Während mir am Frytig am Flughafe Züri uf e Abflug gwartet hei, han ig mi per SMS no bi üsne Nachbere abgmäldet u s`nötigschte mitteilt u churz drüberabe s`Händy usgschallte u ha dänkt die Sach sigi e so erledigt. Pünktlich het dr Flüger Richtig Gänf abghobe u e gueti halbstund später simer de scho wieder z`Bode i Gänf. Dr ichecketi Koffer hei mir ou gli übercho u si de Richtig Hotel losgwagglet. Tönel het gmeint es sigi nid wiet zum loufe, öppe 10 Minute, u es tächi ja no guet e chli d`Füess vertschalpe. Wo er ja ou rächt gha het. Aber us dene 10 Minute si de meh als 20 Minute worde. Ou das wär ja nid sooo schlimm gsi wenn ig s`richtige Schuewärch hätti agha bi dere Chälti. Am Schluss han ig d`Füess nümme gspürt i mine Halbschüehli! Drum hei mir de no öppis warms welle trinke nachdäm mir äntlich im Hotel acho si. I dr Zwüschezyt isches nämlich scho gäge Mitternacht gange. Mi gloubts fasch nid aber mi het üs nümme serviert es sigi alles zue es gäbi ja no e Minibar im Zimmer! Super! Das gits ou nume i dr Schwyz!
Also hei mir kei anderi Wahl gha u si diräkt ufs Zimmer u dette hei mir de no Rohschinke u Schöggeli gnüsslich uf em Bett gässe, was eigentlich für Abu Dhabi gsi wär. Z`Trinke derzue hei mir üs de dänkt, will d`Minibar isch nid überwätigend gsi. Näbscht em Alkohol hets no eis lousigs Coca Cola Zero gha. Uf das hei mir beidi kei Lust gha.
Derwiele han ig de mis Schwyzer Händy wieder aktiviert u chum bin ig iglogget gsi, hets scho bimmelet. Es SMS! Ig bi überzügt gsi das es vo üsne Nachbere isch. Aber däm isch nid so gsi: Combox! I ha die sofort agwählt u e frömdi Stimm, mit bärner Dialäkt, begrüesst mi sehr früntlich: „ Grüessech da isch Herr ………. Ig ha es SMS vo euch übercho wo sicher nid für mi bestimmt gsi wär? Er möchti mir das nume mitteile, will er dänki es sigi no es wichtigs SMS u er wünschi mir schöni Ferie! Tja! Da isch tatsächlich öppis falsch gloffe. Ig ha ja gwüsst, dass üsi Nachberi irgendwenn e neui Nummer übercho het, aber i bi sicher gsi, dass ig die ou gwächslet ha, d`Frag isch nume han igs würklich ou uf beidne Händy gänderet? Das heisst ig ha es Handy für i dr Schwyz u eis nume für Abu Dhabi. U tatsächlich i ha d`Nummere mit em Abu Dhabi Händy vergliche u logischerwies ischs e anderi gsi. I ha de däm nätte Herr sofort zrugg gschriebe u mi bedankt u gschriebe, er heigi sicher scho öfters vo mir es SMS übercho u mi entschuldigt für dä „faux pas“.
Isch doch schön gits no so ehrlechi Lüt!
Keine Kommentare:
Kommentar veröffentlichen