Vorbereitig für e Wiehnachtsbasar!

D`Vorbereitige für de Wiehnachtsbasar vo dr DSAD (Deutsche Schule Abu Dhabi) , isch voll im Gang!

Agfange hets eigentlich scho im Novämber. Tönel het e Flug planet gha i d`Schwyz u het dr Uftrag übercho Tannezweig, Tannzäpfe u Läbchüeche z`poschte. Sini Begeischterig zu der Mission het sich in Gränze ghalte! Tannezweig hei mir de aber im Vorfäld scho probiert z`organisiere. Isch es schwierigs Unterfange gsi. Ig ha etlechi Buure vo Neerach agschriebe ob sie eventuell scho Chries hätte, ha aber immer wieder e Absage übercho. Lang hets usgseh, als müessi mir da Jahr ohni ächts Tannchries uscho. Doch Dank üsem Bsuech, Monika u Thomas, wo sich dere Sach ou agnoh hei u fliessig e-mails gschickt hei, hets de doch no klappet. Tönel isch de vollbelade mit emene 15kg Karton voll Tannchries, 50 Läbchüeche und emene Koffer voll Tannzäpfe zrugg cho u het somit sini Mission erfolgriech erfüllt!

Am Mittwuch hei mir üs, das heisst s`Feschtkommite, zum Wiehnachtsgschteck bastle troffe u geschter si d`Verchoufsständ ufgstellt worde u dr ganz Garte isch wiehnächtlich dekoriert worde, u hüt 7. Dezämber findet dä alljährlich Wiehnachtsmärt statt.