir eigentlich stecke u i welli Richtig mir müesse fahre. Tönel sis Närvekostüm het langsam aber sicher agfange bröckle u er het agfange wättere. Das het üs aber ou nid wieter bracht. S`einzige wo üs no e bitzeli wieter gholfe het isch dr Kompass im Outo gsi. Wo dä de d`Richtig Süde azeigt het, isch de volländs klar gsi, das mir völlig im Seich umefahre. Mir hei über e Stund verlore bis mir äntlich die Richtigi Küschtestrasse, d`E11, wieder gfunde hei. Gmüeter hei sich de langsam wieder beruhigt u wieter ischs gange Richtig Grenze vom Oman. Churz vor dr Gränze isch d`Ortschaft Ras Al Khaimah. Dette si mir de ufenes grosse Rondell cho u mir hei nid schlächt gstuhnet. Hie hets e Wägwieser uf d`Emirates Road. Mir hätti also chönne uf dr Outobahn bliebe bis det hi! Es isch ungloublich, mir hei ja scho die nöischti Strassecharte vo Dubai, u gliech isch die scho wieder meh als überholt!

Nach Ras Al Khaimah änderet sich s`Landschaftsbild wie uf ei Schlag. Plötzlich isch me umgäh vo kahlem Gebirge u wiet u breit nümme ume vo Sandwüeschti. Idrücklich wie sich d`Küschtestrass a de steile Felwänd verbie schlänglet u spätischtens ize versteit me wieso meh die Gägend arabisches Norwege nennt!

Nach guet drüehalbstund hei mir de dr Zoll erreicht. Da simer nach arabische Verhälthnis guet u relativ schnäll düre cho u hei die letschti Etappe nach Khasab chönne under d`Räder nä. S`Hotel isch nid z`verfähle gsi, das diräkt a dr Küschtestrass lieht u das ersch no churz vor Khasab.

Chum acho hei mir für e morgig Tag müesse dr Bootsusflug bueche. Das isch ou dr einzig Grund wieso me nach Khasab chunt. Das isch dä Ort für Delphine z`beobachte. Aber ou Touche oder Schnorchle wird abbote.

Nachdäm mir de Zimmer bezoge hei, si mir de no e chli a Pool ga riläxe u vorem Nachtässe hets sogar no für e chliini Offroad Tour glängt. S`Ziel isch, dr einzig mit em Outo erreichbari Fijord „ Khor Najd“ gsi.

Scho nume bim Ablick vo dere Offroadstrass schlaht am Töneli sis Härz höcher!

Am andere Morge het me üs pünktlich am 09.00h bim Hotel abgholt u üs a Hafe bracht. Hie hei mir de no Schnorchelmaterial gmietet u los ischs gange mit em Bootstrip. Mi isch nur am Afang churz ufem offene Meer gfahre. Dernah isch me de nur no i de malerische Fijorde umekurvt. Es isch de ou nid lang gange, bis mir die erschte Delphine vor d`Linse übercho hei i däm glasklare Wasser. Es wunderschöns Schouspiel. Bi dr Telegraph Insle hets de e Stündige Halt gä u hie hei mir de üses Schnorchelmaterial montiert u hei chönne d`Unterwasserwält erkunde. Koralle, all farbe vo Fisch hei mir gseh. Es het üs grad e chli a d`Maledive erinneret. Nach guet ere Stund ischs de scho wieder Zyt gsi für d`Rückfahrt. Will mir die einzige gsi si wo anstatt e Tages- e Halbtagestour buechet gha hei, hei mir müesse s`Boot wächsle. Vom Speedboat hei mir ufes typischs arabischs Holz-Boot gwächslet. Es sogenannts „Dhow“. Gmüetlich si mir de wieder Richtig Khasab tuckeret. Ou da hets wieder nid lang brucht u mir si vo Delphine begleitet worde. Sobald e Delphin gsichtet wird, muess me vollgas gä, damit Delphine mitschwümme. Für sie isch das ganzi es Spiel u sie fordere s`Boot uf gäge sie d`schwümme u wie quasi luege wär schneller isch. Wär gwinnt? D`Antwort isch gloub gä, oder? Churz vor Khasab chrüze üs mehreri Speedboot. Iraneschi Schmugglerboot! Kei Witz! Iran lieht nume grad 55km vo Khasab entfernt. Die ganzi War,wie zum Biespiel elektrischi Grät, Zigarette etc.wird legal i Khasab ikouft u verzollt u vo dette i Iran gschmugglet. Ei Ueberfahrt duuret öppe zwei Stund. Das mache sie de zwöimal pro Tag. Für Khasab sälber isch das es mega business u verdiene dermit sehr guet Gäld! Am 13.00h si mir de in Khasab acho u vo dette sie mir de wieder is Hotel bracht worde. E gueti Stund später hei mir de d`Heifahrt voll mit Idrück u schöne Erinnerige under d`Räder gno!

Blick vom Hotelzimmer

Blick ufe Hafe mit de Usflugsboot

Ursula u Hermann gmüetlich am Schatte

Telegraph Iland mit em Boot für üsi Rückfahrt

S`Boot vo dr Hifahrt

UeseTourguide us Khasab im typische arabische Gwand