Vertroue isch guet, Kontrolle isch besser!

Am letschte Mittwuch het mir Tönel spät am Abe, mit voller Ueberraschig via SMS mitteilt, das är am Frytig scho wieder i d`Schwyz chömi, nachdäm er ja erscht am Mäntig zrugg gfloge isch. Grund isch: Er het am Zyschtig uf de Mittwuch New York Resärve gha u tatsächlich het er müesse ga. Mi het ihn churzfristig am zwölfi znacht, für dä Flug ufbote. Bevor er aber no definitiv het chönne dr Flug am Frytig Mittag Richtig Frankfurt aträtte het sich de für ihn no es chliners Problem gschtellt. Wie chume ig zumene Ticket.

Nachdäm er am Frytig morge pünktlich am 07.30h vo New York glandet isch, het er sich zügig as Ticket organisiere gmacht. Im normal Fall wär ja das überhoupt keis Problem. E Bsuech bim Staffschalter u die Sach wäri gritzt. Aber äbe nid amene Frytig! Bekanntlecherwies isch Frytig Sunntig i de Arabische Emirat u alli Büro si gschlosse! Also het er sich diräkt am Flughafe schlau gmacht, u tatsächlich, es Ticket Abu Dhabi Frankfurt isch ruck zuck usgstellt gsi. Es git nämlich e Ticketschalter wo ou Staffbillet darf verchoufe. Aber ei Hagge het das ganze gha, sie chöi nume Ticket für Etihad Flüg usstelle! Drum het er sich de erkundigt was es vollzahlends Ticket Frankfurt Züri würd choschte. Mit dr Swiss um die 920Dirham ischs günschtigschte gsi u er het nid lang müesse überlege u grad zuegschlage. E churze Blick ufs Ticket u er het müesse feststelle, das dr Retourflug falsch isch gsi. Anstatt am 28Auguscht ischs dr 26. gsi. Oje oje, hüt chame ja fasch nümme umbueche bi dene günschtige Tarife ohni drufzahle! So ischs de ou gsi. Nomal guet 200 Dirham u äntlich het er s`Ticket i de Finger gha! Dr Hiflug am Frytig u dr Retourflug am 28.?.! Schlussäntlich han ig de Tönel am Frytig abe am 21.40h chönne abhole z`Züri. I dene vier Täg wo er da isch gsi, isch mängs gloffe! Am Frytig si mir diräkt a Jazzabe z`Büli i dr Altstatt. E gmüetliche Abe hei mir verbracht mit dr Gisela, Gerti u ihrem Fründ Dani u s`Wylers. Am nächschte Abe isch de Badefahrt agseit gsi, das ou wieder mit dr Gisela, Claudia u Gerti mit em Dani. Mir hei de nid soo viel gseh, das e u Mängi Lüt gha het, aber luschtig ischs trotzdäm gsi. Ou am Sunntig isch wieder Badefahrt ufem Programm gstande. Damal hei mir mit dr Nichte u ihrem Ma Marc abgmacht. Dr Grund wieso mir gange si, ischs Konzert vo de „ Plüsch“ gsi. Es het sich meh als glohnt si mir nomal gsi. Es isch eis vo de besserer Konzärt gsi, wo mir i dr letschti gseh hei. D`Stimmig u d`Musig isch eifach dr Hammer gsi! Ig gieng grad nomal ga luege oder besser gseit ga lose!

Dr Mäntig hei mir de gmüetlich deheime verbracht u äntlich dr verpassti Schlaf nagholt u hüt Zyschtig isch ja scho wieder Zyt gsi für Tönel abzreise. Churz nach de füfe si mir de Richtig Flughafe. Dr Swissflug isch für 18.40h agseit gsi. Muetig si mir diräkt ane Selfcheck-In Chaschte. Doch wie immer, mir heis nid gschafft u hei wieder an helpdesk müesse. Dr Herr vo de Swissport am Schalter luegt churz s`Ticket a u seit ganz früntlich: „ Es tuet mir leid, aber mit däm Tarif chöit ihr nid umbueche!“ Tönel u ig luege enand verdutzt a u säge: „ Mir wey ja gar nid umbueche“! Er zeigt ufs Ticket u seit: „ Ja aber, eue Flug isch erscht am 28. Septämber!“ Mir hei üsne Ouge nid trout! Es isch üs nüd anders übrig bliebe als z`Luftreisebüro z`kontaktiere. Dette het me üs s`glieche nomal gseit. Mit däm billige Tarif chame nume mit ufzahle umbueche. Mir hei probiert z`erkläre, dass das ganzi falsch usgschtell worde sigi, aber alles het nüd gnützt, obwohl sich die Person alli Müeh gä het,isch dr erschti gseiti Ufpries 450Fr. gsi. Wohlverstande oneway Züri Frankfurt. Mir hei enand nur no läng agluegt. Doch die nätti Person vo dr Swiss het nid ufgäh u gloub alli Möglichkeite usgschöpft u schlussäntlich isch de dr „Final Ufpries 352CHF“ gsi! Jä nu mir hei kei anderi Wahl gha u Kreditcharte müesse zücke!

Mittlerwiele ischs de scho e halb Stund vor Abflug gsi u mir hei üs zügig vonenand verabschiedet u Tönel isch Richtig Abfluggate zottlet. Es het üs einisch meh glehrt: Vertroue isch guet, Kontrolle isch besser!