Khutwa, Madbah, Hatta

Khutwa u Madbah lieht im Oman u Hatta i de UAE. Das sie Ziel gsi vo üsem Offroad-Trip vom Zyschtig ufe Mittwuch. Das ganzi het im Vorfäld gwüssi Vorbereitig brucht.

Um d`Routewahl hei mir üs, Eppler u Ackis, nid müesse kümmere, will dr Peter u dr Wolfgang das ganzi perfekt organisiert hei. So ganz nach Dütscher Manier: ruck, zugg, zack,zack. E grosses Dankeschön a beidi Familie Lembach u Lachmair. Als erschts hei mir üs müesse um Camping-Usrüschtig kümmere. Dr Wolfgang het sich Zyt gno u isch mit üs ga Zält, Schlafsäck, Klappstüehl, Gaslampe etc. choufe. Mir als „Blodybeginners“ hei doch kei Ahnig gha was es brucht zum Campe! Nachdäm mir de so s`Nötigschte ka hei, hei mir de en Probelouf i üsere Stube gmacht u churz probiert s`Zält ufstelle u man staune, es het klappet wie das d`Foto bestätiget. Vorallem han ig ja müesse wüsse wie das ganzi funktioniert, denn Tönel het nid chönne derbie si. Er isch i dr Nacht ufe Zyschtig, wie so oft, nach London gfloge.

Am Zyschtig am 08.30h isch Träffpunkt gsi bis Lachmayers zum s`Gepäck i d`Outo verteile. S`Meischte het mer de bi mir ine gschtopft, da ig ja mit Abschtand am meischte Platz ka ha.Ussert mir hei alli andere no Bsuech derbie gha u e so hets de e gmischti Schar vo 22 Persone gä. Um 09.45h si mir de los gfahre richtig Al Ain. Churz drüberabe hei mir de dr Zoll für in Oman erreicht. D`Spannig isch gschtige, will bi mir isch dr ganzi Alkohol glade gsi u Ifuehr vo Alkohol isch absolut verbote. I ha Gott sei Dank nume grad knapp müesse dr Pass zeige u scho bin ig düre gwunke worde. Alli hei gjublet!

I Khutwa hei mir de s`erschte Etappe Ziel vom Tag erreicht. Das isch e wunderschöni begrüenti Oase. Hie hei mir de im Schatte under de Palme z`Mittaggässe u hei nachhär ou no es chüels Bad gnosse i de erfrüschende Pools. Nachdäm ischs de wieter Richtig Madbah Pools.. Vo da a isch es so richtig los gange mit Offroad fahre. Ueber Stock u Stei u im Schritttempo hei mir üs vorwärts kämpft richtig Gebirge.Es het grumplet u gschüttlet im Outo, schlimmer als imene Schüttelbächer! Churz vor Sunneuntergang si mir de uf däm Hochplateau acho u hei zersch emal es chüels Bier zu üs gno u derzue dr Sunneuntergang gnosse, derwiele sich d`Jungmannschaft mit chlättere beschäftiget het. Denn het ou no es chüels Bad müesse si, will es isch doch scho fasch unerträglich heiss gsi dr ganzi Tag. Mir heis de dür das ou verpasst bi tagesliecht d`Zält uftsstelle. Dr Wolfgang u dr Peter hei sich de em Für gwidmet u es het nid lang duuret, isch es feins Düftli vom brutzlende Fleisch uf em Rost i dr Luft gläge. S` feine Znacht isch de mitemene „guet temperierte Glas Wy“ abgrundet worde. Under strahlendem Stärnehimmel si mir de no gmüetlich zäme ghöcklet u hei no chli plouderet während die Junge gnüsslich are Shisha zoge hei. Bi mir isch de am 22.30h Nachtrueh agseit gsi. I bi völlig düre gsi nach däm asträngende Tag u ha mi de i mis Zält verzoge. Am andere Morge am 06.30h bin ig de zum Zält us kroche u mir isch e feine Kafiduft i d`Nase gstoche. Nei , nei nid öppe Nescafé, sondern en feine Cappucchino het Beate häre zouberet. Das isch de scho Luxus gsi. Nachdäm isch de scho wieder es chüels Bad agseit gsi, d`Sunne het ja scho wieder züntet wie e infrarot Lampe. Vo Schatte wiet u breit kei Spur i dere kahle Mondlandschaft. Es het de no e Diskussion gä übers wietere Tagesprogramm. Fürs Lachmairs ischs klar gsi, dass sie diräkt hei gö u für e grosse Räschte isch d`Frag gsi, ob mir no zu de Hatta Pools fahre bevors wieder hei geit. Ussert dr Linda, wo wehemänt dr gäge gsi isch, Tochter vos Epplers, si alli derfür gsi. Im nachhinein het sich de aber usegstellt, das mir besser uf d`Linda glost hätti!

Nachdäm mir üs de für d`Hatta Pools entschiede hei, ischs as grossi zäme packe u Ufrume gange. Am 09.30 si mir de Abfahrt bereit gsi. Im drüer Konvoi hei mir dä abentürlichi Trip unter d`Räder gno. Einisch meh isches über Stock u Stei u über Höger ufe u abe gange u dür Bachbett düre. Alles isch verträtte gsi u mi het voll konzentriert müesse fahre. Leider hei mir de müesse feschtstelle, dass die Schotterstrasse usbout wärde u mir hei immer wieder müesse de Trucks, Bouarbeiter oder de Dampfwalzene uswieche. Isch nid immer eifach gsi!

Zum Teil isch scho teeret gsi. Ei Teil hei mir de dürfahre u mir hei alli sofort gmerkt das da öppis nid cha stimme. S`Outo isch richtig gschwumme u wie chönnts anders si, das Strassestück wo mir passiert hei, isch früsch teeret gsi. Oje oje, mir hei de churz aghalte u üsne Ouge nid trout. D`Outo si mit Teer zuebetoniert gsi u dä isch rundume nume so abetropfet. Es het ou nid lang duuret u mi het die erschte Spure vo Teer a üsne Chleider u Körper gseh. Jä nu, mir heis nid chönne ändere, hei üsi Reis wieter fortgsetzt. Da mir de no dür Sandpischte u Flussbett gfahre si, hei de die Chäre usgseh wie panierti Schnitzel!

Nach zwöi abentürliche Fahrstunde si mir de äntlich bi de Hatta Pools acho.

Hie hei mir de üses wohlverdiente Mittägasse u Bad gnosse u d`Chind hei sich muetig mit im „Klippespringe“ güebt. Daderzue hei mir de no Bekannschaft gmacht mit zwöi „sehr, sehr fründliche Araber“. Leider het sich de am andere Tag usegstellt wieso die Fründlichkeit¨!

Das, ou da, sozäge kei Schatteplätz gä het u d`Hitz ihri erschte Tribut gleistet het, dr Fräne si sozäge d`Flip Flop vo de Füess gschmolze, hei mir üs de nach guet anderhalb Stund uf d`Heifahrt gmacht.

Die isch de zügig gange u mir si gäge die füfi wieder diheime gsi. Hie hei mir üs de em Poblem Outo gwidmet. Dr Dide u ig si de churz drüberabe mit üsne Outo i die nächschti Wöschalag gfahre zum Abkläre wo und wieme üsi Chäre vom Teer cha befreie. Mi het üs de gseit mi müessi nach Musaffah, dette giebs spezielli Garage wo das mieche. Also hei mir üsi zwe Toyota nume la wäsche u si de wieder hei. Am andere Morge het de dr Dide pionier Arbeit gleischtet u isch nach Musaffah use gfahre u het tatsächlich e Bude gfunde wo sin Prado innerhalb ere Stund wieder flott gmacht het. Währendesse das Outo gfieglet u putzt worde isch, het dr Dide e Entdeckig gmacht a sim Outo wo er vorhär nie gseh het. Er het üs de sis suber pützlete Outo vorgfüehrt u üs die Bescherig zeiget.Uf dr Biefahrersiete im Türrahme oberhalb vom Fänschter hets all jeni Chritz u Hick gha. Mir hei de Agfange rätsle vo wo das chönnti si. I ha de plötzlich gmeint das gsiech us, wie wenn öpper s`Outo ufbroche hätti! Da het de dr Dide gmeint, ize sig ihm alles klar. Er hebi no dänkt es sigi komisch das er keini Nötli me im Portemonnai heig gha geschter am Abe. Het aber nüd wieter debie dänkt, wills eh nümme viel gsi isch. Mir si de sofort üses Outo ga beguetachte u siehe da, ou mir hei Hick u Chratzer genau am glieche Ort. Also isch dr Fall klar gsi. I ha zwar Glück gha u ha mini Wärtsache immer bi mir treit u dür das fählt mir ou nüd. Nume s`Outo isch umene Schade riecher! Mir si fasch sicher, dass das Wärch vo dene zwöi nätte Araber gsi isch. Dr einti het immer gluegt was mir mache u dr anderi het sich dr Arbeit gwidmet. Die negative Pünkt träge aber nüd derzue bi, für das die zwöi Täg wunderschön si gsi u nach Wiederholig rüefe!

Khutwa

Madbah

Hatta