Neerigflüschter: SLS-Fäscht im chliene Rahme u eis Jahr Abu Dhabi

Am Abe, punkt halbi zähni ischs Taxi für d`Judith u Martin bi üs dieheime forgfahre. Nachdäm mir üs verabschiedet hei u s`Taxi usser Sichtwieti gsi isch, bin ig zrugg is Hus u es isch mir fasch e chli komisch vorcho so ganz allei, will sit guet drü Wuche hei mir konstant Bsuech im Hus gha u es het mir zeigt, wie schnäll me sich a chli Läbe im Hus gwöhnt. I ha mi de aber gmüetlich ufs Sofa ghöcklet u ha mir gedanklich nomal die ganz letscht Wuche düre Chopf ga la. Mir hei doch wieder so mängs zäme unternoh u erläbt. Ganz speziell isch sicher dr letscht Frytig gsi. Näbsch dr Judith u Martin hei mir no s`Wirze us Dubai zum grilliere iiglade u zu später Stund si de no s`Epplers zu üs gstosse. Das ganze isch de fasch gsi wie es SLS-Fäscht imene chliene Rahme!

Daderzue e churzi erchlärig: Dr Martin, dr Dide, dr Toni Wirz u Tönel hei zäme d`Piloteusbildig gmacht u sit denn finde jährlich zwöi Träffe vo dere Schuelklass statt. Dr Martin flügt immer no under de Fittiche vo dr SWISS, der Toni Wirz isch bi dr EMIRATES u dr Dide u Tönel bekannterwies bi dr ETIHAD! Die vier Manne hei de dür das doch so etliches z`Fachsimple gha dr ganz Abe. Es isch de ou gnue Bier gflosse! Mir Froue hei de hingäge es feins Glas Wy gnosse i üsem grosse Gärtli u hei üs de ou so mängs z`verzelle gha. Gmüetlich isches gsi! S`Wirze hei de ou grad bi üs gnächtiget u am andere Morge hei mir de alli zäme no es feins Zmorge miteme „homemade“ Zopf vo dr Ursle gnosse! Merci Ursle!

Am glieche Abe isch de scho wieder Programm agseit gsi. Mir, das heisst Epplers, Stutzes u s`Ackermanns, hei abgmacht gha zäme s`eijährige z`fyre u wies dr Zuefall het welle, hei „just“ am glieche Tag ou d`Judith u Martin es Jubiläum gha. 20 Jahr verhüratet. Das isch Grund gnue gsi zum uswärts fein ga dieniere im „Fishmarket“!