Summerzyt - Feriezyt

Zyt vergeit wie im Flug! Grad vorgeschter han ig Tönel wieder a Flughafe bracht. Uesi gmeinsame zwe Wuche Ferie i dr Schwyz si scho wieder verbie! Ig sälber bliebe no bis Afangs Ouguscht i dr Schwyz. Wo ig ihm a dr Passkontrolle tchüss gseit ha u gmüetlich zrugg zum Outo gloffe bi, ischs mir so richtig bewusst worde, wie schnäll die Zyt vergeit. Meh als eis Jahr isch ize här sit mir dr Schwyz dr Rügge kehrt hei. Wen i so zrugg luege ischs es mega spannends u erläbnisriechs Jahr gsi u für üs isch ganz klar, mir heis beidi no nie bereut das mir das Abentür igange si u im Momänt isch ou s`Zruggcho no keis Thema, obwohl mir i de letschte zwe Wuche ou d`Schönheit vo dr Schwyz wieder gseh hei. I dene zwe Wuche hei mir üses Hus u Garte wieder so richtig uf Vorderma bracht. Es het richtig Spass gmacht wieder emal so richtig im Garte umeznoddere! Ou s`gmüetliche zäme sitze, pläuderle, zäme eis süffle mit Familie u Fründe isch nid z`churz cho.

Tagesusflug mit Michele u Mario! Mit em Zug nach Luzern, wos en churze stopp gä het aber für e paar Cüpli hets glängt, u vo dette wieter nach Lugano u am Abe gmüetlich im Spieswage wieder zrugg nach Züri!

Iladig zum Nachtässe bi dr Susi. Dr Päde u sie si grad d`Wuche vor üsne Ferie bi üs z`Abu Dhabi z`Bsuech gsi!

Was en wietere Punkt wird sie won ig gnüsse solang ig no i dr Schwyz bi, isch, äntlich wieder emal schlafe mit offnem Fänschter ohni ständig s`rattere vo dr Klimaalag i de Ohre z`ha!

No churz was dr Blogger betrifft: I wirde wieter fahre mit em Blogger, aber da ig ja bis afangs Ouguscht i dr Schwyz bi, wirds i dr nächschte Zyt nid allzu viel z`läse gä, drum häbet bitte Geduld es geit bestimmt wieter mit em „SHISHAGFLÜSCHTER“!

Ufem Wäg zu mire Familie nach Intelaken

Es het sogar für en churze Kafihalt nach Grindelwald glängt bevor mir zu mir Familie si!

Es isch halt ou schön!!!!!

dr Eiger!