Neerigflüschter: Marbeilla

Pünktlich si Claudia u ig am Frytig 13.20h z`Malaga mit dr SWISS acho. Die andere zwöi si via Madrid nach Malaga gfloge. S`Gepäck hei mir nach längerem Warte ou übercho u nachhähr ischs wieter zu dr AVIS. Aber hoppla, dr Schalter i dr Akunftshalle isch gschlosse gsi. Was nun? Mit Telefoniere u Frage het me üs de dr Wäg erchlärt u mir hei üsi Köffere packt u si los marschiert. Mi het is gseit mi müessi us dr Akunftshalle use u de links u vo dette göchis de no öppe 80m u denn sigs de agschriebe. Gesagt getan mir si gloffe u gloffe u gloffe u wiet u breit isch kei Tafele cho vo Rent a Car. Ussert Boustelle hei mir nid viel gseh. Doch wär suecht dä findet ja ou! Äntlich im hinterschte Egge vom Parkhus het me üs nomal mit em ganze Gepäck düre Sicherheit gschlüüst. Das sigi anschienend e so sit all dene Terroraschläg i Spanie. Verständlich! U so si mir de fündig worde. Ize ischs Ruckzuck gange u mir hei dr Schlüssel vo üsem härzige Chliewage übercho. Mir hei üsi Sache wieder packt u ab ischs gange Richtig Parkhus u mir hei nid lang müesse sueche bis mir vo üsem Wägeli gstande si. Churzum han ig min Koffere wölle ilade, aber ohä lätz, dä het nid ihne passt. Also gits nüd anders als ufe Rücksitz mitem. Zum Glück het de dr Claudia ihre platz gha, süsch wärs de bigoscht e chli eng worde uf em Rücksitz!. Das so wäge Chliewage! Mir hei chönne vo Glück rede si mir nume zwöit gsi! Die andere zwöi hei glücklicherwies e organisierte Transfer gha vo de Hapimag us . Also isch üs nümme im Wäg gstande u mir si los gfahre Richtig Marbeilla. E Wägbeschrieb han ig vo dr Gisela vorgängig übercho. Aber mir hei de glii müesse merke, dass mir besser nach Gfüehl fahre als mit em Wägbeschrieb. So als chlieses Biespiel: Usfahrt Marbeilla rechts über Brügg! Wär ja scho guet gsi aber Brügg isch links gsi. Dr bescht isch de aber gsi wos gheisse het: Alles grad us u bi dr zwöitletschte Liechtample rechts! Was macht me da? Mi fahrt bis zur letschte u dette chehrt me de!! E so si mir de mit e paar Umwäg doch no a üsem Ziel acho! Mit tratri tratra hei üs s`Gerti u Gisela empfange!

Nach Besichtigung vo üsere Wohnig, mit Blick ufs Meer, wo übrigens sehr gmüetlich igrichtet isch, ischs as Ipuffe gange. Mi hei glie gmerkt, vor allem im Bad, geit nüt über Ornig!

Dernah si mir de diräkt is Hus eigene Lädeli s`nötige ga Ichoufe. Das het e riese Vorteil gha, mir hei diräkt mit em vollbeladene Ichoufswägeli i d`Wohnig chönne! Wär cha das scho?

Usflug nach Gibraltar! Nach zwe Täg sünnele, läse, bädele u ässe hei mir üs doch ufgrafft für es chlieses Usflügli nach Gibraltar. S`Mietouto het doch ou e bitzeli müesse bewegt wärde. Am Zyschtig gäge Mittag hei mir üses Wägeli packt u hei die 64km under d`Räder gno. Nach guet drüviertelstund si mir de am Zoll acho! Dette si mir de zügig dürecho u hei nach längerem umekurve ou mal es Parkhus gfunde u erscht no nach zur Altstadt. S`Outofahre isch kei hit dette, d`Strasse si sehr eng u Parkmöglichkeite gits ou nit im Überfluss. Mir si ja emal gspannt was üs das wird choschte! Weme dür d`Altstadt schlenderet u chli uf Details achtet füehlt me sich i dr Tat wie z`England.

Vieles düdet drufhi! Für üs isch ou klar gsi das mir de berüehmti Affebärg möchte gseh. Uf em Wäg derthi si mir de vo Reisefüehrer aquatscht worde ob mir nid e gfüehrti Tour möchtet mache. Mir hei nid lang überleit u zuegseit. Miteme Chliebus ischs de los gange. Z`Besichtige hets unterurdeschi Feschtige usem erschte Wältchrieg gä u eTropfsteihöhli u natürlich die berüehmte Affe. Nach dr Besichtigung vo dr Höhli si mir de amene Souvenirlädeli u Beizli verbie cho u da isch üs de es Plakat mit Glacé is Oug gsprunge. Drum nüd wie los u mir hei alli, ussert Gisela, es feins Cornet poschtet. Chum hei mir dr Lade verlah, isch mir en grosse Fällchnöiel ufgfalle u i ha gmeint es sigi en usgstopfte Aff. Aber oha lätz, i ha chum fertig dänkt gha, bewegt sich dä Chnöiel Fäll diräkt uf mi zue. I bi dermasse verschrocke. Dä gueti Aff het sich am mim Hosebei fescht klammeret u wie verruckt am T-Shirt grupft u langsam aber sicher probiert a mir ufe z`chlättere. Mir isch de schnäll klar worde das dä mini Glacé hät welle. Aber i ha mi gwehrt sowiet i ha chönne, aber mini Glacé het er nid übercho. Mit kreische u gheusse u umefuchtle han ig ihn doch no los bracht u bi de so schnäll als möglich zrugg i Lade zu de andere, die, wo sich sofort usem Stoub gmacht hei u das ganze Gscheh mit dr nötige Distanz u Sicherheit hei chönne mitverfolge! Mir hei dä Ort erscht wieder verlah wo mir Glacé fertig gässe gha hei. I us minere Sicht ha scho gnue gha vo all dene Affe! Bi de wietere Besichtigungs-Stop han ig de die nötig Distanz gno zu dene Viecher! Doch fairerwies muess ig ou säge, solang me nüd z`Ässe het lös eim ou in Friede! Die ganzi Tour het de guet zwe Stund duuret u dernah hei mir üs de no dr Durscht imene typisch englische Pup glöscht. Gmüetlich si mir de zrugg gfüesslet zum Outo. Bi dr Parkhuususfahrt hei mir de üsi Euronötli scho parat gha. I ha a dr Kasse mis Parkchärtli abgä u de Herr am Schalter seit imene wunderschöne englische Akzänt: „ Two Euro please“ Es isch fasch nid zum gloube gsi!

Grillabe in house!

Am folgende Zieschtig isch en Grillabe mit aschliesseder Flamengoshow uf üsem Programm gstande. Das ganzi isch vo Hapimag us organisiert worde u agfange hets um die 19.00h. Mir si de chli früecher vom Strand zrugg i d`Wohnig um üs so richtig usezbützle. Abeme gwüsse Alter brucht me halt e chli länger! Während die andere no beschäftiget si gsi hinterem Spiegel, ha i Glägeheit gnützt churz e Blick über Balkon i Garte z`wärfe zum luege obs sich ächt scho viel Lüt igfunde hei. Zum mim Erstuhne hets doch scho rächt gräblet. Das wär ja no gange, aber mir mit üsere Alegi wäre mir schlichtwäg „overdressed“ gsi. Shorts u T-Shirt si agseit gsi. I ha de churzum die andere informiert u die hei sich de ouno sälber vergwüsseret u was hei mir gmacht? Ja klar. Tenüwächsel! Das isch ja no grad e so gange aber dr bescht isch de no cho! Mi het iglade zumene Grillabe mit allem drum herum u was het me müesse? Alles sälber grilliere u dr Salat hets us Plastigböxli gä! Das het de am ganze no grad s`Chröndli gä! Nachdäm mir de zersch emal e chli gstänkeret u pfuret hei, hei mir üs de drie gschickt u s`Beschti drus gmacht. E luschtige Abe hei mir de trotz allem gha u d`Flamengoshow isch doch rächt guet gsi! Doch dr Kafi si mir de Uswärts ga ha.