Ilüte!

Mit Pouke u Trumpete s` Neue Jahr ilüte! Obwohls dr Aschie macht, stimmt das nid ganz! Mir si bi Dütsche iglade gsi wo mir vorgängig no gar nid kennt hei! Mir si uf Umwäge zu dere Iladig cho. Mit guet 20 Lüt hei mir dr Silveschterabe mit Grille u gmüetlich zäme sitze bi de Gaschtgeber Gabi u Andreas im Garte verbracht.

Wär het scho mal e Tischbombe zündet ohni Zündschnuer u Für?! Mir a üsem Tisch si doch alli überrascht gsi u dr Wolfgang het sich mit dere Spezie usenandergsetzt u wies so schön heisst: vor Gebruch Verpackigsbielag läse! Aber äbe, chinesisch söt me do chönne! Alli rundum hei das runde, länge, farbig verpackte Ding rundum beguetachtet u niemerd usser dr Wolfang hei usgfunde wieme die Bombo zum Zünde bringt. Er het churzum das ominöse Ding i d`Finger gno, zielgrichtet uf Tönel, natürli nid mit Absich, churz dran ume dreiht u scho hets klepft! Konfetti u Glitzer si ungebremst uf Tönel zuegschosse! Üs hetz fasch putzt vor lache. Sis Glätzli het glänzt u glitzeret wie es gschmückts Tannebäumli!

Wätter ( Themawächsel) Dr Winter het izugghalte i dr UAE. Sit guet eire Wuche isch es markant chüehler worde. Dr Wätterbricht seit sogar Hagel vorus u d`Rägesaison isch ou iglütet worde. Hüt am Morge hets sit guet eim Jahr wieder emal Wasser vom Himmel gä u d`Wätterussichte säge no meh Räge u Sturm vorrus. Brrrrrr Es wird langsam aber sicher ungmüetlich im Hus u es git nüd anders als Faserpelz u dicki Socke montiere!