Neerigflüschter: Es guets Gfüehl!

Bin ig doch immer Eini gsi wo bhouptet het, ig sigi nid gmacht fürs Jogge oder besser gseit: Das isch definitiv nüd für mi, das isch viel z`müehsam u längwielig. U was iz? Sit letschte Ouguscht het mi doch no dr Hafer packt u ig ha höfeli agfange Renne bi üs im Fitness uf em Loufband. Spass dra zha wäri z`viel gseit, aber i ha gmerkt oder besser gspührt, dass mir d`Bewegig fählt. Drum wieso nid ufs Loufband wemes scho vor dr Hustüre het! Mit drü Kilometer renne han ig agfange u langsam aber sicher Distanz erhöht. Mir isch mängisch düre Chopf, wie schön das es wär i dr Schwyz verrusse i dr Natur ga z`Jogge u nid wie hie so öd u monoton uf däm Loufband. Ig ha gwüsst da muess ig öppis ändere u ha mir de e iPod kouft u vo denn a ischs mir viel ringer gange die Kilometer abzstrample mit fäziger Musig im Ohr. E so bin ig de regelmässig zwöi bis drümal pro Wuche ga trainiere.

Endi Oktober si de no die nötige Weiche gstellt worde für das ig no fliessiger trainiert ha. Kollegin, d`Ursle vo Dubai u ig hei beschlosse am Dubai Marathon vom 18.Januar 2008 bim 10km Louf teilznäh. Vo denn a bin ig im Minimum drümal pro Wuche uf em Loufband azträffe gsi. Wie nächer das Datum cho isch umso meh bin ig gspannt gsi ob ig überhoupt 10km am Stück mögti seckle, drum isch de mir nüd anders übrig blibe als die Kilometer emal under d`Füess znäh. Hert isches gsi u ig ha scho e chli müesse biesse! Doch zum Glück geits vo mal zu mal besser u wie nächer s`Datum cho isch umsomeh bin ig mir sicher gsi, dass ig die 10km mag düre hebe. D`Frag isch nur no? Sta ig das ou verrusse düre! Bis zum Tag vom Renne han ig kei Meter verrusse trainiert gha!

Letschte Donnschtig ischs de sowiet gsi u ig ha mis Bündeli packt u bi nach Dubai gfahre zu s`Wirze wo ig de no d`Nacht devor verbracht ha. Dr Start vom 10km Louf isch de am Frytig uf 10.30h agseit gsi. Nach emene gmüetliche Abe mit feine Spaghetti u eim Glas Rote und ere Zigarette si mir de bizyte ga schlafe. So wies sich ghört für Sportler!!!!!!!

07.00h isch Tagwacht gsi u nach emne gsunde Zmorge si mir de am 09.10h abgfahre. Das heisst die ganz Familie Wirz u ig. Ihri drü Chind si agmäldet gsi für e 4km Louf u Tönu isch quasi üse Betreuer gsi. Nei nid min Tönel (er het leider wäge üsere Fählplanig nid chönne derbie si u isch i Sydney ghocket). Hei ihn aber via SMS uf em Loufende ghalte.

Dr Start vom eigentleche Marathon über 42km isch bereits am Morge am 07.30h gsi u churz bevor mir de im Start-, Zielgländ acho si, isch dr erschti bereits im Ziel igloffe. U das isch niemert anders gsi als dr Bekannti Langstreckeläufer „HaileGebrselassie“. Im sis Ziel wär gsi Wältrekord z`loufe. Das hät ihm e Prämie vo 1Mio US$ gä.Was er aber leider um 26Sekunde verpasst het. Sini Loufzyt isch 2.04.53h gsi. En Wahnsinn!

Nachdäm mir de die guet Stimmig im Zielgländ u all die viele Läufer u Zuschouer gseh hei, ischs de üs ou langsam e chli komisch worde i dr Magegägend u d`Närve si länger je meh agspannt gsi wie nächer üse Start cho isch. Punkt 10.30h hets klepft u dr Startschuss isch gfalle u für üs ischs los gange. Mit em iPod im Ohr u zur Musik vo dr Gloria Estefan bin ig los grennt! Zersch e chli gmüetlich u nahdisnah s`Tempo azoge. Zwei Rundine à 5km si z`loufe gsi. Es isch nid lang gange u ig ha mis Tempo gfunde u has richtig gnosse mit all dene viele verschiedene Läufer z`renne u ou mit em Schnuuf ischs mir über die ganzi Strecki sehr guet gange , d`Stimmig isch eifach genial gsi. Zudäm het ou s`Wätter mitgspielt. Nach tagelangem Räge het d`Sunne wieder emal gschune u Temperatur isch um die 20° gsi. Nach guet ere Stund u drü Minute bin ig im Ziel igloffe.D`Ursle hets sogar i eire Stund gschafft u het mi am Ziel erwartet. Mit Juhee u emene uuuu guete Gfüehl hei mir enand gratuliert zu däm glungne Louf. Für beidi ischs e Premiere gsi u mir hei eus entschiede s`nächscht Jahr wieder z`ga! www.dubaimarathon.org