Zrugg i Abu Dhabi, aber nume für churz!

Won ig am Frytig Morge vore Wuche wieder in Abu Dhabi glandet bi, hets dr Zuefall welle, dass Tönel u grad zur glieche Zyt acho si. Er isch denn vo New York cho.

Uf em Wäg zum Outo han igs scho s`erschte Mal wieder gspürt wie heiss es cha si u trotzdäm han igs wieder gnosse. Für mi ischs i däm Momänt bewusst worde; I bi ou da diheime!

Dr eigentlichi Grund wieso ig churz zrugg bi, isch: Min Brüetsch dr Reto u sini Frou Petra si z`Bsuech cho.

Sie si am glieche Tag, z`Abig in Dubai acho u si de mit emene Mietouto nach Abu Dhabi cho. Sie hei ou mal welle erläbe wies isch wes e so richtig heiss isch! I gloube, so schnäll wärde sie die Wuche nid vergässe, es isch bigoscht nid sehr agnähm we eim konstant e heisse Föhn ablaset! Die höchi Luftfüechtigkeit treit ou no dr zue bi! Dr Pool bi üs im Compound gliecht ere heisse Badwanne u chüelt ou nid ab.Mir hei dür das ou nid sehr viel chönne unternäh ussert:

Poschte, poschte u nomal poschte, denn übere Summer chame hie so mängs Schnäppli ergattere, will überall isch Usverchouf. Mit em Endeffekt das me e neui Ghoffere het müesse choufe! Am letschte Mittwoch hei mir üs de wieder vonanend verabschiedet u sie si no für zwe Nächt is Hotel nach Dubai bevor sie wieder zrugg i di chüeli Schwyz si.