Neerigflüschter: Alles ums chliene wysse Bälleli!

Es isch no im Dezämber gsi wo ig düre Bekannte druuf cho bi, dass s`OK vo de „Abu Dhabi Golf Championship“ vom 17. – 20. Jänner, no Volunteers (freiwilligi Hälfer) suecht. Ig bi sofort Für u Flamme gsi u ha dänkt das muess doch spannend si, mal die Profigolfer hutnah zgseh spiele. Drum han ig die Glägeheit grad am Schopf packt u mi agmäldet. Prompt han ig e Zuesag übercho für de 17./19./20. Jänner. Dr 18. han ig ja, wie scho gschriebe i Dubai verbracht. Ig ha mi de nur no müesse entscheide wele Job ig wetti mache! Leaderboard oder Marshall! Ig ha ja vo beidem nume e chlieni Ahnig gha wases da z`mache git, drum han ig mi de spontan für Marshall entschiede. E Wuche vor em Turnierstart si mir no mit de nötige Chleider u Batch usgrüschtet worde u e Infoabe hets ou no gä.

Dr Isatzplan isch immer am Abe vorhär im Internet uf dr Homepage vom Turnier http://www.abudhabigolfchampionship.com/ ersichtilich gsi! Übrigens es lohnt sich ou schüsch emal dri zluege uf die Siete, will einigi vo de weltbeschte Golfer het me chönne verpflichte für das Turnier!

Uf jede Fall han ig mi gfreut uf dä Isatz! Am letschte Donnschtig han ig de scho am 06.45h müesse atrabe. Min Job a däm Tag isch gsi „Marshall Crossing“ ! Das heisst: Ig hätti müesse luege dass Zueschouer bim Loch 9 dr Fairway am richtige Ort u nur uf mis Kommando überquere! Mi het mir ufem Plan zeigt wo das Loch isch u wo das Crossing stattfinde sött! Ig ha mi de bizyte uf e Wäg gmacht, da ig ja dä Golfplatz überhoupt no gar nid kennt ha u ha das Loch 9 agfange sueche. Mit e chli umefrage han igs de ou uf Umwäge gfunde u ha mi diräkt unterhalb em Abschlag higsetzt, es het ja ou en Wäg gha dette wo quer übere Fairway gange isch, drum han ig de ou agno, i sigi am richtige Ort! Es isch nid lang gange u mir ischs stinklängwielig gsi! Keiner Zueschouer nur all 10-15 Minute d`Golfer wo abgschlage hei! Das isch spannenschte gsi vom ganze! Nach guet zwe Stund nüd aber ou gar nüd mache bin ig de gmüetlich am Fairway entlang glofe vom Loch 9 u ohalätz. Plötzlich stah ig vor e Tafele wo Fuessgänger drufe si u zeigt dass nur hie dr Fairway darf überquert wärde! Super Andrea! Han ig dänkt! Das wär dien Platz wo du highörtisch. Jä nu, es hets niemer gmerkt u wägedessi han ig ou am neue Platz nid viel meh ztüeh gha! Es het bigoscht nid viel Zueschouer gha am Donnschtig! Aber mi het mir gseit das wärdi de schono ändere ufs Wucheänd, was de ou gstumme het. Mi het das ganzi übrigens ou live im Radio u TV chönne mitverfolge!

Am Samschtig u Sunntig bin ig de Walking Marshall gsi! Uf das han ig mi de gfreut,will dette louft me mit de Spieler über die ganze 18 Loch mit u luegt dass Zueschouer ruhig si u sich nid bewege sobald dr Golfer parat isch gsi zum abschla. Zum das bewärchstellige hei mir de e Tatele ufghebt wo druffe gstande isch: „Quiet“ „no mobile“! Spannend isches gsi, dene Profis mal hutnah chönne über d`Schultere z`luege.

Überhoupt isch dr ganz Turnierverlouf spannend gsi. Nach de erschte drü Täg het en junge Dütsche, Martin Kaymer, überraschenderwies s`Turnier Tableau agfüehrt u het die Krecks wie Stenson, Garcia, Scott, Westwood etc. mit 6 Schläg Vorsprung quasi im Sand stah gla! Doch am vierte u letschte Turniertag hei de nid nume bim Kaymer d`Närve gflatteret, nei ou bim zwöit platzierte Wall. Er isch uf e füfti Platz zrugg gheit u dr Stenson het sich wieder ufe zwöiti Platz füre kämpft. Dr Kaymer het aber sini Füehrig, trotz e paar Fählschläg u Närveflattere, nie müesse abgä u het de das Turnier mit 4 Schläg Vorsprung gwunne!