S`Nachbers us dr Schwyz!

Dr erschti Abe Nachtässe im Vascos

Bi üs isch i dr Zwüschezyt d`Hitz zrüggkehrt u s`Termometer erreicht mittlerwyle scho wieder über 40°. Mit dr Hitz isch ou wieder d`Zyt cho für Bsuech. Die ganzi letscht Wuche hei mir üsi Nachbare us Neerach, Moni, Andi u Raphi bi üs z`Bsuech gha. Mir hei doch so mängs unternoh i dere Wuche. Besichtigung vom Emirates Palace, Fishmarket, Dattelmärt u Gmüesmärt, Heritage Village, ei Tag isch fürs Shoppe reserviert gsi, u ei ganze Tag hei mir i Dubai verbracht. Dette isch Schiefahre, bade am Jumairah beach, Besichtigung vom Gwürzsouk u Goldsouk uf em Programm gstande. Zum abrunde vo däm schöne Usflug si mir de im Hotel Madinat Jumairah no ga z`Nachtässe.

Was ou nid gfählt het isch dr Wüeschtetrip u e Aberundfahrt ufem Schiff mit Nachtässe.

Dr Donnschtig isch reserviert gsi für di Dütschi Schuel, da ig im OK vom Feschtkommite bi,u dajahr 30 Jahre Deutsche Schule Abu Dhabi gfyret wird, si zu däm Jubiläum zwe Aläss planet. Dr Einti isch äbe am Donnschtig gsi u dr zwöiti findet de Ändi Mai statt. Dä vo letscht Wuche isch ganz im Zeiche vo de Schüeler gstande. Mi het verschiedeni Projekt vorgstellt oder besser gseit vorgfüehrt. Es het es Theater gä, e Modeschou über die letschte 30Jahr oder es isch sogar e CD produziert worde u no vieles meh! Dr Raphael het sich glii zrächt gfunde um söfel Chind u es het nid lang brucht het er Kontakt knüpft u het mit e paarne scho Fuessball gspielt. Nid öppe dinne, nei verusse! Drum hei mir ihn de glii mal müesse bremse, süsch hätti er sicher no en Sunnestiech igfange, da s`Termometer scho wieder über 40° azeigt het.

S`Riläxe am Pool isch fasch e chli z`churz cho i dere Wuche.

Öppis hei mir üs nid la entgah! Da d`Moni Coiffeuse u Bsitzeri vomene Salon i Neerach isch,(www.coiffeursunshine.ch) u sie s`ganze Wärchzüg wases zum Haarschniede brucht derbie gha het, hei mir die Glägeheit packt u sie gfragt, ob sie üs ächt chönnti d`Haar stutze. Churzum isch üse Sitzplatz ine Salon umgwandlet worde u sie het üs mit flinke Händ zackig e neui Frisur häne zouberet. Merci Moni.

Am Ändi vo dere Wuche het d`Moni nume no ei Wunsch offe gha! Sie hätti no gärn es Henna Tatoo gha. Ohni lang züberlege, het üs Tönel am Frytig no is Heritage Village use gfahre wome so Tatoos cha mache la. Mir hei dr Lade grad gfunde u e früntlechi Frou usem Sudan het üs begrüesst. Fatima isch ihre Name gsi .Mit ruhiger Hand u mit Perfektion het sie mit dere Henna-Masse innert chürzischter Zyt e wunderschöni Bluemezeichnig uf üsi Chnöchel gschprützt. S`Resultat gseht ihr uf de Föteli!

Die Wuche isch wie im Flug vergange u scho hets wieder gheisse Ghoffere packe u mir hei d`Monika, dr Andreas u dr Raphael a Flughafe begleitet. Sie hei mit ruhigem Gwüsse chönne abflüge, will der Zuefall hets welle, das dr Dide Captain uf däm Flug nach Gänf gsi isch!

Abestimmig ufgnoh vom Heritage Village

Raphael im Kampf mit em Salzwasser

Blick uf Creek vo Dubai

D`Wassertaxi (Abra) wo üs zum Souk bracht hei

Goldsouk

Gwürzsouk

Vo dr Abra (Wassertaxi) us ufgnoh

Madinat Jumairah

Deutsche Schule Abu Dhabi

Raphael i dr mitti luegt gspannt dr Modeschou zue

Nachtässe ufem Schiff!